ပြည်တွင်း ပြည်ပ ခရီးသွားတွေကြား ထင်ရှားတဲ့ အင်လေးဒေသမှာ ပြီးခဲ့တဲ့ ရက်ပိုင်းက တိုက်ပွဲတွေဖြစ်ပွားပြီးနောက် ဒေသတွင်းက ခရီးသွားနေရာအချို့နေရာကိုပိတ်ထားတယ်လို့ စုံစမ်းသိရပါတယ်။
ရှေးဟောင်းစေတီတွေရှိပြီး နိုင်ငံခြားသားခရီးသွားတွေ သွားလေ့ရှိတဲ့ ရွှေအင်းတိန်ဒေသဆီကို ပို့ဆောင်ပေးတဲ့ ဝန်ဆောင်မှုတွေကို ရပ်နားထားရတယ်လို့ အင်းလေးဒေသက စက်လှေသမားတစ်ဦးကပြောပြပါတယ်။
ပြီးခဲ့တဲ့ အင်္ဂါနေ့( ဇန်နဝါရီလ ၃ ) ရက်က စစ်ကောင်စီတပ်နဲ့အင်းလေး PDF တပ်ဖွဲ့တွေဟာ အင်းလေးဒေသ အနောက်ဘက်ခြမ်းမှာ တိုက်ပွဲတွေဖြစ်ခဲ့ပါတယ်။
စစ်ကောင်စီဘက်ကတော့ PDF တွေရဲ့ စခန်းကိုသွားတိုက်တာလို့ဆိုထားပြီး တိုက်ပွဲမှာ PDF ခေါင်းဆောင်ကို အသေမိတယ်လို့ သတင်းထုတ်ထားပါတယ်။
ဒါအပြင် အင်းတိန်ကျေးရွာ ၊အင်းတိန်ညောင်အုပ်ကျောင်းတိုက် ရဲ့ကျောင်းထိုင်ဆရာတော် ဥူးဇဝန ကို ပါ စစ်ကောင်စီက ဖမ်းဆီးသွားပါတယ်။
ရှမ်းပြည်နယ်တောင်ပိုင်း PDF အဖွဲ့ခေါင်းဆောင် ဆရာကျောင်းခေါ် ကိုဇော်ဇော်အောင်အပါအဝင် PDF နဲ့ဆက်နွယ်သူတွေကို ဖမ်းမိထားတယ်လို့ လည်း စစ်ကောင်စီက သတင်းထုတ်ပြန်ထားတာတွေ့ရပါတယ်။
စစ်ကောင်စီထိန်းချုပ်ထားတဲ့ ရှမ်းပြည် တောင်ပိုင်း အင်းလေးဒေသမှာ ဒီနှစ် ဆန်းပိုင်း မှာတင် ပထမဆုံး အကြိမ် အဖြစ် တိုက်ပွဲတွေ ဖြစ်လာတာဖြစ်ပြီး စစ်ကောင်စီကလည်းနှိမ်နင်းဖို့ ကြိုးပမ်းနေတာပါ။
စစ်ကောင်စီနဲ့တိုက်ပွဲဖြစ်ခဲ့တဲ့ အင်းလေးဒေသပြည်သူ့ကာကွယ်ရေးတပ်ဖွဲ့(IPDF) ကို NUG ကာကွယ်ရေးဝန်ကြီးဌာနရဲ့လက်အောက်ခံအဖြစ် ပြီးခဲ့တဲ့ နှစ် ဆန်းပိုင်းက စတင်ဖွဲ့စည်းခဲ့တာဖြစ်ပါတယ်။
