AXCP sədri Əli Kərimli
Hazırda Niyaməddin Əhmədovun başına gələnlər bizlərə təkcə qəddarlığın, qisasçılığın, insafsızlığın murdar sifətini göstərmir. Bu gün yaşananlar həm də insanın mənəvi gücünün, ləyaqətinin təntənəsidir. İnsanın ləyaqəti üçün nələrə dözüb, nələrdən imtina edə biləcəyinin nümayişidir. Niyaməddin bəy məhkəmədə ifadəsində bildirdi ki, ondan mənə qarşı saxta ifadə almaq üçün ona təkcə işgəncə verməyiblər, təkcə 14 il azadlıqdan məhrum etmə ilə hədələməyiblər, həm də onu satın almağa çalışıblar. Onunla danışıq aparan adamlar Niyaməddin bəyə general Vaqif Axundovu nümunə kimi göstəriblər. Deyiblər ki, o da mühafizəçi idi. Həm də prezidentin mühafizəçisi. O, 4 prezidentin yanında mühafizəçi işləyib. İşarə ediblər ki, Niyaməddinin də düşərgə dəyişməsi problem olmalı deyil. Anlamayıblar ki, Niyaməddin mənim yanımda mühafizəçi işləməyib. Məndən bir manat da pul almayıb. Ən çətin məqamlarda da mənim yanımda vicdanının hökmü ilə olub. Onlar belə şeyi başa düşməz. Yalnız pul, sərvət, imtiyaz haqda düşünənlər belə şeyləri anlamaz. Təkliflərinə yox cavabı alandan sonra da əl çəkməyiblər. Niyaməddin bəyə deyiblər ki, o yaxşı idmançıdır və arxası, dəstəkləyəni olsa, hətta dünya çempionu olmaq şansı da var. Ona parlaq idman karyerası da vəd olunub. Ancaq Niyaməddin bəy işgəncələrə mərdliklə dözdüyü kimi, şirnikləndirici təklifləri də tərəddüdsüz rədd edib, yalandan başqa bir şəxsi şərləyə bilməyəcəyini deyib. Niyaməddin bəy nəyin naminə bu dəhşətli işgəncələrə dözüb, nəyin naminə ona təklif olunan azadlıqdan, zəngin olmaq şansından imtina edib? O elə bir yol ayrıcında idi ki, verəcəyi qərar həyatında çox şeyi dəyişə bilərdi. Bir tərəfdə azadlıq, zənginlik və parlaq idman karyerası, digər tərəfdə isə işgəncə, 14 il azadlıqdan məhrum etmə (hər halda ona məhz 14 il deyiblər), ailəsindən təcrid edilmə və daha nə qədər pisliklər. Ancaq burada vacib bir məqam var idi. Niyaməddin bəy məhrumiyyətlərdən xilas olub, azadlıq və zənginliyə qovuşmaq üçün saxta üzəduranlıq edib, ləyaqəti ilə – şəxsiyyət olaraq özünə olan hörmətilə vidalaşmalı idi. Niyaməddin bəy bədəli nə olursa olsun, ləyaqətsizliyi seçə bilməzdi və seçmədi. Niyaməddin bəy ləyaqət üçün insanın hər şeyi gözə ala biləcəyini bütün müasirlərlərinə nümayiş etdirdi. Əlbəttə, Niyaməddin bəyi hamı başa düşməz. Ancaq insan ləyaqətinin nə olduğunu bilənlər anlayar Niyaməddin bəyi. İnsan məhz ləyaqətini qorumaq üçün böyük imtinalar edir. Məhz ləyaqətini, inancını, əqidəsini qorumaq üçün insan işgəncələrə, uzunmüddətli həbslərə dözür. Hətta qəhrəmanlığı da ləyaqət üçün edir. Bu ləyaqətli gənc öz nümunəsilə hamımızın hisslərinə toxunur, hamımızı ləyaqətli və cəsur olmağa çağırır. Belə bir gənci indiki ağır durumunda dəstəksiz qoymağı gərək özümüzə yaraşdırmayaq.