စစ်ကိုင်းတိုင်း၊ မုံရွာ – မန္တလေးလမ်းမကြီးပေါ်တွင် ကင်းပုန်းချရန်ထွက်လာသည့် စစ်ကောင်စီ၏ အန်စာတုံးယာဥ်အား မိုင်းဆွဲတိုက်ခိုက်ရာ ယာဥ်ပေါ်ပါအကြမ်းဖက်စစ်အုပ်စုဝင် ခုနစ်ဦးလုံး မိုင်းထိပြီး ငါးဦးသေဆုံးခဲ့ကြောင်း မဟာမိတ်အဖွဲ့များက ပြောသည်။
ယနေ့ (မေလ၁၇ရက်) နံနက် ၁၀နာရီ၄၅မိနစ်ခန့်က ချောင်းဦးမြို့မှ ကင်းပုန်းချရန်မောင်းနှင်လာသော စစ်ကောင်စီတပ်ဖွဲ့ဝင် ခုနစ်ဦးလိုက်ပါလာသည့် အန်စာတုံးယာဥ်ကို မုံရွာ-မန္တလေးလမ်းမကြီးပေါ် နတ်ရေကန်ရွာနှင့်ငါးရှန်ကျေးရွာကြားတွင် မိုင်းဆွဲတိုက်ခိုက်ခဲ့ခြင်းဖြစ်ကြောင်း မဟာမိတ်အဖွဲ့များက ပြောသည်။
စစ်ကောင်စီတပ်ဖွဲ့ဝင်များ ကားပေါ်မှအဆင်း မိုင်းဆွဲတိုက်ခိုက်ခဲ့ခြင်းဖြစ်ပြီး အကြမ်းဖက်စစ်သား ငါးဦးသေဆုံးကာ နှစ်ဦး ထိခိုက်ဒဏ်ရာရရှိခဲ့ကြောင်း၊ သေဆုံးစစ်သားတစ်ဦးမှာ ခါးပိုင်းပြတ်ကျသွားကြောင်း မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM)က ပြောသည်။
ယနေ့ နံနက်၅နာရီခွဲခန့်ကလည်း ဂွေးပင်တောလမ်းပိုင်းတစ်နေရာတွင် စစ်ကောင်စီတပ်များအား မိုင်းဆွဲရန်စောင့်နေစဉ် အကြမ်းဖက်စစ်တပ်မှ ချောင်းမြောင်းပစ်ခတ်ခဲ့သည်ဟု CDSOMက ပြောသည်။
မိုင်းဆွဲရန်စောင့်ဆိုင်းနေသည့် ပြည်သူ့ကာကွယ်ရေးတပ်ဖွဲ့ဝင်များအား အကြမ်းဖက်ဖက်ဆစ်စစ်တပ်မှလိုက်လံပစ်ခတ်ရာအသက်လုပြေးလွှားကြရင်းတစ်တောင့်ထိုး သေနတ်တစ်လက်၊ဖုန်း၂လုံး၊ဘက်ထရီအိုး၂လုံး၊ဝိုင်ယာကြိုးခွေ စသည်တို့ ကျကျန်ခဲ့ပြီးမိမိတို့ရဲဘော်များမှာဘေးကင်းခဲ့သည်ဟု မဟာမိတ်အဖွဲ့များက ပြောသည်။
နံနက် ၁၁နာရီဝန်းကျင်ကလည်း စစ်ကိုင်းမြို့မှ မုံရွာသို့ ဦးတည်ထွက်ခွာလာသည့် ရိက္ခာတင်ကားအပါအဝင် အကြမ်းဖက်စစ်ကောင်စီ၏ ၁၂စီးပါယာဥ်တန်းအား စစ်ကိုင်းမြို့နယ် နုံးတွင်းရွာအနီးတွင်မိုင်းဆွဲတိုက်ခိုက်ခံရပြီး ၄စီးရပ်တန့်ကာ ၈စီး ဆက်လက်ထွက်ခွာသွားကြောင်း စစ်ကိုင်းမြို့နယ် သတင်းမှန်ပြန်ကြားရေးက ပြောသည်။
လမ်းပိုင်းများတွင် စောင့်ဆိုင်းနေကြသည့်မဟာမိတ်ရဲဘော်များအနေဖြင့်လည်း စစ်တပ်ကင်းပုန်းများ အချိန်မရွေးရောက်လာနိုင်သည်ဖြစ်၍အထူးသတိထားသင့်ကြောင်း CDSOM က ပြောသည်။
အမျိုးသမီးစစ်သည်တော်တပ်ရင်း (မြောင်) – M2W မှ ထုတ်လုပ်သော မိုင်းဖြင့်တိုက်ခိုက်ခဲ့ခြင်းဖြစ်သည်။ စစ်ဆင်ရေးများအား မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM)နှင့်အတူ ပြည်သူ့တပ်မတော်(မြောင်)MUA၊ စစ်ကိုင်းခရိုင် တပ်ရင်း ၁၊ ၂ တပ်ခွဲ(၃)၊ တူမီးဖိုက်တာ၊ Black Eagle Defense Force၊ Chaung U Revolution Army၊ Myinmu Civil Revolution Force စသည့် မဟာမိတ်အဖွဲ့များက ပူးပေါင်းဆောင်ရွက်ခဲ့ကြသည်။
မေလ ၁၄ ရက် နံနက်ပိုင်းကလည်း မုံရွာ-မန္တလေးလမ်းမတွင် ဖြတ်သန်းသွားလာနေသောအကြမ်းဖက်စစ်တပ်ယာဉ် ၁၀ စီးအား မဟာမိတ်အဖွဲ့များက ပဒေသာမိုင်းများဖြင့် တိုက်ခိုက်ခဲ့ရာ အကြမ်းဖက်စစ်သား ၁၅ ဦးထက်မနည်း သေဆုံးခဲ့သည်။
