အိန္ဒိယ နိုင်ငံက မြို့တစ်မြို့မှာ ဆက်တိုက် မြေကျွံမှုတွေကြောင့် ရာနဲ့ချီ များပြားတဲ့ မြို့ခံတွေ အရေးပေါ် စတင် ပြောင်းရွှေ့နေရပါတယ်။
ဟိမဝန္တာ တောင်စဉ် တောင်တန်းတွေနဲ့ ဆက်စပ်နေတဲ့ အတ်ရက်ခန်း ပြည်နယ်က ဂျိုရှီမက်သ် မြို့ထဲမှာ အခု သီတင်းပတ်ကစလို့ မြေကျွံကျမှုတွေ ဖြစ်ပေါ်လာတာလို့ အာဏာပိုင်တွေက ဇန်နဝါရီ ၇ ရက်မှာ ပြောပါတယ်။ မြို့ရဲ့ နေရာအနှံ့မှာ မြေပပ်ကြားအက်တွေ ပေါ်လာပြီး ဘုရားကျောင်း တစ်ခုလည်း ပြိုကျသွားတာကြောင့် မြို့ခံ တော်တော်များများကို နေအိမ်တွေကနေ စွန့်ခွာပြီး ယာယီ ရွက်ဖျင်တဲတွေမှာ သွားနေဖို့ ညွှန်ကြားထားရပါတယ်။
တောင်ပေါ်ဒေသ ဆိုပေမယ့်လည်း ဂျိုရှီမက်သ်ဟာ ၂၀၂၁ ခုနှစ်တုန်းက ရေလွှမ်းမိုးမှုတွေ ခံခဲ့ရဖူးပါတယ်။ အဲဒီတုန်းက ရေလွှမ်းခဲ့တဲ့ နေရာတွေမှာ မြေကျွံမှုတွေ အဓိက ဖြစ်နေတယ်လို့ ဆိုပါတယ်။ လောလောဆယ်တော့ မြို့ထဲမှာ ဆောက်လုပ်ရေး လုပ်ငန်းအားလုံးကိုလည်း ရပ်ဆိုင်းထားစေရပါတယ်။
မြေကျွံမှုတွေကြောင့် ထိခိုက်ဒဏ်ရာရသူ မရှိပေမယ့် အခြေအနေတွေ ပိုဆိုးသွားမှာကို တာဝန်ရှိသူတွေက စိုးရိမ်နေပါတယ်။ နောက်ပြီး မိသားစု ၆၀ လောက်ကို အစိုးရ စီစဉ်ပေးတဲ့ ခိုလှုံရေး စခန်းတွေဆီ ရွှေ့ပြောင်းပေးထားပေမယ့် အဲဒီ ကိန်းဂဏန်းဟာ ၆၀၀ လောက်ထိ မြင့်တက်လာနိုင်တယ်လို့ သတင်းတွေက ဖော်ပြပါတယ်။
ဒေသဆိုင်ရာ သဘာဝ ဘေးအန္တရာယ် လျှော့ချရေး စီမံခန့်ခွဲမှု အရာရှိ တစ်ဦးက အခုလိုတွေ ဖြစ်လာတာဟာ မြို့ရဲ့ ရေဆင်းစနစ် တည်ဆောက်မှုတွေမှာ ချွတ်ယွင်းချက် ဖြစ်ရာက ရေတွေစိမ့်ထွက်ပြီး အိမ်တွေရဲ့ အောက်ခြေက မြေသားတွေကို လှိုက်စားကုန်တာကြောင့်လို့ ယူဆရကြောင်း ပြောပါတယ်။
လတ်တလော အိမ်ခြေရာမဲ့ ဖြစ်သွားသူတွေကို အစိုးရက လစဉ် ရူပီးငွေ ၄၀၀၀ (ဒေါ်လာ ၅၀ ဝန်းကျင်)ထိ ၆ လတိုင်တိုင် ထောက်ပံ့သွားမယ်လို့လည်း ဆိုပါတယ်။ ဂျိုရှီမက်သ်ဟာ အထင်ကရ ဟိန္ဒူနဲ့ ရှိတ်ခ် ဘုရားကျောင်းတွေ တည်ရှိပြီး ဘုရားဖူး ခရီးသည် အများအပြား သွားရောက်လေ့ရှိတဲ့ နေရာတစ်ခုပါ။ ပင်လယ်ရေမျက်နှာပြင်အထက် ပေပေါင်း ၆၂၀၀ လောက်မြင့်တဲ့ မြို့လေးမှာ ဒေသခံ ၂၅၀၀၀ ဝန်းကျင်လောက် နေထိုင်ကြောင်းလည်း သိရပါတယ်။
