●သားအမိသုံးဦးအပါအဝင်ရွာသူရွာသား ၇ ဦး အသတ်ခံရ
ဂန့်ဂေါမြို့၊ ရေရှင်ရွာတွင် စစ်ကောင်စီတပ်က ကလေးနှစ်ယောက်မိခင်ကို အုပ်စုဖွဲ့ အဓမ္မပြုကျင့်ပြီး ကလေးနှစ်ဦးအပါအဝင် လူ၇ ဦးကို သတ်ဖြတ်ခဲ့သွားကြောင်း ဒေသခံများကပြောသည်။
ပျူစောထီးများပါဝင်သည့် အင်အား ၂၀၀ ခန့်ရှိသည့် စစ်ကောင်စီတပ်စစ်ကြောင်းသည် ယမန့်(ဇူလိုင် ၄ ရက်)က ဂန့်ဂေါမြို့နယ်၊ မြောက်ပိုင်းရှိ အိမ်ခြေ၄၀၀ ကျော်ရှိသောရေရှင်သို့ စစ်ကြောင်းထိုးဝင်ရောက်လာပြီးနောက်အကြမ်းဖက်ခဲ့ခြင်းဖြစ်သည်။
ပြည်သူအချို့ကိုဖမ်းဆီးပြီးသတ်ဖြတ်ပြီး အသက် ၂၂ နှစ်အရွယ်ကလေးနှစ်ယောက်မိခင်မသန္တာဦးကို ယမန်နေ့ညတွင်ဖမ်းဆီးပြီးအုပ်စုဖွဲ့ အဓ္ဓပြုကျင့်ကာ သားအမိသုံးဦးစလုံးကိုသတ်သွားခြင်းဖြစ်ကြောင်းဒေသခံအချို့ကပြောသည်။
သူမ၏သမီးငယ်နှစ်ဦးမှာ အသက် ၁ နှစ်ခွဲ နှင့်အသက် ၅ နှစ်အရွယ်သာရှိသေးပြီး ကလေးငယ်နှစ်ဦးကိုပါအကြမ်းဖက်စစ်ကောင်စီတပ်နှင့်ပျူများက သတ်ဖြတ်သွားကြောင်း ဒေသခံများကပြောသည်။ ၎င်းတို့သားအမိတစ်တွေအဖြစ်ဆိုးနှင့်ကြုံခဲ့သည်ကို ရွာခံများကမနက်ကြမှသိကြသည်ဟုဆိုသည်။
အသတ်ခံရသည့် ကလေးနှစ်ဦးကိုလိင်ပိုင်းဆိုင်ရာ ကျူးလွန်ခဲ့ခြင်းရှိဘ၊မရှိကို သိရှိရန် ဒေသခံပြည်သူ့ကာကွယ်ရေးတပ်များ နယ်မြေရှင်းလင်းဆောင်ရွက်နေဆဲဖြစ်သည်ဟုလည်းသိရသည်။
“အခုကာလက ထိတွေ့မှုဖြစ်နေဆဲဖြစ်လို့ အခြေအနေတွေကို သေချာမသိရသေးဘူး”ဟု အနောက်ပိုင်းတိုင်းစစ်ဌာနချုပ်၊ တပ်မဟာ ၇ ၊ တပ်ရင်း ၇၀၃ မှ ပြန်ကြားရေးတာဝန်ခံကပြောသည်။
ထိုအပြင် စစ်ကောင်စီတပ်နှင့်ပျူများသည် အသက် ၅၀ အရွယ် စိတ်မနှံသူတစ်ဦးအပါအဝင် ရွာသား ၄ ဦးကိုပါပစ်ခေတ်သတ်ဖြတ်သွားခဲ့သည်ဟု ဒေသခံများထံမှသိရသည်။
စစ်ကောင်စီတပ်က ရေရှင်ရွာအတွင်းမှ နေအိမ် ၅ လုံးကိုမီးရှို့ဖျက်ဆီးခဲ့ပြီး ကျေးရွာအတွင်းရှိ စာသင်ကျောင်းတွင်လည်း မိုင်းများထောင်ခဲ့သည်ဟု ဒေသခံများကပြောသည်။စစ်ကောင်စီစစ်ကြောင်းများသည်တစ်လလျှင်တစ်ကြိမ်ထိုဒေသရှိရွာများသို့စစ်ကြောင်းထိုးကာ စားနပ်ရိက္ခာများလုယက်၍ အကြမ်းဖက်လေ့ရှိပြီး ရေရှင်းရွာသို့ယခင်မလာဘူးဘဲ ရွာတွင် PDFများမရှိချိန်တွင် ဝင်ရောက်အကြမ်းဖက်သွားခြင်းဖြစ်ကြောင်းဒေသခံများကပြောသည်။
စစ်ကောင်စီတပ်နှင့်ပျူစောထီးအဖွဲ့များသည် ယခုအခါချောင်းခွရွာဘက်သို့ ဦးတည်သွားနေပြီး ရေရှင်ရွာနှင့် ချောင်ခွရွာကြားတွင် ဒေသခံပြည်သူ့ကာကွယ်ရေးတပ်များနှင့် တိုက်ပွဲအပြင်းအထန်ဖြစ်ပွားလျက်ရှိသည်။
