ဂရိနိုင်ငံမှာ ရထားနှစ်စီး ခေါင်းချင်းဆိုင် တိုက်မိရာက ၂၉ ဦးထက်မနည်းသေပြီး ၈၅ ဦးထက်မနည်း ထိခိုက် ဒဏ်ရာ ရခဲ့ကြပါတယ်။
ဖေဖော်ဝါရီ ၂၈ ရက်က လူပေါင်း ၃၅၀ လောက် လိုက်ပါလာတဲ့ ခရီးသည်တင် ရထားဟာ ကုန်တင်ရထား တစ်စီးနဲ့ ဝင်တိုက်မိခဲ့တာ ဖြစ်ပါတယ်။ တိုက်မိတဲ့ အရှိန်ကြောင့် နှစ်စီးစလုံးက ရထားတွဲတွေ သံလမ်းပေါ်ကနေ ချော်ထွက်ကုန်သလို မီးစွဲလောင်တာတွေလည်း ဖြစ်ခဲ့ပါတယ်။
ခရီးသည်တင် ရထားဟာ အေသင်မြို့တော်ကနေ မြောက်ပိုင်းမှာရှိတဲ့ နိုင်ငံရဲ့ ဒုတိယ အကြီးဆုံး မြို့ဖြစ်တဲ့ သက်ဆာလွန်နီကီကို ဦးတည် ခုတ်မောင်းချိန်မှာ အခုလို ဆိုးရွားလှတဲ့ မတော်တဆမှုနဲ့ ကြုံတွေ့ခဲ့တာပါ။ ကုန်တင် ရထားကတော့ သက်ဆာလွန်နီကီကနေ လာရစ်ဆာ ဒေသဆီ ဦးတည်နေခဲ့တာ ဖြစ်ပါတယ်။ ရထားနှစ်စီးလုံးရဲ့ ခေါင်းတွဲတွေကတော့ ဆိုးဆိုးရွားရွား ကြေမွပျက်စီးကုန်တဲ့အပြင် မီးပါ လောင်သွားခဲ့ကြပါတယ်။
အခင်းဖြစ်တဲ့ နေရာမှာ မီးသတ်ကားတွေ၊ လူနာတင်ယာဉ်တွေနဲ့ တခြား ကယ်ဆယ်ရေး ယာဉ်တွေ အရေအတွက် ရာနဲ့ချီ စုဝေးနေတာကိုလည်း တွေ့ခဲ့ရပါတယ်။ အသက်ရှင်လျက် လွတ်မြောက်လာတဲ့ ခရီးသည် တော်တော်များများဟာ ဆောက်တည်ရာမရ ထိတ်လန့်ပြီး သွေးပျက် အော်ဟစ်နေခဲ့ကြတယ်လို့ မျက်မြင်တွေက ဆိုပါတယ်။
ရထားနှစ်စီး တိုက်မိပြီး နောက်ထပ် နာရီပေါင်း အတော်များများ ကြာတဲ့ထိ ကယ်ဆယ်ရေး လုပ်ငန်းတွေ ဆက်လက် လုပ်ဆောင်နေပြီး မီးတွေကိုတော့ ငြှိမ်းသတ်ထားပြီးပါပြီ။
ရထားနှစ်စီး ခေါင်းချင်းဆိုင် တိုက်မိရလောက်တဲ့ထိ ဘယ်လို ချွတ်ချော် လွဲမှားမှုတွေ ကြုံခဲ့သလဲ ဆိုတာကို တိတိကျကျ မသိရသေးပါဘူး။ ဖြစ်စဉ်နဲ့ ပတ်သက်လို့ စုံစမ်းစစ်ဆေးမှုတွေ စတင် လုပ်ဆောင်နေပြီလို့ ဂရိ ရဲတပ်ဖွဲ့က ထုတ်ပြန်ထားပါတယ်။
