နေအိမ် ၁၅၀ကျော် ပြာကျ
ကရင်အမျိုးသားအစည်းအရုံး(KNU) ညောင်လေးပင်ခရိုင်(ခလယ်လွီထူခရိုင်)တွင် စစ်ကောင်စီတပ်ကြောင့် ဒေသခံများ ရွာလုံးကျွတ်တိမ်းရှောင်နေကြရပြီး ယင်းကျေးရွာများအနက် ရွာ နှစ်ရွာမှာ တောမီးလောင်စဉ် မီးကူး၍ နေအိမ်များ မီးလောင်ပျက်စီးခဲ့ကြောင်း KNUက သတင်းထုတ်ပြန်သည်။
စစ်ကောင်စီက လေယာဉ်ဖြင့်ဗုံးလာကြဲခြင်းနှင့် လက်နက်ကြီးပစ်ခတ်ခြင်း၊ စစ်ကောင်စီတပ်က လူ့အခွင့်အရေးချိုးဖောက်ခြင်းများကြောင့် ရွာများရှိ ပြည်သူများ ထွက်ပြေးတိမ်းရှောင်နေကြရသည်ဟု ဆိုသည်။
ထိုသို့ တိမ်းရှောင်နေစဉ် ဖေဖော်ဝါရီ ၁၀ရက်တွင် ညောင်လေးပင်ခရိုင် မူးမြို့နယ် ကော့ပျင်းရွာ၌လည်းကောင်း၊ ဖေဖော်ဝါရီ ၁၂ရက်တွင် ကြောင်ပြာရွာ လည်းကောင်း တောမီးမှ မီးကူးပြီး နေအိမ်များ လောင်ကျွမ်းခဲ့သည်ဟု ဖော်ပြသည်။
ထိုသို့ ရွာမီးလောင်မှုကြောင့် အိမ်ခြေ ၂၂၀ ကျော်ရှိသည့် ကြောင်ပြာရွာ၌ အိမ်ခြေ ၁၅၀ မီးလောင်ခဲ့ပြီး အိမ်ခြေ ၅၀၀ကျော်ရှိသည့် ကော့ပျင်းရွာ၌ အိမ် ၇လုံး မီးလောင်ခဲ့ကြောင်း ထုတ်ပြန်သည်။
အဆိုပါကျေးရွာများသည် စစ်ကောင်စီ၏ အကြမ်းဖက်မှုများကြောင့် ၂၀၂၂ ဇူလိုင်ကတည်းက ရွာလုံးကျွတ် ရှောင်နေရခြင်းဖြစ်ကြောင်း၊ စစ်ကောင်စီတပ်ရန်ကြောင့် ဒေသခံများ ရွာသို့ မပြန်ရဲဖြစ်ခဲ့ရာ ရွာအတွင်း အမှိုက်နှင့် သစ်ရွက်ခြောက်များ ပြည့်နေ့၍ တောမီးကူးစက်မီးစွဲလောင်ခဲ့ခြင်းဖြစ်ကြောင်း KNUက ဆိုသည်။
စစ်ကောင်စီတပ်သည် ဖေဖော်ဝါရီ ၁၅ရက် ညနေပိုင်းကလည်း တပ်မဟာ(၃)နယ်မြေလယ်ဒိုမြို့နယ်သို့ လေယာဉ် ၂စင်းဖြင့် ဗုံး လေးလုံး ကြဲချပြီး စက်သေနတ်များဖြင့် ပစ်ခတ်ခဲ့ကြောင်း KNUက ထုတ်ပြန်သည်။ အဆိုပါ တိုက်ခိုက်ခံရမှု၌ ထိခိုက်ပျက်စီးမှုမရှိဟု ဖော်ပြထားသည်။
