اكتبي وانشري .. متخافيش متتكسفيش
فكرتي قبل كده تمسكي ورقة وقلم وتكتبي الى وجعك ؟! طيب لو فكرتي ونفذتي ده من باب الفضفضة وتفريغ شحنه غضب، فكرتي بدل ما تقطعي الورقة الى كتبتي فيها وجعك انك تنشريها والناس تقراها ؟! وليه لا مش يمكن وجعك وتجربتك في تجاوزه هتفيد غيرك، حد اتحرش بيكي في الشارع اكتبي احساسك وازاى اتصرفتي، أكيد في بنت هتقراه وهتتعلم منك، هتبطل تسكت من الخوف لو حد لمسها، شجعي غيرك يتصرف صح، شجعيها تطالب بحقها في انها تعيش حره فى مجتمع خالي من المرضى.
من كام سنة كتبت " شيرين ثابت " بوست عن التحرش على الفيس بوك، بس البوست مكنش عادي، لان وقتها كانت بوسات التحرش كلمتين وبس ومن غير اى تفاصيل،كلها شجب وتنديد وعليهم شوية لوم على الضحية، لكن شيرين قررت تكلم عن التفاصيل، البوست اتشير بالالاف، ورغم ان كتير من الكومنتات كانت من نوعية " اية دة ازاى تكتبي الكلام دة اية البجاحة دي كان ممكن تحكي بس مش بالتفصيل و......" لكن كمان كان فيه كومنتات كتيرة بتشكرها انها قدرت تكلم بجرأه في الموضوع وتحذر البنات من تصرفات المتحرشين، في الوقت دة قررت انا كمان اتشجع واشير البوست، رغم اني كنت متاكده ان اهلي واخواتي وبعض الاصدقاء هيكون تعليقهم ازاى تنشري بوست فيه الكلمات دي! لكن الي مكنش متوقع ان بنت زينا هى الى تعترض، دخلت صديقة ليا تنصحني امسح البوست وقالت ازاى تنشري الكلام دة؟ البوست فيه الفاظ مينفعش تتقال وحتى لو ده بيحصل بلاش نكلم فيه "بالبجاحه دي"، رفضت امسح البوست، وفاتت الايام وبعد وقت طويل نفس الصديقة دي بعتتلي تشكرني لانها اتعرضت لموقف تحرش كان ممكن يتطور لاكتر من كده، بس وقتها افتكرت كلام شيرين واتصرفت بسرعه وقدرت تاخد موقف، انبسطت جداا اننا لسة قادرين رغم كل القيود المجتمعية و "العيب والي ميصحش نكلم فيه" اننا نكلم عشان نقدر نحذر بعض وننقل خبراتنا لبعض.
اكتبي وعبري عن كل حاجة، قولي احساسك خوفك شاركي بأفكارك يمكن نلاقي حلول لمشاكلنا، بلاش ندفن راسنا فى الرمال ونقول " كله تمام " لأن كله مش تمام.
