ဂျပန်ဘာသာအရည်အချင်းစစ်စာမေးပွဲ (JLPT) N4 Level အတွက် လျှောက်လွှာတွေကို ဒီနေ့ မနက်ပိုင်းက ရန်ကုန်မှာစတင်ရောင်းချရာ လာရောက်ဝယ်ယူသူများတာကြောင့် လျှောက်လွှာရောင်းချတာကို ရပ်ဆိုင်းလိုက်ရတယ်လို့ JLPT စာမေးပွဲကျင်းပရေးကော်မတီ ထုတ်ပြန်လာပါတယ်။
ရန်ကုန်ပညာရေးတက္ကသိုလ် မှာ လျှောက်လွှာရောင်းချပေးတာဖြစ်ပြီး ဒီနေ့မနက် ၅ နာရီ လောက်မှာ လာရောက်တန်းစီသူ ဦးရေ ငါးထောင်လောက်ရှိလာကာ လူစုလူဝေး ဖြစ်လာ လို့ လျှောက်လွှာရောင်းတာကို ရပ်ဆိုင်းလိုက်ရတယ်လို့ စာမေးပွဲကျင်းပရေးကော်မတီက ဆိုထားပါတယ်။
လျှောက်လွှာတွေကို အွန်လိုင်းစနစ်နဲ့သာ လက်ခံသွားတော့မှာဖြစ်ပြီး အသေးစိတ်ကို ထပ်မံကြေညာမယ်လို့လည်း ဒီနေ့မနက်ပိုင်း အသိပေးထားတာတွေ့ရပါတယ်။
ဒီနှစ်အတွက် JLPT စာမေးပွဲကို ရန်ကုန်နဲ့မန္တလေးမှာ လာမယ့်ဒီဇင်ဘာလအတွင်း ကျင်းပမှာဖြစ်ပါတယ်။
JLPT စာမေးပွဲဟာ ဂျပန်နိုင်ငံကိုသွားရောက်အလုပ်လုပ်ကိုင်မယ့် လူငယ်တွေအတွက် အရေးကြီးပြီး အနိမ့်ဆုံး N4 အောင်ထားရင် သွားရောက်အလုပ်လုပ်ကိုင်လို့ရတဲ့အခြေအနေရှိနေတာပါ။
“စာမေးပွဲအောင်ထားရင် အလုပ်အကိုအခွင့်အလမ်းကောင်းတာကိုး။ N4 အောင်တာနဲ့သွားရင်ကို မြန်မာငွေ သိန်း ၂၀ လောက်ရကြတယ်။ နောက်ပိုင်း Work Visa ဖြစ်သွားရင် တစ်လ သိန်း ၃၀ လောက်ရတယ်” လို့ ဂျပန်စာသင်ကြားနေတယ် ဆရာမတစ်ဦးက ပြောပါတယ်။
ဂျပန်ဘက်ကအလုပ်ခေါ်စာတော်တော်များများမှာလည်း JLPT ကိုပဲဦးစားပေးတောင်းနေတာမို့ လူငယ်တွေ အခုလိုဒုက္ခခံဖြေဆိုနေကြတာလည်းဖြစ်တယ်လို့ ဆရာမက ပြောပါတယ်။
ဒါကြောင့်ဒီနေ့ N4 Level အတွက် ရန်ကုန်ပညာရေးတက္ကသိုလ်မှာ လျှောက်လွှာတွေ စတင်ရောင်းချရာ တန်းစီးဝယ်ယူသူများပြားပြီး ရုတ်ရင်းဆန်ခတ်ဖြစ်ခဲ့တယ်လို့သိရပါတယ်။
လျှောက်လွှာကို မနက် ၉ နာရီမှာစတင်ရောင်းချမှာဖြစ်ပြီး ညမထွက်ရအမိန့်ကို စစ်ကောင်စီက ထုတ်ထားပေမယ့် မနက် ၂ နာရီလောက်ကပြီး လျှောက်လွှာရဖို့အတွက် မိုးရေထဲမှာ လူငယ်တွေဟာ ပြေးလွှာတန်းစီနေခဲ့ကြပါတယ်။
လူငယ်တွေ အများအပြားတန်းစီနေကြတာကို ရိုက်ကူးထားတဲ့ ရုပ်သံဖိုင်အချို့လည်း လူမှုကွန်ရက်မှာ ပျံ့နှံနေပါတယ်။
မိုးထဲရေထဲ နာရီနဲ့ချီပြီးတန်စီးခဲ့ကြပေမယ့် လူစုလူဝေးဖြစ်လာလို့ဆိုပြီး မနက် ၆ နာရီလောက်မှာ စာမေးပွဲကျင်းပရေးကော်မတီက လျှောက်လွှာတွေကို အွန်လိုင်းကပဲရောင်းချတော့မယ်လို့ ရုတ်တရက် ထ ကြေညာခဲ့တာပါ။
တညလုံးနီးပါးတန်စီခဲ့ပြီး မနက်ရောက်မှ လျှောက်လွှာမရောင်းတော့ဘူးဆိုတဲ့ အခြေအနေကို ကြုံခဲ့ရအတွက် စာမေးပွဲကျင်းပရေးကော်မတီကို ဝေဖန်ပြစ်တင်တာတွေရှိနေပါတယ်။
JLPT စာမေးပွဲဟာ နှစ်စဉ် ဖြေဆိုသူများပြားလေ့ရှိတာကြောင့် အတွေ့အကြုံရှိထားတဲ့ စာမေးပွဲကျင်းပရေးကော်မတီဟာ ဒီနှစ်အတွက် စီစဉ်မှုအင်မတန် ညံဖျင်းတယ်လို့ လူမှုကွန်ရက်မှာ ပြင်းပြင်းထန်ထန်ဝေဖန်တာမျိုးလည်းရှိလာပါတယ်။
JLPT အတွက် လျှောက်လွှာကြေးဟာ တစ်စောင်ကို သုံးထောင်ကျပ်ကျသင့်မှာဖြစ်ပြီး စာမေးပွဲကြေးကတော့ N 1 ကနေ N3 အထိလေးသောင်းကျပ်ဖြစ်ကာ N4 နဲ့ N5 က သုံးသောင်းခွဲကျပ် ပေးသွင်းရမှာဖြစ်ပါတယ်။
ရန်ကုန်အတွက် N4 လျှောက်လွှာအစောင်ရေ ၁၉၄၉၈ စောင်ကို သြဂုတ်လ ၅ ရက်နေ သြဂုတ်လ ၁၀ ရက်အထိ ရောင်းချပေးမှာဖြစ်တယ်လို့စာမေးပွဲကျင်းပရေးကော်မတီက ကြေညာထားပါတယ်။
မြန်မာနိုင်ငံမှာ စစ်တပ်အာဏာသိမ်းပြီးနောက် အလုပ်အကိုင်အခွင့်အလမ်း ရှားပါးသွားတာကြောင့် လူငယ်လူရွယ်တွေဟာ အိမ်နီးချင်းထိုင်းနိုင်ငံအပါအဝင် ပြည်ပနိုင်ငံတွေကိုသွားရောက်အလုပ်လုပ်ကိုင်ကြတော့ပါတယ်။
ဂျပန်နိုင်ငံကိုတော့ အသက် ၃၀ အောက် လူငယ်တွေအများဆုံးသွားရောက်လုပ်ကိုင်ကြပါတယ်။
ပြည်ပအလုပ်အကိုင်ဝန်ဆောင်မှုလုပ်ငန်းရှင်များအဖွဲ့ချုပ်ရဲ့စာရင်းအရ ဒီနှစ်မတ်လကနေ မေလအထိ သုံးလတာကာလအတွင်း ဂျပန်ကိုထွက်ခွာသွားတဲ့ မြန်မာလုပ်သားဟာ ငါးထောင်ကျော်ရှိတယ်လို့သိရပါတယ်။
