မန္တလေးတိုင်းထဲက မန္တလေး− မိုးကုတ် လမ်းပိုင်းကို ပြည်သူတွေအနေနဲ့ မလိုအပ်ဘဲ ခရီးမသွားကြဖို့ ပြင်ဦးလွင် ခရိုင် ပြည်သူ့ကာကွယ်ရေးတပ်ဖွဲ့ (ပ.က.ဖ) က ဒီနေ့မှာ အသိပေးလိုက်ပါတယ်။
ဒီလို အသိပေးရတာဟာ မန္တလေး − မိုးကုတ် ၊ မိုးကုတ် − မိုးမိတ် နဲ့ မိုးကုတ် − ပြင်ဦးလွင် လမ်းပိုင်းမှာ တိုက်ပွဲတွေပြင်းထန်လာနိုင်လို့ သတိပေးရတာလို့ သိရပါတယ်။
မဖြစ်မနေ မန္တလေး − မိုးကုတ်လမ်းကို ခရီးသွားမယ့်သူတွေအနေနဲ့ ကားမှန်ချပြီး မောင်းနှင်ပေးကြဖို့ ၊ စစ်ကောင်စီ ယာဉ်တန်းတွေနဲ့ ကပ်မလိုက်ကြဖို့ ပြင်ဦးလွင် ခရိုင် ပ.က.ဖ က အသိပေးထားတာပါ။
ဒါအပြင် အဲဒီလမ်းပိုင်းကို မနက် ၆ နာရီကနေ ည ၆ နာရီ အထိပဲ အသုံးပြုကြဖို့ အသိပေးထားတာတွေ့ရပါတယ်။
ပြီးခဲ့တဲ့ လပိုင်းအတွင်း မန္တလေး နဲ့ ရှမ်းပြည်နယ်အစပ် ပြင်ဦးလွင် မြို့ နဲ့ မလှမ်းမကမ်းက နောင်ချိုမြို့နယ်ထဲမှာ မန္တလေး PDF နဲ့ စစ်ကောင်စီတပ်တွေကြားတိုက်ပွဲတွေဖြစ်ခဲ့ပါတယ်။
