دول "الطوق" واعلام "الشويش"
دول الطوق...تعبير حنجوري اطلق بعد الاعلان عن قيام دوله اسرائيل للتعبير عن الكماشه العربية المحيطه بدولة اسرائيل و طبعا هذا التعبير كان يدي انطباع ان الفار وقع في المصيده وان نهايته حتميه لا محاله 😂
وزي ماحنا عارفين اسرائيل اتطوقت واتلمعت بفوطه زفره وبقت زي الفل .
الأزمة اللي بين قطر ودول الطوق بدأت بدفع امريكي رامبي واضح وبعد لامؤاخذه قمه الرياض الي طلع بيها البرنس ترامب بعقود قيمتها تصل ل460 مليار دولار.
الأزمة بدأت مشحونة وبها تصعيد غير مسبوق وغير متوقع،المطالب حاده وغير واقعيه ومربوطه بمهله 10 ايام !!!
لكن هوب دوبل كيك ترامب اتصل بالسيسي في التيلفون قبل اجتماع وزراء خارجية دول لامؤاخذه الطوق القطري وفرمل الحنجره ودخلنا الجمود في ظل عدم اكتراث قطري بأي وجود لمصر او للسيسي تحديدا ودايما كانو يتكلموا عن البحرين والامارات والسعوديه فقط !!
قوم ايه بقي قطر لعبت لعبه كبيره اوي ودرت تجيدها فعلا:
اولا:استغاثت بتركيا وفعلت اتفاق انشاء قاعده تكية على اراضيها وده مكسب تركي غير مسبوق
وثانيا :ايران وجدت موطئ قدم اخري داخل جزيره العرب وانعشت اقتصادها بتصدير سلع واستخدام مجال جوي وحاجة زي الفل
ثالثا: استطاعت انها تكون سبب في اظهار تناقض ترامب مع وزير خارجيته واظهرت الاداره الامريكيه بالشكل العره ده
وبكده قدرت تعمل توازن أوقف اي احتمال اجتياح عسكري لاسقاط النظام في قطر
كل ده عمل اضطراب في الاسواق العالمية واسواق النفط والغاز استدعي قرار دولي ضمني يضع سقف لمغامره دول الطوق ولامؤاخذه .
طيب نقدر نفكر ونقول دول لامؤاحذه الطوق غلطت في ايه؟
غلطو انهم لم يجيدو فهم الضوء الترمبي الاخضر... ترامب اداهم انطباع انهم برنسات في نفسهم واصحاب سياده وحريه اتخاذ قرار لكنهم لم يجيدو التحرك ولم يختارو لحظه اللسع ...
الي ياخد خطوه كبيره زي دي اولا كان عليه ضمان حدوث انقلاب داخل قطر بمجرد اعلان تصعيدهم ضد تميم.. يعني لازم يضمنوا خروج تميم ووالدته من المشهد ثم اعاده صياغه الوضع الداخلي القطري انه ثوره على سياسيات العيله الحاكمه وبالتالي عوده قطر لحظيره محيطها العربي الخليجي الوحدوي اللوزعي
ثانيا العبط بتاع اقفلوا الجزيره علشان بتكدب واقفلو الحدود واغلقوا المجال الجوي واطردوا المواطنين القطريين والجال القطريه .. ولا نبيعهم ولا نشتري منهم جعل القطريين يبانوا ضحايا لسياسات تتنافي مع العادات العربيه وبخطوات فاجئت المواطن العربي لان مفيش اي تدرج للتصعيد.
انا فاكر اما السادات زار القدس العرب كلهم قاطعوا مصر في وقت كان مئات الالاف من المصريين كانو عايشين في الخليج ويعملون ولم يطردوا من هذه البلاد لان العلاقات السياسيه شئ والشعبيه شئ اخر .
ثم ان الردود القطريه على المطالب الي طرحت كان منطقي ويقبله العقل لحد كبير .. ماهو مش معقول يطالبو بقطع العلاقات مع ايران في الوقت الي الامارات بتتبادل تجاريا مع ايران الي هيا محتله جزرها باكتر من 20 مليار دوار في السنه... والجزيره بتبث اكاذيب على اساس ان العربيه وسكاي نيوز عربيه مبتعملش نفس الشئ؟
حاجات تضحك وموقف مهتز زاد من اهتزازه ان الكويت وعمان لم يتخذوا نفس المواقف وكمان باقي الدول العربيه كلها باستثناء دول تتلقي معونات مباشره من السعوديه زي ليبيا وموريتانيا وغيرهم
نيجي بقي للاعلام .. بسم الله ماشاء الله استطاع الاعلام المصري ممارسة ريادته ومهنيته وانه يمد طريقته في التشليق والشرشحه وان يهبط بمستوى اداء قنوات الامارات والسعوديه ليصبح النموذج المصري هو تيمة اعلام المنطقه وبالطبع الجزيره لم تختلف وبقي رموزها سواء على الهواء او على صفاتهم الشخصيه في مواقع التواصل الاجتماعي مرتع لصراع الحواري بين ستات بتردح لبعض واستحق الاعلام العربي لقب " إعلام الشوبش "
