أكيد عارف أن الشهر فيه 30 يوم أو 31 على
حسب يعني، بس الأكيد اللى متعرفوش أن نفسية الـ "هن" كلهن مضطربة 15 يوم
في الشهر، يعني لو بتعرف تحسب ممكن تضرب 15 يوم في 12 شهر، مظبوط .. 180 يوم حضرتك
في السنة نفسيتنا مش عايزة أقولك بتبقي عاملة إزاي.. ولا تحب أقولك؟
طبعا دلوقتى بتقول:"إيه الدلع دا..
مش الدورة الشهرية ولا البريد زي ما البنات بتقول عليها أخرها من 5 لـ 7 أيام بس"،
أنت صح وبرنس وبرافو أن عارف بس تعالى أقولك إيه اللى بيحصل لـ "هن" في
البريود وليه نفسيتهن ضايعة 15 يوم.
قبل البريود بـ 5 أيام.. عارف لما الفاكهة بتتنفخ وتبقي داخلة على أنها تضرب وتبوظ؟
إحنا قبل البريود بيبقى شكلنا كدا، انتفاخ في البطن والجسم كله ونفخ برضو في النفسية،
تحس أن في ذبابة رخمة واقفة على مناخيرك، أنا فاكرة مرة اتصلت بصاحبتي الساعة 2 بليل
قولتلها هسيب الشغل وهلم هدومي واهرب من البيت، صدقني.. مكنش في سبب غير أن البريود
جاية.
مرة لقيت بوست منشور على جروب بنات بيسألهم
بيحسوا بأيه لما البريود بتقرب، الإجابات ضحكتني جدا على حالنا غير أنها صبرتنى على
اللى بحسه، واحدة كتبت بتخيل أن بابا وماما ماتوا وأني بقيت وحيدة وبفضل أعيط بالساعات،
وبنت تانية وصفت حالها وقالت بكره العالم وبكره نفسي، وكتير قالوا أنهم بيناموا هروبا
من الواقع اللى مش عارفين هو إيه أصلا، دا غير البنات إللي قالت أنها بتتخانق وتاخذ
قرارات مصيرية بتندم عليها بعدين.. صعبنا عليك؟ لا أصبر التقيل جاي.
طبعا اللي فات دا جزء من معاناة نفسية بنعيشها
وأنت متعرفش عنها إلا أن المدام نكدية والحلوة اللى بتحبها بتحب النكد والخناق وقعدة
البيت، زي برضو أنك متعرفش حاجة عن الألم الجسدى اللى بنحس بيه وقت البريود صحيح..
متعرفش ليه لما ممكن أقولك؟
وقت البريود.. خلعت ضرس العقل قبل كده؟
طب جالك حالة تسمم؟ طب القطنية ماقفشتش عليك؟ احنا بقى بنحس بوجع يشبه الثلاثة دول
باكدج واحدة، ألم في الرجلين والظهر والحوض والبطن وصداع ودوخة، دا غير النفسية اللى
بتبقى حبة فوق وحبتين ثلاثة تحت، ونضطر في وسط هوجة الألم النفسي والجسدي ننزل الشغل
وتقف نعمل لحضرتك الأكل والشاي ونذاكر للكيدز.. أهم حاجة الكيدز عشان متقولش عليها
مهملة.
لسه بتحسب في الأيام ولا زهقت ومليت بسرعة
كعادتك؟ عامة لو بتحسب كدا 5 أيام قبل البريود كآبة و5 أيام وقت البريود ألم جسدي ونفسي..
آه للأسف 5 أيام بس مدتها عند نسبة كبير من بنات وستات مصر، لأن الحمدالله أغلبنا عنده
أنيميا وفقر دم.. حاجات علمية كده، نيجي بقي بعد ما البريود تخلص وتروح لحالها.
ما بعد البريود.. فاكر إحساسك وأنت خارج
من كورس التنمية البشرية؟ اللي هو هغير حياتي وأرتب أفكاري وهشيل حديد وأبقى إنسان
جديد، وقرار الصبح وغيره بالليل، البنات والستات بتبقى في الحالة دي كام يوم كدا بعد
البريود أو للأسف عقبال ما معاد البريود الجاية يقرب وتدخل فى قوقعتها.. أقسم بالله
يا أخي معاناة وحياتنا ضايعة وسطها ومبنلحقش حتى ناخذ نفسنا.. بس اللهم لا اعتراض يعني.
لسه حابب تفهم إيه علاقة البريود بالحالة
المزاجية للمدام والحلوة وإيه حوار الهرمونات دا؟.. باختصار عشان أنا مش دكتورة وبحاول
أفهم نفسي بالعافية أصلا، في علاقة متبادلة
كده بين الجهاز العصبي والغدد الصماء اللى هي مسؤولة عن إفراز الهرمونات، حضرتك
الجهاز العصبي يدي إشارة للغدد دي بزيادة أو نقصان نشاطه، تقوم على طول الغدد تدي
إشارة للمخ بالبدء أو التوقف عن نشاط معين واللى منه المشاعر والإحساس، والحاجات الغريبة
اللى بنحس بيها واتكلمنا عنها فوق زى الابتعاد عن الحياة الاجتماعية والشعور بالكآبة
والانعزال وفقدان النشاط والحيوية.. فهمت؟ لو لسه شوف دكتورة بقي تفهمك.
طيب.. مطلوب منك حاجة في الليلة دي ولا
هترج من هنا مرور الكرام؟ طبعا مطلوب منك كتير إحنا منقدرش نستغنى عنك، في الأول بلاش
تحسسها أنها عبء نفسي عليك الفترة دي لأن لو حست بدا ممكن تسيبك الصبح ومتحسش بتأنيب
ضمير لأنك ياحلو ماحتوتهاش في أصعب أوقاتها، وثاني حاجة ماتتكلمش معاها كتير وأجّل
أي نقاش او استفسار يعني لو قالت ليك بكرهك ومش عايزاك أقولها حاضر وأفضل معاها برضه،
ولو أنت مدير مفيش مانع والله من أجازة أول يومين من البريود إحنا بنموت فيهم يافخري
والله.
