جوازة من غير نيش .. متلزمنيش
مشهد خارجي داخلي نهاري ليلى لقصة حب بين اتنين قرووا يكملوا حياتهم سوا
بس عشان الجوازه تكمل لازم نيش، وزى ما قال الرائع عبد المنعم مدبولي لازم البفتيك عشا محدش يقول حاجة "مشهد رائع من فيلم (الحفيد)" فلازم النيش عشان محدش يقول حاجه .
من فترة قريت مقال لسيده فاضله عن أهمية النيش وفوايده، والموضوع كبر منها لدرجة انها قالت ان الجوازه السهله والى مفهاش الراجل يطلع عينه ويدفع دم قلبه تنتهي نهايه سهله، وان موضوع تقليل نفقات الجواز دي موضه سخيفه المقصود منها تقليل قيمة المرأة في المجتمع! وان دي حمله ذكورية عملها الرجاله عشان تقلل مصاريف الجواز!
وكتبت تناشد الجميع بالتشدد في طلبات الجواز عشان لما يحصل طلاق الست متطلعش من المولد بلا حمص !! "ده عى حد تعبيرها يعني"
زى ما يكون الفرش الكتير والصالون المدهب وطقم الكاسات هو الضامن عشان الستات تعيش سعيدة وتحس بأمان، على أساس انها هتنام يوم في النيش، ويوم على كنبة الصالون المدهب، ويوم جوه التلاجة الخمسين قدم، الامان في الاختيار مش في العفش والقايمه.
ونرجع للنيش هذا الموروث العظيم الي ملوش اى تلاتين لازمة
ايه لزمته معرفش، طيب بيتعمل به اية معرفش، كل الى اعرفه ان جوازات كتير باظت بسبب خناقة النيش والقايمة وشفاط المطبخ واوضة الضيوف ووووو
حضرت كتير تجهيز بيوت اصحابي المقبلين على الجواز
وكنت دايما باجي عند حته النيش دي وبقف كده واتنح واسأل نفس وساعات أتجرأ واسال الناس لازمته ايه ؟
محدش جاوبني اجابه منطقية تقنعني ليه احط في بيتي دولاب ازاز مليان حاجات ازاز وكريستال غالية اوووووي ويكونوا معرضين طول الوقت يطربقوا فوق دماغنا لو حد كح جمبهم.
الحياة صعبه والاسعار نار، ومحدش عارف يجوز لازمته ايه بقى نشيل نفسنا عبأ زيادة عشان شوية افكار ومعتقدات سخيفة،
البيت البسيط الي فيه الاساسيات هيكون حلو وسهل تنضيفه، وبسيط ومش مكركب، وهنوفر تقريبا اكتر من نص الى هندفعه في بيت فيه كراكيب ملهاش اى تلاتين لازمه
بدل النيش اعملوا دولاب فيه كتب عشان تربوا اجيال جديدة تفتح عينها على كتب وتتعلم تقرا من دري خلينا نطلع اجيال مثقفه وفاهمه بدل الحوسه والوكسه الى وصلنلها دي بسبب الجهل المتفشي في المجتمع
