المسيحيين مبيستحموش
كام مرة سمعت الجملة دي ؟!
الاجابه ببساطه كتير طبعا
الجملة دي انا بسمعها من طفولتي، وكل ما بكبر بسمع اكتر
كبرنا في مجتمع ظاهره غير باطنه، أغاني وأفلام ومسلسلات بتين اد ايه المسلمين والمسيحيين في مصر بيحبوا بعض، وبيزوروا بعض وبياكلوا في طبق واحد
لكن الحقيقة ورغم ان ده أحيانا بيحصل فعلا، الا ان الظاهر غير الباطن، ومعرفش اذا كان ده متبادل ولا لأ بس هتكلم عن الجانب بتاعي، لان ده الي عشته وسمعت الى بيتقال فيه
من طفولتي بسمع المسيحيين مبيستحموش، المسيحيين ريحتهم وحشه، لازم القسيس "يتف" في عجينه الكحك بتاعهم عشان تبقى مباركه، ومرة سمعت ان لازم القسيس يعمل فيها "بيبي" عشان بردة يبرك الكحك وووووووووو
ومش بس الكلام عن الاكل والشرب والنضافة الشخصية ونضافة بيوتهم
لا كمان الكلام بيوصل للخوض في الأعراض وده بيحصل من ناس بتدعي طول الوقت التدين
سمعت كتير عن حفلات جنس جماعي بتتعمل يوم رأس السنة في الكنيسة
وان الأديره الي في الصحرا معموله عشان الرهبان والراهبات يمارسوا الجنس بعيد عن عيون الناس، ومش عارفه ازاى في نفس ذات الجمله بسمع ان الرهبان والراهبات دول شواذ
طيب يا جماعة ما ترسوا على بر هما بيناموا مع بعض ولا هما شواذ ؟
لا فيه الأنأح بقى ان اعروسة بتُقدم كقربان ليلة فرحها لقسيس !
انا فاكرة ان واحدة صحبتي قالتلي مرة واحنا رايحين نبارك لواحدة صحبتنا مسيحية على خطوبتها، ان القسيس هيجربها الاول قبل ما تجوز جوزها !
بصتلها في ذهول كده ومعرفتش أرد وغلطانه الحقيقة لاني كان لازم أرد
محتاجين نعيد تفكيرنا في الكلام الى بنسمعه ونرجع نردده من غير ما نعرف حقيقته
انا دخلت بيوت مسيحيين كتير وعشت بينهم وكلت من أكلهم وحضرت أفراحهم ومناسبتهم الدينية وكمان في وقت كانت أقرب صحبه ليا مسيحية يعني كنت قريبة لدرجة كفاية اني اشوف وافهم
المسيحين بشر زينا مش فصيله تانية، أه وبيستحموا على فكره
