Məhkəmə Rusiya Müdafiə Nazirliyinin 9-cu Müalicə-Diaqnostika Mərkəzinin keçmiş rəisi, general-mayor Konstantin Kuvşinovu həbs edib.
Gununsesi.info xəbər verir ki, bu barədə TASS iş materiallarına istinadən məlumat yayıb.
Məlumata görə, tutulan general tibbi avadanlıqların alınması üçün ayrılmış 57 milyon rublu mənimsəməkdə şübhəli bilinir.
Cinayət işi üzrə istintaqı Rusiya İstintaq Komitəsinin Baş Hərbi İstintaq İdarəsi aparır. Mövcud məlumatlara görə, Müdafiə Nazirliyinə tabe olan hərbi tibb təşkilatı 2022-ci ildə “Delrus” və “TDA-Service” şirkətləri ilə 100 milyon rubldan çox dəyərində avadanlıqların alınması və təchizatı üçün müqavilə imzalayıb.
İstintaq müəyyən edib ki, “Delrus” satış şöbəsinin rəis müavini və “TDA-Servis”in kommersiya direktoru Kuvşinovla büdcə pullarını oğurlamaq üçün cinayət əlaqəsinə giriblər.
Tibbi avadanlıqların qiymətini artıraraq, 57 milyon rubldan çox pulu oğurlayıb və sonra öz aralarında bölüşdürüblər.
Kuvşinov 2019-cu ilin fevral ayından 2025-ci ilin may ayına kimi Müalicə-Diaqnostika Mərkəzinin rəisi olub. Bundan əvvəl o, Müdafiə Nazirliyinin Müalicə-Profilaktika İdarəsinin rəisi – Müdafiə Nazirliyinin Hərbi Tibb Baş İdarəsinin rəis müavini vəzifəsini tutub.
