မန္တလေးမြို့မှ အလွတ်တန်းသတင်းထောက်တစ်ဦးကိုစစ်ကောင်စီက ဖမ်းဆီးသွားကြောင်း ဖမ်းဆီးခံရသူ၏မိတ်ဆွေအချို့ကပြောသည်။
ဖားကန့် ဒေသသတင်းများကို ရေးလေ့ရှိသည့် အလွတ်တန်းသတင်းထောက် ကိုဇော်မိုးထက်အား စစ်ကောင်စီတပ်က ယမန်နေ့(ဇန်နဝါရီ ၉ရက်) ညနေတွင် မန္တလေးမြို့တနေရာ၌ ဖမ်းဆီးသွားခြင်းဖြစ်ကြောင်းသိရသည်။
“ကိုဇော်မိုးထက်ကိုဖမ်းပြီး သူ့အိမ်ကိုဝင်မွှေသွားတယ်လို့ကြားတယ်။နောက်ထပ်ဘာမှမသိရသေးဘူး”ဟုဖားကန့်မြို့ခံတစ်ဦးကပြောသည်။
စစ်ကောင်စီတပ်ကဖမ်းဆီးသွားသည်ဟုသောသတင်းမှလွဲ၍ အခြားအသေးစိတ်အခြေအနေကိုမသိရသေးပေ။
ကိုဇော်မိုးထက်သည် အဖမ်းမခံရခင်ဇန်နဝါရီလ ၈ရက်က”ဝိသမလောဘသားများနှင့်ပိုင်ရှင်မဲ့အလောင်းတွေပေါသည့် ဖားကန့်” ဟူသော ဆောင်းပါးတစ်ပုဒ်ကိုဖေစ်ဘွတ်ခ်လူမှုကွန်ရက်ပေါ်တင်ခဲ့သည်။ ဖားကန့်ဒေသကျောက်စိမ်းတူးဖော်မှုများ၊ မြေပြိုမှုများနှင့်ပတ်သက်၍ ရေးထားသော အဆိုပါဆောင်းပါးတွင်စစ်ကောင်စီကိုဝေဖန်ထားသည့်အချက်များမပါဝင်ဘဲ အမျိုးသားဒီမိုကရေစီအဖွဲ့ချုပ်အစိုးရလက်ထက်က ဖြစ်ရပ်များကို အများဆုံးဝေဖန်ထားသည်ကိုတွေ့ရသည်။
အာဏာသိမ်းစစ်ကာင်စီလက်ထက်တွင် သတင်းထောက်များဖမ်းဆီးထောင်ချခံရမှုများပြားနေပြီး သတင်းထောက်များထောင်ချခံရမှုတွင်ကမ္ဘာပေါ်တွင် တရုတ်ပြီးလျှင်ဒုတိယအများဆုံးဖြစ်ကြောင်း ပြင်သစ်အခြေစိုက် နယ်စည်းမခြားသတင်းထောက်များအဖွဲ့(RSF) ထုတ်ပြန်ထားသည်။
