‘စမှတ်’ရုပ်ရှင် ၅ရက်အတွင်း လက်မှတ်ရောင်းရငွေ ကျပ်သိန်းလေးထောင်ကျော်ရရှိ

‘စမှတ်‘ဇာတ်လမ်းတိုရုပ်ရှင်အတွက် ၅ ရက်အတွင်း လက်မှတ်ရောင်းရငွေ ကျပ်သိန်း လေးထောင်ကျော်ရရှိခဲ့ကြောင်း သရုပ်ဆောင် ချစ်သုဝေက အသိပေးထားသည်။

“စမှတ်” ရှိသမျှ​လေးနဲ့ဖြစ်​အောင်ဖန်တီးပုံ​ဖော်ကြတယ်။ရှိသမျှအား​တွေနဲ့ တလ​ငွေ ကိုရှာကြတယ် ။အခု ၅ရက်တာအတွင်း တလ​​ငွေ…သိန်း​ပေါင်း ၄၀၀၀ ရသွား​အောင် အကြိုpremium ticketဝယ်ယူအား​ပေးကြတဲ့ ပြည်သူ့အားကို အမှီလိုက်ဖို့ စ မှတ် team ၁ခုလုံး သူ့တာဝန်နဲ့သူ ​နေ့မနား ညမအိပ်ကြိုးစားခဲ့ကြတယ် “ဟု ချစ်သုဝေက ရေးသားထားသည်။

စမှတ်ဇာတ်ကားကို ဇာတ်ညွှန်း ၊ဒါရိုက်တာအဖြစ် အဆိုတော် လင်းလင်းက ဖန်တီးထားပြီး သရုပ် ဆောင် ဒေါင်း နှင့်ချစ်သုဝေ တို့ပါဝင်သရုပ်ဆောင်ထားသည်။

ယင်းဇာတ်ကားကို ကြိုတင်လက်မှတ်များရောင်းချ၍ ပထမဆုံးပွဲစဉ်အဖြစ် ဩဂုတ် ၈ရက် နံနက် ၈ နာရီတွင် ကြည့်ရှုနိုင်ရန် စီစဉ်ခဲ့ခြင်းဖြစ်သည်။

“premium ticket ပထမရုံတင်ရက် လက်မှတ်မရလိုက်သူ​တွေအားလုံးအတွက် ​ဝယ်ရတာ လွယ်ကူ​အောင်သေချာထပ်မံပြင်ဆင်ပြီး ပြန်လည်​ရောင်းချမယ့်ရက်ကို ​ကြေငြာ​ပေးသွားပါမယ်​နော်”ဟု ချစ်သုဝေက ထပ်မံအသိပေးထား သည်။

“လက်သီးဆုပ်ပြီး အဓိဌာန်သစ္စာပြုတဲ့ နောက်ဆုံးခန်းလေးက ရင်ထဲမှာ လှိုက်ပြီး ဝမ်းနည်းလွန်းလို့ အရမ်းငိုမိပါတယ်ရှင် ။ စကားလုံးလေးတွေက အားအင်တွေလည်း ဖြစ်လို့လည်း အဲ့နေရာလေးကို အကြိမ်ကြိမ်ပြန်ကြည့်မိပါတယ်”ဟု ပရိသတ်တစ်ဦးက ဇာတ်ကားနှင့်ပတ်သက်၍ မှတ်ချက်ပြုသည်။

ယင်းဇာတ်ကားကို ကြည့်ရှုလိုသူများသည် ‌မြန်မာကျပ် သုံးသောင်းဖြင့် ရုပ်ရှင်လက်မှတ်ဝယ်ယူရမည်ဖြစ်ပြီး ၎င်းတို့သတ်မှတ်ထားသည့် ရက်တွင် ပေးထားသည့် လင့်ခ်၌ ကြည့်ရှုနိုင်မည်ဖြစ်သည်။

တော်လှန်ရေး ရန်ပုံငွေရရှိရန် လက်မှတ်ရောင်း၍ ပြသခြင်းဖြစ်သောကြောင့် ဇာတ်ကားပြသပြီးချိန်၌ အွန်လိုင်းပေါ်တွင် ပြန့်နှံ့ခြင်းမရှိစေရန် လင်းလင်းက ကြိုတင်မေတ္တာရပ်ခံခဲ့သည်။