စစ်ကိုင်းတိုင်း၊ ချင်းတွင်းမြစ်အနောက်ဘက်ကမ်း လူငယ်သပိတ်ခေါင်းဆောင် အဝင်းလေး အကြမ်းဖက်စစ်ကောင်စီတပ်၏ ဖမ်းဆီးမှုခံခဲ့ရကြောင်း စစ်အာဏာ ရှင်ဆန့်ကျင်ရေး မုံရွာလူထုသပိတ်တိုက်ပွဲဦးဆောင်ကော်မတီဝင် ကိုသန်းကျော်ဦးက ပြောသည်။
ချင်းတွင်းမြစ်အနောက်ဘက်ကမ်း လူငယ်သပိတ်ခေါင်းဆောင် ဝင်းမိုးဇော်(ခ)အဝင်းလေးသည် ဇူလိုင် ၂ရက်က ဘုတလင်မြို့နယ်နှင့် ဒီပဲယင်းမြို့နယ်ကြားရှိ ကတိုးရွာအနီးတွင် စစ်ကောင်စီတပ်၏ ကင်းပုန်းနှင့် ထိပ်တိုက်တိုးပြီး ဖမ်းဆီးခံခဲ့ရခြင်းဖြစ်ကြောင်း ကိုသန်းကျော်ဦးက အသိပေးသည်။
သပိတ်ခေါင်းဆောင်နှင့်အတူ ဒီပဲယင်းနယ်ခံ ၂ဦးလည်း ဖမ်းဆီးခံခဲ့ရပြီး ၎င်းတို့ကို ဘုတလင်မြို့နယ် ကူတော်ကျေးရွာရဲစခန်းတွင် ဖမ်းဆီးချုပ်နှောင်ပြီး နှိပ်စက်စစ်ဆေးမှုများ ပြုလုပ်ခဲ့သည်သိရကြောင်း ကိုသန်းကျော်ဦးက ပြောသည်။
သို့သော် ဇူလိုင် ၃ရက် ညပိုင်းတွင် သပိတ်ခေါင်းဆောင်နှင့်အတူ ဖမ်းဆီးခံထားရသူ၂ဦးသည် ထွက်ပြေးလွတ် မြောက်သွားခဲ့ကြောင်း ကိုသန်းကျော်ဦးက ပြောသည်။
“အဝင်းလေးရဲ့ ခန္ဓာကိုယ်အနေအထားအရ ထွက်ပြေးဖို့ကြိုးစားပေမယ့် မလွတ်မြောက်ခဲ့ဘူး။ မလွတ်မြောက်တဲ့အပြင် ထွက်ပြေးလို့ဆိုပြီး ပိုနှိပ်စက်ညှင်းပန်းမှုတွေလုပ်ခဲ့တယ်လို့ ထပ်မံထွက်ပြေးလာတဲ့သူတွေက ပြောပါတယ်။ အခုချိန်ထိအဝင်းလေးရဲ့သတင်း အသေးစိပ်ကိုတော့ စုံစမ်းလို့ မသိရှိရသေးပါဘူး။ ကြားရတဲ့သတင်းတွေရှိပေမယ့် အတည်ပြုလို့မရသေးသာကြောင့် မဟုတ်ပါစေနဲ့ပဲဆုတောင်းနေပါတယ်။”ဟု ကိုသန်းကျော်ဦးက ပြောသည်။
မုံရွာခရိုင်နှင့် ယင်းမာပင်ခရိုင်တို့တွင် အကြမ်းဖက်စစ်ကောင်စီတပ်အား လက်နက်ဖြင့်ခုခံတော်လှန်နေသည့်အပြင် စစ်အာဏာရှင်ဆန့်ကျင်ရေး မြေပြင်သပိတ်များလည်း ထွက်ပေါ်နေဆဲဖြစ်သည်။
