لو رجع بيه الزمن ..كنت هدرس ايه ؟؟
طبعا وانا فى ثانوية عامة كان مستحيل أخمن اني هكون " إسراء عبد الفتاح " الناشطة السياسية ، كنت جايبه مجموع كبير 92 % أدبي ثانوي قديم وده كانت حاجة عظيمة جدا فى الوقت ده وكنت ممكن أدخل سياسة واقتصاد او اعلام او السن . لأسباب عائلية ولتوجهات ان الشغل محتاج لغة اخترت " السن " مكنتش بفكر فى اي حاجة تانية غير ان سوق العمل محتاج لغة واني لازم اتخرج واشتغل وخلاص لكن مفكرتش انا بحب ايه او ايه المناسب مع اهتمامتي وشخصيتي . ولسخرية القدر مجال شغلي كان اقرب للكليتين اللي مفكرتش اني ادخهم " اعلام " و " سياسة واقتصاد " اشتغلت كمذيعة فترة وبعدين كاتبة صحفية واعلام اجتماعي يعني كله تحت مظلة كبيرة لدراسة الاعلام بجانب مشاركتي السياسية فى اكتر من مجال . منكرش ان دراسة اللغة مهم ولكن دراسة اللغة فى الجامعات بشكل الأدب والدراما بعيد كل البعد عن مجال العمل يعني لو كنت اخدت كورسات بيزنس انجليش كنت هستفاد اكتر .
لو رجع بيه الزمن اختياري الاول هيكون " سياسة واقتصاد " والتاني هيكون " اعلام " لان الممارسة لا يمكن تكون كفاية من غير دراسة اكاديمية . وطبعا قدرت ادرس واخد كورسات كتير لها علاقة بمجال عملي فى الفترة الاخيرة وبالفعل كنت هسافر اخد منحة دراسة فى مجال " اعلام التواصل الاجتماعي " ولكن للاسف منعني المنع من السفر من الدراسة .
منعي من السفر خلاني اقرا اكتر اون لاين عن دراستي وامارس بمهنية اكتر ولو المنع اترفع في اي وقت هدرس برضه اللي بحبه لو ليه عمر .
الخلاصة : ادرسوا اللي تحبوه المناسب لكم ولشخصيتهم متحسبوها بالورقة والقلم احسبوها انت هتبدع وتبتكر فين لو درسته ؟ ومفيش وقت محدد للدراسة لو اكتشفت انك درست حاجة بعيد عنك خلصها وادرس تاني حاجة جديدة تانية وثالثة ،،، العلم والتعليم ملوش سن بس لازن تختار المجال اللي شبهك مهما اتاخرت فى الاختيار .
