တော်လှန်ရေးတပ်ဖွဲ့ဝင် ၁၅၀နီးပါးကျဆုံးခဲ့ပြီး စစ်ကောင်စီလက်ချက်ကြောင့် ပြည်သူ ၂၅၀ကျော် အသက်ဆုံးရှုံးရ
အာဏာသိမ်းပြီးနောက် ကရင်နီဒေသ တိုက်ပွဲများအတွင်း စစ်ကောင်စီတပ်မှ သေဆုံးခဲ့သည့် တပ်ဖွဲ့ဝင် ၁၅၀၀ နီးပါးရှိလာကြောင်း တိုးတက်သောကရင်နီ ပြည်သူ့အင်အားစု(PKPF)က ထုတ်ပြန်သည်။
စစ်ကောင်စီတပ် အာဏာသိမ်းခဲ့သည့် ၂၀၂၁ ဖေဖော်ဝါရီ ၁ရက်မှ ယခုနှစ် ဇွန်လ ၃၁ရက်အထိ ကရင်နီပြည်ရှိ စစ်ရေး၊ နိုင်ငံရေးနှင့်လူ့အခွင့်အရေး အချိုးဖောက်ခံရမှုများနှင့်ပတ်သက်ပြီး PKPFက စုစည်းထားသည့် အချက်အလက်များကို ယနေ့ထုတ်ပြန်ခဲ့ခြင်းဖြစ်သည်။
ကရင်နီဒေသ၌ ၂၀၂၁ မေလ ၂၀ရက်မှစ၍ တိုက်ပွဲများ တောက်လျှောက်ဖြစ်ပွား ခဲ့ရာ တစ်နှစ်ခွဲ ကာလအတွင်း တိုက်ပွဲ ၃၉၀ကျော်ဖြစ်ခဲ့သည်ဟု ဆိုသည်။
အဆိုပါ တိုက်ပွဲများအတွင်း စစ်ကောင်စီတပ်က တပ်ဖွဲ့ဝင် ၁,၄၅၁ဦး သေဆုံးခဲ့ပြီး စစ်ကောင်စီ ယာဉ် ၅၄ စီး ပျက်စီးခဲ့သည်ဟု ဖော်ပြထားသည်။ တစ်ဖက်တွင်လည်း ပြည်သူ့ကာကွယ်ရေး တပ်ဖွဲ့ဝင်နှင့် လက်နက်ကိုင်တပ်ဖွဲ့ဝင် ၁၄၇ ဦးကျဆုံးခဲ့ရသည်ဟု ဆိုသည်။
တိုက်ပွဲများ၌ အထိနာခဲ့သည့် စစ်ကောင်စီတပ်သည် လေကြောင်းတိုက်ခိုက်မှု များ အကြိမ်ကြိမ် ပြုလုပ်ခဲ့ရာ စုစုပေါင်း လေကြောင်းတိုက်ခိုက်မှု ၁၅၇ကြိမ် ရှိခဲ့သည်ဟု PKPFက ထုတ်ပြန်သည်။
စစ်ကောင်စီတပ်သည် အရပ်သားများကိုလည်း ပစ်မှတ်ထား တိုက်ခိုက်ခဲ့ရာ စစ်ကောင်စီတပ်၏ လေကြောင်း တိုက်ခိုက်မှု၊ လက်နက်ကြီးပစ်ခတ်တိုက်ခိုက် မှုနှင့် ဖမ်းဆီးပစ်ခတ်သတ်ဖြတ်မှုများကြောင့် အရပ်သား ပြည်သူ ၂၅၅ဦး အသက်ဆုံးရှုံးခဲ့ရသည်ဟု ဆိုသည်။
တိုက်ပွဲများ ၊ စစ်ကောင်စီတပ်၏ ထိုးစစ်နှင့် လက်နက်ကြီးပစ်ခတ်မှုများကြောင့် ဒေသခံ သိန်းချီ စစ်ဘေးတိမ်းရှောင်ခဲ့ရပြီး စစ်ဘေးရှောင်နေစဉ် သေဆုံးသွားသောပြည်သူ ၃၈ဦး ရှိသည်။
စစ်ကောင်စီတပ်၏ လက်နက်ကြီး ပစ်ခတ်မှု၊ မီးရှို့ဖျက်ဆီးမှုများကြောင့် ဘာသာရေးအဆောက် အဦး (၂၃)လုံး နှင့် ပြည်သူလူထု နေအိမ် ၁,၁၀၀ ကျော် မီးလောင်ပျက်ဆီးခဲ့ရကြောင်း ထုတ်ပြန် သည်။
စစ်ကောင်စီတပ်က မတရား ဖမ်းဆီးခဲ့သူ ၂၆၀ဦး ရှိခဲ့ကြောင်းလည်း PKPFက အသိပေးထားသည်။
ကရင်နီဒေသ၌ လက်ရှိအချိန်ထိ စစ်ရေးပြင်းထန်နေပြီး စစ်ကောင်စီတပ်ကို ကရင်နီတပ်မတော် (KA)၊ ကရင်နီအမျိုးသားများကာကွယ်ရေးတပ်(KNDF)၊ ဒေသခံ ပြည်သူ့ကာကွယ်ရေးတပ် (PDF)များနှင့် တော်လှန်ရေးအင်အားစုများ ပူးပေါင်း၍ တိုက်ခိုက်လျက်ရှိသည်။
