10 سنوات فى المجتع المدنى والعمل العام
النهارده ذكري اليوم العزيز علي قلبي...واللي غير مجري حياتي بالكامل ..21/ 22 يناير ٢٠٠٨... اليوم اللي دخلت فيه المجتمع المدني والعمل العام ...اشتغلت وانا لسه طالبة في اخر سنة في كلية تربية... قسم علم اجتماع وفلسفة ...
( ثقافة التوريث فى المجتمع المصرى المعاصر )
دة كان البحث بتاعى فى اخر سنة فى الكلية 2008 .... كتبت فية عن التوريث من اول ولاد الممثلين والمطربين لحد الاستاذ جمال مبارك ! ....وابدعت فى ورقة الامتحان براحتى..استاذ المادة كان ثورى...خلانا نعمل بطاقات انتخاب وادانا عليها درجات...كان بيدعونا للثورة فى كل كلمة كان بيقوها....هو اللى دخلنى المجتمع المدنى ...واتحقق معاه فى الكلية من الموالين للنظام آنذاك...الراجل دة غير حياتى ...من علم الاجتماع والفلسفة وتدريسهم...الى مجال التوعية والتثقيف السياسي ومراقبة الانتخابات ومتابعة التحول الديمقراطى !
اول مرتب ليا من المجتمع المدنى فى2008 كان 300 ج " ومكنتش لسة اتخرجت من الكلية "
النهاردة بحتفل ب 10 سنوات في المجتمع المدني والعمل العام ...لا اتعلمت فيه اكسر ولا اخرب ولا اهدم ... اتعلمت اقرأ و اسمع وافهم وأتقبل الاخر ...اتعلمت التطوع وبذل الوقت والجهد قدر الاستطاعة...اتعلمت الممارسة السياسة والتنمية والعمل الخيري ... اتعلمت البناء والاستثمار في الانسان وزيادة وعيه ومعرفته...
علمنى انى أحاول اساعد اللى بيعمل حاجة ...عالاقل احسس الناس المجتهدة المبادرة انها مش لوحدها ... بحاول ادعم حلمها وأملها ومطالبها طالما مشروعة ومتفقة معايا...ولو لاقدر الله فشلنا... بيكفينا شرف المحاولة ... ونتعلم من اى خطأ ارتكبناه ومنكرروش...
المجتمع المدنى حسسنى انى شاركت ولو بلبنة صغيرة فى بناء مصر بتوعية شبابها...وتوعية نفسى قبلهم...
بنيت سلسلة علاقات مع عدد كبير جدا من الافراد والكيانات ... اتعاملت مع كل الاحزاب تقريبا ...المعرضين والمؤيدين... ومع عدد كبير جدا من الجمعيات والموسسات ... ساهمنا فى التشبيم وعمل مختلف التدريبات والكورسات الخاص منها بالتوعية السياسية وغيرها زى العلاقات العامة والتوعية الصحية والتنمية البشرية والمساهمة فى تنشيط السياحة والتوعية الغذائية وادارة المشروعات والكمبيوتر والاعلام واعداد المذيعين وغيرها وغيرها ...مع المرأة والنساء والاطفال والمعاقين
شكرا لكل مكان اشتغلت فيه...
والف الف شكر لكل مكان حضرت فيه تدريب ...ولكل مدرب استفدت منه بكلمة...لكل زميل وزميلة شاركوني لحظة نجاح... ولكل مدير ساعدني وفهمني وعلمني...ولكل شخصية محترمة اضافتلى جديد ..
وتحياتى لكل صديق مجتهد بيشتغل فى المجتمع المدنى...
الامر الائع فى شغل المجتمع المدنى انك بتحاول تخدم الجميع بلا استثناء ولا تمييز...بتخدم من غير ما تبقى مستنى منصب فى وزارة ولا كرسى فى برلمان.. بتشتغل وسط تضييق امنى احيانا ...بتشتغل فى مناخ انت فية مشتوم ومتخون..
لكن بالرغم من كل دة ...انت مكمل ...عشان فيه فكرة...وفية حلم...وفية غاية بتتمنى كل دقيقة انها تتحقق....
ويبقى منتهى أملك بس انك...ترفع مهارة ..وتغير ثقافة ...وتحدث تغييرايجابي ....
ربنا معانا ويشد من ازرنا جميعا..ويبارك كل جهد صادق
انا فخورة بكل حاجهً عملتها خلال السنوات دي
يارب اجعل كل خطوة خطيتها في المجال ده لوجهك الكريم ولصالح الوطن ...وقدرنا واعدنا وقوينا نكمل ونبذل جهد ونترك بصمة متميزة وسيرة عطرة في اي مكان نكون فيه .. او في اى عمل بنقوم بيه ....
