နေအိမ်၆၀၀ ကျော်အတွက် ပူးပေါင်းပါဝင်လှူဒါန်းပေးရန် မေတ္တာရပ်ခံ
စစ်ကိုင်းတိုင်းအတွင်းရှိ စစ်ကောင်စီတပ်မီးရှို့ဖျက်ဆီးသွားသည့် နေအိမ်ပိုင်ရှင်များအတွက် နေအိမ်အလုံးတစ်ထောင် ပြန်လည်တည်ဆောက် လှူဒါန်းပေးနေကြောင်း S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့က ပြောသည်။
စစ်ကိုင်းတိုင်းအတွင်းရှိ မီးဘေးသင့်ပြည်သူများ နေထိုင်ရန် အိမ်အလုံး တစ်ထောင် တည်ဆောက် နေပြီး ယခုအချိန်ထိ အိမ်အလုံးပေါင်း ၃၀၀ကျော်ဆောက်လုပ်လှူဒါန်းထားပြီးဖြစ်ကြောင်း S&C အဖွဲ့က ပြောသည်။
“စစ်ကိုင်းအတွင်း ဘယ်နေရာမဆိုလက်လှမ်းမှီသလောက်ကူညီပေးနေပါတယ်ဗျ။ နေရာဒေသသက်မှတ်ထားတာမျိုးတွေမရှိပါဘူး။ အိမ်တစ်လုံးစာလုံးလှူမယ်ဆိုရင် နှစ်သိန်းသုံးသောင်းကျပ်ပါ။အခြားပြောချင်တာကတော့ ပြည်သူတွေနဲ့ပူးပေါင်းပါဝင်ပေးဖို့ပြောချင်ပါတယ်။”ဟု S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ အဖွဲ့ဝင်တစ်ဦးက ပြောသည်။
S&C ထံသို့ ဆက်သွယ်အကူညီတောင်းခံလာသောမီးဘေးသင့် ကျေးရွာပေါင်း ၆၀ ကျော် အိမ်ထောင်စုအားဖြင့် ၂၈၆၀ ရှိကြောင်း၊ ကျန်ရှိနေသော အိမ်ထောင်စု ၆၀၀ ကျော်အတွက် ပါဝင်ပေးကြပါရန်လည်း မေတ္တာရပ်ခံထားသည်။
မီးဘေးသင့် ကျေးရွာပေါင်း ၃၀ကျော်ရှိ အိမ်ထောင်စု ၁,၂၀၀ကျော်အတွက် ဆေးဝါး၊စောင်၊ခြင်ထောင်၊ အစားအစာများ ပေးအပ်ရန်စီစဥ်ထားပြီး လက်တလော အိမ်ထောင်စု ၅၀၀ ကျော်အတွက် ရရှိထားကြောင်း၊ မြေပြင်သို့ တိုက်ရိုက်ပို့ဆောင်လျက်ရှိကြောင်း S&C အဖွဲ့က ပြောသည်။
S&C အဖွဲ့အစီအစဥ်ဖြင့် ယခုချိန်ထိစာသင်ကျောင်းပေါင်း (၈)ကျောင်း ဖွင့်လှစ်ပေးနိုင်ခဲ့ပြီး ထပ်မံ၍ ၁၂ကျောင်း တိုးချဲ့ဖွင့်လှစ်ရန်စီစဥ်နေကြောင်း S&C အဖွဲ့က ပြောသည်။
