Scorpio/People’s Spring
ဧပြီလဆန်းလေပြီ။မကြာခင်သင်္ကြန်ကာလရောက်တော့မည်မို့ ရပ်ဝေးက သားတွေသမီးတွေ အလုပ်တွေနားလို့ မိဘအိမ် ပြန်လာကြလေပြီ။ ဖားကန့်မြို့နယ်၊ကျေးရွာတစ်ရွာက ဒေါ်စိုး(အမည်လွှဲ)တစ်ယောက်လည်း သူ့သားလေး ပြန်အလာကို မျှော်လေပြီ။
ဒေါ်စိုးသားကလေးက ရပ်ဝေးမှာ အလုပ်လုပ်နေတာတော့ မဟုတ်ပါ။ အာဏာသိမ်းစစ်တပ်ကို ဆန့်ကျင်ဖို့ PDF တပ်ဖွဲ့ထဲ ဝင်သွားခဲ့ခြင်းဖြစ်သည်။ စစ်တပ်က လက်နက်ကိုင်အနိုင်ကျင့်လာသောကြောင့် လက်နက်ဖြင့် ခုခံဖို့ကလွဲ၍ တခြားနည်းလမ်းမရှိတော့သဖြင့် ဒီနည်းလမ်းကို သားကလေးတို့လိုလူငယ်တွေရွေးချယ်လိုက်ကြရတာဖြစ်သည်။
ဒေါ်စိုး သားကလေးနှင့် ဖုန်းပြောခွင့်ရတိုင်းလည်း သားကို အဆင်ပြေရဲ့လားမေးသည်။ သားက အဆင်ပြေတယ်ချည့်။သားကလေးက တစ်ခုတော့ ပြောရှာသည်။ “ အမေ သား မုန့်စားချင်တယ်” တဲ့။ ဒေါ်စိုး ပြေးပြီးတောင် သွားကျွေးချင်မိခဲ့သည်။
Public Service Announcement
တချို့တွေ အိမ်ခဏ ပြန်ခွင့်ရတာမျိုးတွေကြားရတော့ ဒေါ်စိုးလည်း သားလေးကို ခဏပြန်လာပါလားပြောမိသည်။ “ သူများတွေကို အားနာတယ်အမေ” တဲ့။ သိတတ်လွန်းတဲ့သားကလေး။ တာဝန်ကျေချင်တဲ့သားလေး။ ဘဝတူ ရဲဘော်တွေကို အားနာတယ်တဲ့လား။
ဒီနေ့တော့ ဒေါ်စိုးအိမ်ကလေးဆီ သားလေး ပြန်ရောက်လာခဲ့ပါပြီ။ သားကလေး ပိန်သွားလိုက်တာ။ အသားတွေလည်း မည်းသွားလိုက်တာ။ သို့သော် သားကလေးက ဒေါ်စိုးကို စကားထမပြောနိုင်တော့။ သားရဲ့ခန္ဓာကိုယ်က အေးစက်တောင့်တင်းနေခဲ့ပြီ။
ဆံသားတွေဆွတ်ဆွတ်ဖြူနေပြီဖြစ်သည့် ဒေါ်စိုးတစ်ယောက်သားရုပ်အလောင်းကိုကြည့်ကာ မျက်ရည်တွေကျသည်။ ဒေါ်စိုး သားပြန်ရောက်မှာကို မျှော်နေတာ ကြာလေလှပြီ။ သားကလေး ပြန်လာလို့ ကျိုးပဲ့လာခဲ့ရင်တောင်ရှာကျွေးဖို့ဒေါ်စိုး စိတ်ကူးထားခဲ့တာဖြစ်သည်။ယခုတော့ သားက အသက်တောင် ပါမလာတော့။ သားလေးကို အမေက ဒီလိုမြင်ရမယ်လို့ ဒေါ်စိုး မထင်ခဲ့မိ။
ဒေါ်စိုး သားပြန်အလာကို အိမ်ဝကနေ အမြဲစောင့်ကြိုနေခဲ့တာ။ သားကြိုက်မယ့်မုန့်တွေဝယ်ထားရင်း သားလာမယ့်ရက်ကို မျှော်နေခဲ့မိတာ။ “ အမေ့မှာမျှော်လိုက်ရတာ ကြာလှပြီ” တဲ့။
“ မုန့်စားချင်တယ်ဆို အမေမုန့်တွေစီစဥ်ထားတယ် ငါ့သားရယ်။ စားပါဦးတော့လား။ အမေကျွေးချင်လိုက်တာ။အမေကျွေးချင်လွန်းလို့မျှော်နေတာ”
တဲ့။
ဒေါ်စိုး သားလေးရဲ့နှုတ်ဆက်သံကို ကြားချင်မိသည်။အခုသားက ဒေါ်စိုးကို နှုတ်တောင်ဆက်မသွား။
“ သားရေ အငယ် အငယ် အမေ့ကို နှုတ်မဆက်တော့ဘူးလား အမေ့ကို နှုတ်ဆက်ပါဦး” ဒေါ်စိုးအော်ကာဟစ်ကာ သားကိုပြောပါသည်။ သို့သော် သားကတော့ ဒေါ်စိုးကို နှုတ်မဆက်ဘဲ ထွက်ခွာသွားခဲ့ပြီဖြစ်သည်။
ရက်ပိုင်းအတွင်း သင်္ကြန်ကျတော့မည်။ ဒေါ်စိုးလိုပဲ တော်လှန်ရဲဘော်တွေရဲ့မိခင်တွေလည်း ကိုယ့်သား ကိုယ့်သမီးလေးတွေကို မျှော်ရှာနေမည်မှာ သေချာလှပါသည်။
