တောင်တရုတ်ပင်လယ်ထဲမှာ ကုန်တင် သင်္ဘောတစ်စီး ထက်ပိုင်းကျိုး နစ်မြုပ်သွားပြီး လူပေါင်း ဒါဇင်နဲ့ချီ ပျောက်ဆုံးနေကြောင်း သိရပါတယ်။
စက်မှုလုပ်ငန်းဆိုင်ရာ ထောက်ပံ့ရေး ကုန်သင်္ဘော တစ်စီး ဇူလိုင် ၂ ရက်က နစ်မြုပ်သွားခဲ့ပြီး ရေယာဉ် အမှုထမ်း ၂ ဒါဇင် ဝန်းကျင်လောက် ပျောက်ဆုံးနေတယ်လို့ ယုံကြည်ရကြောင်း ဟောင်ကောင် ကမ်းခြေစောင့် ကယ်ဆယ်ရေးအဖွဲ့က ပြောပါတယ်။ သင်္ဘောပေါ်မှာ အမှုထမ်း ၃၀ လောက် လိုက်ပါလာခဲ့ပြီး ညနေပိုင်းထိ အခြေအနေတွေအရ လူ ၃ ဦးထက် မနည်းကို ဘေးလွတ်ရာ ရွှေ့ပြောင်းပေးနိုင်ခဲ့ကြောင်း ကယ်ဆယ်ရေးတွေက ဆိုပါတယ်။
အာဏာပိုင်တွေက ကယ်ဆယ်ရေး ကဏ္ဍမှာ ပူးပေါင်း ဆောင်ရွက်ဖို့အတွက် ရဟတ်ယာဉ်တွေကိုလည်း စေလွှတ်ပေးခဲ့ပါတယ်။ ကယ်ဆယ်ရေးတွေ ထုတ်ပြန်တဲ့ ဓာတ်ပုံတစ်ပုံမှာတော့ သင်္ဘောသား တစ်ယောက်ကို ရဟတ်ယာဉ်ပေါ် ကြိုးသိုင်းပြီး ဆွဲတင်နေတာ တွေ့ခဲ့ရပါတယ်။
ဟောင်ကောင် တောင်ပိုင်း ကမ်းခြေကနေ ကီလိုမီတာ ၃၀၀ လောက်အကွာ ရေပြင်မှာ လှိုင်းထန်နေချိန် ရေယာဉ် နှစ်ပိုင်းကျိုးပြီး နစ်မြုပ်ခဲ့တာပါ။ ဘာကြောင့် အခုလို မတော်တဆမှုနဲ့ ကြုံခဲ့သလဲ ဆိုတာကိုတော့ ရှင်းရှင်းလင်းလင်း မသိရသေးပါဘူး။
ဟောင်ကောင် ကမ်းခြေစောင့် ကယ်ဆယ်ရေး အဖွဲ့က သင်္ဘောကို ပိုင်ဆိုင်တဲ့ နိုင်ငံနဲ့ သင်္ဘောသားတွေရဲ့ နာမည်တွေကိုတော့ မထုတ်ပြန်သေးပါဘူး။ လောလောဆယ် သင်္ဘော နစ်မြုပ်တဲ့ နေရာတဝိုက်မှာ အပူပိုင်းမုန်တိုင်း ချာဘာရဲ့ သက်ရောက်မှုကြောင့် ကယ်ဆယ်ရေး လုပ်ငန်းတွေ ဆောင်ရွက်ရာမှာ အခက်တွေ့နေပါတယ်။ မုန်တိုင်းနဲ့ ဆက်စပ်တဲ့ လေပြင်း တိုက်ခတ်မှုတွေဟာ တစ်နာရီကို ကီလိုမီတာ ၁၁၀ နှုန်းလောက်ထိ ပြင်းထန်ခဲ့ပါတယ်။
မုန်တိုင်းဟာ ဇူလိုင် ၂ ရက် ညပိုင်းမှာတော့ ဟောင်ကောင် ကမ်းရိုးတန်းက ဂွမ်ဒေါင်းဒေသကို ကုန်းတွင်းဝင်ရောက် တိုက်ခတ်ခဲ့ပါတယ်။ သင်္ဘော နစ်မြုပ်တဲ့ နေရာမှာ ကယ်ဆယ်ရေး ဆောင်ရွက်ဖို့အတွက် ဟောင်ကောင် အာဏာပိုင်တွေက လေယာဉ် ၂ စီးနဲ့ ရဟတ်ယာဉ် ၄ စီးကို စေလွှတ်ထားကြောင်း သိရပါတယ်။
