دكتور المجانين
في قديم الزمان كان اليونانيون بيدبحوا المريض النفسي، وكانوا بيعتبروا ان فيه ارواح شريرة وشياطين مسيطره عليه ولازم يتقتل !
بس الاخوة الرومانيون قلبهم كان أحن، فكانوا بيحبسوا المرض النفسي لحد ما يموت او ينتحر!
لحد ما ظهر الاغريق، وبدأوا يفكروا من ناحية طبية بحتة، والموضوع خد شكل تاني وفضل يتطور، لحد ما وصل العلاج النفسي للشكل الحالي، بقى فيه علاج بالفن والرسم والمزيكا ووووو
ورغم ان العلاج النفسي في كل العالم بيعالج وبيساعد ناس كتير تتخطى ازمات، وبينقذهم من الإنتحار، الا ان لسة في العالم العربي فكرة إن الدكتور النفسي "بتاع مجانين" مسيطرة على عقول كتير
دكتور نفسي ايه ؟ دة بتاع المجانين وانتي مش مجنونة انتي ست العاقلين
الجملة دي سمعتها من أمي، لما قولت ادامها اني محتاجة اروح لدكتور نفسي
وعشان مبقاش مفترية، دة مش رأيها هي بس دة رأي كتير جداا حوالينا
شايفين ان الدكتور النفسي بتاع المجانين و المدمنين
الكلام دة طبعا محتاج اعادة تفكير
احنا كلنا مرضى نفسيين، وفيه تقارير واحصائيات عالمية بتقول ان الاكتئاب مثلا اصبح "مرض العصر"، وان نسب الاصابة بيه عالية جدا، والي معندوش اكتئاب لازم يتحط في محمية طبيعية، عشان المفروض نخاف عليه من الانقراض
لو قررت تمشي في الشارع هيجيلك اكتئاب، لو قررت تركب مواصلات هيجيلك اكتئاب،
الشغل بيجيب اكتئاب، التعليم بيجيب اكتئاب، التعامل مع البشر بيجيب اكتئاب، "الاسعار" بتجيب اكتئاب، ووووووووو
طبعا مش دي بس الحاجات الي ممكن تجيب اكتئاب، فيه حاجات اهم واكبر زى الموت الخزلان الفشل الظلم الخوف اليأس الودة الحزن ووووو
انا عارفه ان الطبيعي الاول نقاوم ونحاول نعالج المشاكل الى بتواجهنا، ولو فشلنا نطلب دعم من اهلنا، من اصحابنا القريبين، لكن ساعات المشاكل تكبر وتكبر وتسبب ازمات كبيرة، وتجيبلنا امراض نفسية
ساعتها لازم نلجأ لمتخصص ونعترف مبدئيا اننا عندنا مشكلة وبنمر بازمة
صحيح مشوار الدكتور النفسي في مصر محتاج نحوش، او نعمل جمعية ودة عن تجربة
بس كمان فيه حلول تانية، زى المراكز الى بتقدم دعم نفسي مجانا أو بأسعار معقولة عن اسعار الدكاتره والعيادات الخاصة
المهم اننا نعترف بان فية مشكلة ومحتاجة علاج وناخد خطوة للامام ونبطل نخاف ونكسف ونقول ميحش أروح لدكتور نفسي انا مش "مجنون"
