Super Bowl 2023 ရှိုးပွဲတွင် မြန်မာပြည်ထွက် ပတ္တမြားလက်စွပ်ကို ဝတ်ဆင်ခဲ့သည့် အဆိုတော် ရီဟားနားကို မြန်မာပြည်သူများနှင့်အတူ ရပ်တည်ပြီး စစ်ကောင်စီဝင်ငွေရသည့် ကျောက်မျက်များပိတ်ဆို့မှုကို အားပေးထောက်ခံရန်Justice For Myanmarက တောင်းဆိုလိုက်သည်။
အဆိုတော် ရီဟားနားသည် Super Bowl 2023 အချိန်ပိုင်းရှိးပွဲတွင်သီချင်းသီဆိုကပြဖျော်ဖြေစဥ် မြန်မာပြည်ထွက်ပတ္တမြားလက်စွပ်တစ်ကွင်းကို ဝင်ဆင်ခဲ့ခြင်းဖြစ်သည်။
ထိုလက်စွပ်ကို နယူးယောက်မြိုတော်အခြေစိုက် Bayco Jewels ကုမ္ပဏီကပြုလုပ်ခြင်းဖြစ်ပြီး အမေရိကန်ဒေါ်လာ ၁ သန်း တန်ဖိုးရှိသည်။ ထိုလက်စွပ်သည် အပူမပေးမီ ၁၉ ဒသမ ၄၇ ကာရက်ရှိ ရှားပါးတွင်းထွက် သကြားလုံးပုံဖြတ် မြန်မာ့ပတ္တမြားနှင့် ပလက်တီနမ်တွင် တွဲစပ်ထားသည့် ၅ ဒသမ ၆ ကာရက်ရှိ တြိဂံပုံ အရောင်မဲ့ အနားလုံးစိန်၊ ၁၈ ကာရက် ရွေဝါများနှင့်ပြုလုပ်ထားခြင်းဖြစ်သည်။
ပတ္တမြားတူးဖော်ထုတ်လုပ်ရောင်းချသည့် လုပ်ငန်းသည် မြန်မာပြည်သူများအပေါ် အကြမ်းဖက်စစ်ဆင်ရေးဆောင်ရွက်နေသည့် စစ်ကောင်စီအတွက်ဘဏ္ဍာငွေကူညီရှာဖွေပေးနေခြင်းဖြစ်သည်။
အာဏာသိမ်းစစ်ကောင်စီက ရီဟားနားကဲ့သို့ မြန်မာပြည်က အနုပညာရှင်များကိုလည်းသက်ညှာခြင်းမရှိဘဲအကြမ်းဖက်ဖိနှိပ်မှုများဆောင်ရွက်ခဲ့သည်ဟု JFMကထောက်ပြထားသည်။
ယမန်နှစ်ဇူလိုင်လတွင် နိုင်ငံရေးသမားနှင့် ဟစ်ဟော့အဆိုတော် ဖြိုးဇေယျာသော်နှင့် အခြားနိုင်ငံရေးတက်ကြွလှုပ်ရှားသူ သုံးဦးကို စစ်ကောင်စီက သေဒဏ်ချကွပ်မျက်ခဲ့သည်။
ထိုအပြင် အောက်တိုဘာလ အတွင်းကလည်း စစ်အုပ်စုက ကချင်ပြည်နယ် အနန့်ပါဒေသတွင်တေးဂီတဖျော်ဖြေပွဲတစ်ခုကို စစ်ရေး အရပ်သား ပစ်မှတ် မခွဲခြားပဲ တိုက်ခိုက်မှုကြောင့် အနုပညာရှင်များနှင့် ပရိတ်သတ် ၈၀ကျော်သေဆုံးခဲ့သည်။ အခြားအနုပညာရှင်များကိုလည်း စစ်ကောင်စီကဥပဒေမဲ့ဖမ်းဆီး၊ ညှင်းပမ်းနှိပ်စက်၊ သတ်ဖြတ်မှုများကျူးလွန်ထားသည်ဟု JFMကဆိုထားသည်။
စစ်တပ်အာဏာသိမ်းနှစ်နှစ်ကျော်ကာလအတွင်း သွေးထွက်သံယိုမှု၊ စစ်ရာဇဝတ်မှုနှင့် လူသားမျိုးနွယ်အပေါ်ကျူးလွန်များအတွက် ကျောက်မျက်ကဏ္ဍမှ ရရှိသည့်ဝင်ငွေသည့် အရေးပါမှူသည် ထင်ရှားသည်ဟု JFMကဆိုသည်။သို့သော်အမေရိကန် ကျောက်မျက်ရတနာအရောင်းဆိုင်များက မြန်မာနိုင်ငံထွက် ပတ္တမြား၊ကျောက်စိမ်းနှင့် အခြားကျောက်မျက်လက်ဝတ်ရတနာများကို ရောင်းချနေဆဲဖြစ်သည်။
Bayco Jewels LLCကုမ္မဏီကမိုးကုတ်မြို့ရှိကျောက်မျက်တူးဖော်မှုများကို အရေအတွက်အနည်းငယ်ဖြင့်ဆက်လုပ်နေကြောင်း ဖော်ပြထားသည်။အမေရိကန်နိုင်ငံအနေဖြင့် မြန်မာ့ကျောက်မျက်လုပ်ငန်းကိုဒဏ်ခတ်ပိတ်ဆိုမှုအပြင် ကျောက်မျက်တင်သွင်းမှုကိုပိတ်ပင်ရန်လည်း JFM ကတောင်းဆိုထားသည်။ ထိုအပြင်ရီဟားနားအနေနှင့် မြန်မာ့ကျောက်မျက်ရတနာများကိုသပိတ်မှောက်ပြီး မြန်မာပြည်သူများနှင့်အတူ ရပ်တည်ရန်လည်း JFMကတောင်းဆိုထားသည်။
