Milli Şuranın Koordinasiya Mərkəzinin üzvü Gültəkin Hacıbəyli
Vidadi bəyi mənə ilk əvvəl atam sevdirib. Vidadi bəyin qardaşı Siyavuş müəllim atamın tələbə yoldaşı olub. Atam dəfələrlə Vidadi bəyin Gəncədəki ata evində qonaq olub və həmişə də bu evin bir ocaq olduğunu deyər, o ailənin nəcabətindən, insanlığından danışardı.
Tale elə gətirdi ki, Vidadi bəyin Pirşağıdakı evi də indi Milli Şura, əslində isə, bu ölkənin ümidini sönməyə qoymayan hər kəs üçün ocaq olub. Dəfələrlə icarəyə götürdüyümüz, iclas keçirdiyimiz ofislərdən çıxarılandan sonra məcburiyyət qarşısında toplantılarımızı Vidadi bəyin evində keçiririk.
Və buna görə Vidadi bəyin başına açılmayan oyun qalmadı. Övladlarını işdən çıxardılar, ailəsində müxtəlif problemlər yaratdılar, Mütəşəkkil Cinayətkarlıqla Baş Mübarizə İdarəsinə çağırıb hədələdilər, hədələr işləməyəndə şantaja, qarayaxmaya keçdilər. Bunun da nəticəsinin olmadığını görüb artıq mənim üzərimdə sınaqdan keçirdikləri iqtisadi təzyiq metoduna keçdilər. On illərlə təqib olunan, siyasi fəaliyyətinə görə işləmək imkanından məhrum edilən şəxs üçün bu ən ağır cəzadır.
Vidadi bəyin pensiyasının önəmli bir hissəsini heç bir əsas olmadan kəsiblər. Bu da azmış kimi guya ona artıq ödədikləri 103 min manatı geri tələb edirlər. Bu məqsədlə Vidadi bəyin əmlakına həbs qoyublar.
Belə dövlət olar? Belə dövlət idarəetməsi olar? Pensiyanı Vidadi bəyə kim verib? Kim hesablayıb? Bəlkə Vidadi Mirkamal bəyə pensiyanı Əli Kərimli hesablayıb verib?! Səhv olubsa, sizin səhvinizdir, siz səhv hesablayıb ödəmisiniz, vətəndaş da “dövlətimin mənə verdiyi halal haqqımdır” deyib xərcləyib, vətəndaş niyə indi buna görə əziyyət çəkməlidir?!
Digər tərəfdən, niyə bütün keçmiş hakimlərin aldığı rəsmi pensiyanı Vidadi Mirkamal almamalıdır?! Məgər qanunvericilikdə “Milli Şuranın üzvlərinin pensiyası iki dəfə azaldılmalıdır” kimi bir maddə var?! Adam Arbitraj Məhkəməsinin sədr müavini olub, ədliyyə generalıdır, birinci dərəcəli hakimdir. Niyə onun vəzifəsində çalışanlar 2-3 dəfə çox pensiya alır, Vidadi bəy isə hələ evini satıb pensiya fonduna 103 min manat ödəməlidir!
Müxalifət təqib olunanda bir çoxları “biz müxalifət deyilik, bizə etməzlər” deyib özünə təsəlli verir, susur, bizə dəstək olmur. İstənilən repressiya elementini müxalifət üzərində sınaqdan keçirəndən sonra cəmiyyətə tətbiq edirlər. Bu gün mənə, Vidadi bəyə qarşı edilənlər, sabah kütləvi hal alacaq (proses artıq başlayıb, on minlərlə insan pensiya və müavinətlərdən məhrum edilib). İqtisadiyyat iflas edibsə, dövlət büdcəsi getdikcə aktuallığını itirən neftdən və qazdan asılı vəziyyətdədirsə, aydındır ki, o büdcəni vətəndaş cibindən doldurmalıdır. Maaşı, pensiyası varsa, onu ödətdirəcəklər, yoxdursa, evini, maşınını…inəyini istəyəcəklər və məhkəmə qərarları ilə alacaqlar da.
Və o zaman etiraz etməyə, səsinizə səs verməyə adam qalmayacaq. Çünki bu repressiya üsulları bizim üstümüzdə sınaqdan keçiriləndə cəmiyyət susurdu…