CNAနှင့် CDF ဇိုတုန် ရဲဘော်အချို့ကျဆုံး၊ဒဏ်ရာရ
ချင်းပြည်နယ် မတူပီနှင့် ဟားခါးမြို့နယ်အကြားလမ်းတလျှောက်၌ တိုက်ပွဲများဖြစ်ပွားခဲ့ရာ စစ်ကောင်စီတပ်မှ ၂၅ဦးခန့် သေဆုံးခဲ့ကြောင်း ချင်းအမျိုးသားတပ်မတော်(CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
ဇန်နဝါရီ ၂၀ ရက်နောက်ပိုင်းမှစ၍ အဆိုပါ ဒေသ၌ တိုက်ပွဲများဖြစ်ပွားလျက်ရှိရာ ယမန်နေ့အထိ တိုက်ပွဲဆက်ဖြစ်ခဲ့သည်ဟုဆိုသည်။
“မတူပီ ဇိုတုန်နယ်ဆိုတာ မတူပီနဲ့ ဟားခါးမြို့အကြား ကားလမ်းတလျှောက် အဲဒီမှာရေဇွာတပ်စခန်းဆိုတာရှိပါတယ်။ အဲဒီ ဂွင်ထဲမှာ စစ်ကောင်စီဘက်က အင်အား ၁၀၀ကျော်လောက်နဲ့ CAN၊ ကာကွယ်ရေးလက်နက်ကိုင်တပ်ဖွဲ့တွေ တိုက်ပွဲဖြစ်နေပါတယ်။ဇန်နဝါရီ ၂၀နောက်ပိုင်းဖြစ်ခဲ့တာ အခုထိပေါ့။ ကျွန်တော်တို့ဘက်က ချင်းအမျိုးသားတပ်မတော်က တစ်ဦး တိုက်ပွဲမှာ ကျသွားတယ်။ပြီးတော့ တစ်ဦး ဒဏ်ရာရသွားတယ်။ ဇိုတုန်ကာကွယ်ရေးတပ်ဖွဲ့ဘက်က တစ်ဦးကျသွားတယ်။ သူတို့ဘက်ကတော့ မြေပြင်သတင်းအရဆိုရင် ၂၅နဲ့ ၃၀ လောက်ပေါ့”ဟု ဆလိုင်းထက်နီက ပြောသည်။
အဆိုပါ ဇိုတုန်နယ်တွင် ယမန်နေ့ ဖေဖော်ဝါရီ ၉ရက်က ဖြစ်ခဲ့သည့် တိုက်ပွဲတွင် စစ်ကောင်စီတပ်မှ ၁၀ဦးခန့် သေဆုံးခဲ့ပြီး CNAမှ တပ်ကြပ်တစ်ဦး ကျဆုံးခဲ့ကြောင်း မြေပြင်သတင်းရင်းမြစ်ကို ကိုးကားပြီး The Chin Journalက ဖော်ပြသည်။
ကျဆုံးတပ်ကြပ်သည် စစ်ကောင်စီတပ်သားများ၏ လက်နက်လိုက်ကောက်ချိန် ကျည်ထိမှန်ခဲ့ခြင်းဖြစ်ကြောင်း၊ စစ်ကောင်စီတပ်မှ လက်နက် ၂လက်ကိုလည်း တော်လှန်ရေး ပူးပေါင်းတပ်ဖွဲ့က သိမ်းဆည်းနိုင်ခဲ့ကြောင်း ဖော်ပြထားသည်။
