Connect with us
close

Hi, what are you looking for?

LuduNwayOo

သတင်း

စစ်အာဏာရှင် မတရားအကြမ်းဖက်မှုကြောင့် ကျဆုံးခဲ့ရသူများအပေါ် သစ္စာစောင့်သိ တော်လှန်တိုက်ပွဲဝင်သွားမည်ဟု NUCC အသိပေး

၁၉၈၈တွင် ဖြစ်ပွားခဲ့သည့် အဆိုပါဖြစ်ရပ်သည် နိုင်ငံ၏ ဒီမိုကရေစီအရေးလှုပ်ရှားမှု၏ အထင်ကရမှတ်တိုင်တစ်ခုဖြစ်သော ရှစ်လေးလုံး အရေးတော်ပုံ ပေါ်ပေါက်လာစေရေးအတွက် တွန်းအားတစ်ခုဖြစ်စေခဲ့ကြောင်း NUCCက ဆိုသည်။

(ပြီးခဲ့သည့် ၂၀၂၂ မတ်လ၁၃ရက်က ကိုဖုန်းမော်၊ ကိုစိုးနိုင် ကျဆုံးခြင်း (၃၄)နှစ်မြောက်အဖြစ် ရန်ကုန်မြို့၌ ချီတက်ဆန္ဒပြနေစဉ်။ ဓာတ်ပုံ - ရန်ကုန်ဒရုန်း)
(ပြီးခဲ့သည့် ၂၀၂၂ မတ်လ၁၃ရက်က ကိုဖုန်းမော်၊ ကိုစိုးနိုင် ကျဆုံးခြင်း (၃၄)နှစ်မြောက်အဖြစ် ရန်ကုန်မြို့၌ ချီတက်ဆန္ဒပြနေစဉ်။ ဓာတ်ပုံ - ရန်ကုန်ဒရုန်း)

▪️ကိုဖုန်းမော်နှင့် ကိုစိုးနိုင်ကျဆုံးခြင်း(၃၅)နှစ် မြောက်နှစ်ပတ်နေ့သို့ ယာယီသမ္မတ၊ ဝန်ကြီးချုပ် သဝဏ်လွှာပို့

စစ်အာဏာရှင်၏ မတရားအကြမ်းဖက်မှုကြောင့် ကျဆုံးသွားကြရသော ခေတ်အဆက်ဆက် အာဇာနည်သူရဲကောင်းတို့၏ တော်လှန်ရေးသစ္စာကို စောင့်သိလျက် အဆိုပါသူရဲကောင်းတို့ မျှော်လင့်တောင့်တခဲ့ကြသော ဖက်ဒရယ်ဒီမိုကရေစီပြည်ထောင်စုကြီးတည်ထောင် နိုင်သည် အထိ တွဲလက်ညီညီဖြင့် တော်လှန်တိုက်ပွဲဝင်သွားမည်ဟု အမျိုးသားညီညွတ်ရေးအတိုင်ပင်ခံကောင်စီ(NUCC)က အသိပေးသည်။

ယနေ့ (မတ်လ ၁၃ရက်)သည် အာဏာရှင်လက် အောက်တွင် တရားဥပဒေစိုးမိုးရေးအတွက် တောင်းဆိုရင်း အဓိကရုဏ်းနှိမ်နင်းရေးတပ်ဖွဲ့များ၏ ပစ်ခတ်မှုကြောင့် ရန်ကုန် စက်မှုတက္ကသိုလ် (RIT) ကျောင်းသားများဖြစ်သည့် ကိုဖုန်းမော်နှင့် ကိုစိုးနိုင် ကျဆုံးခဲ့သည့် (၃၅)နှစ်မြောက် နှစ်ပတ်လည်နေ့ဖြစ်ရာ NUCCက သဝဏ်လွှာပေးပို့ခဲ့ခြင်းဖြစ်သည်။

၁၉၈၈တွင် ဖြစ်ပွားခဲ့သည့် အဆိုပါဖြစ်ရပ်သည် နိုင်ငံ၏ ဒီမိုကရေစီအရေးလှုပ်ရှားမှု၏ အထင်ကရမှတ်တိုင်တစ်ခုဖြစ်သော ရှစ်လေးလုံး အရေးတော်ပုံ ပေါ်ပေါက်လာစေရေးအတွက် တွန်းအားတစ်ခုဖြစ်စေခဲ့ကြောင်း NUCCက ဆိုသည်။

ရှစ်လေးလုံးအရေးတော်ပုံသည် ကျောင်းသူ၊ကျောင်းသားလူငယ်များမှ ဦးဆောင်ခဲ့သည့် မြန်မာနိုင်ငံ၏ ဒီမိုကရေစီအရေး လှုပ်ရှားမှုတွင် အထင်ကရ မှတ်တိုင်တစ်ခု ဖြစ်ခဲ့သည့်နည်းတူ လက်ရှိနွေဦးတော်လှန်ရေးတွင်လည်း ကျောင်းသားသမဂ္ဂစသော မျိုးဆက်သစ်လူငယ်များက ဦးဆောင်၍ စစ်အာဏာရှင်စနစ်အပါအဝင် အာဏာရှင်စနစ်ဟူသမျှ အဆုံးသတ်စေရန် အလွှာ အသီးသီးမှ နည်းလမ်းပေါင်းစုံဖြင့် တော်လှန်နေသော အရေးတော်ပုံကြီးတစ်ရပ်အဖြစ် ဆက်လက် တိုက်ပွဲဝင်လျက်ရှိကြောင်း ဖော်ပြသည်။

ထိုသို့ တော်လှန်တိုက်ပွဲဝင်ကြရာတွင်လည်း ကိုဖုန်းမော်၊ ကိုစိုးနိုင်တို့ကဲ့သို့ အကြမ်းဖက်လူ့အခွင့်အရေးချိုးဖောက်ခံရမှုကြောင့် ကျဆုံးခဲ့သော အာဇာနည် သူရဲကောင်းလည်း ထောင်ချီလျက်ရှိနေပြီဖြစ်ကြောင်း အသိပေးထားသည်။

ကိုဖုန်းမော်၊ ကိုစိုးနိုင် ကျဆုံးခြင်း(၃၅)နှစ်ပြည့် နှစ်ပတ်လည်အခမ်းအနားသို့ အမျိုးသားညီညွတ်ရေးအစိုးရ ယာယီသမ္မတ ဒူဝါလရှီးလနှင့် ပြည်ထောင်စုဝန်ကြီးချုပ် မန်းဝင်းခိုင်သန်း တို့က သဝဏ်လွှာပေးပို့ခဲ့သည်။

စစ်အာဏာရှင် မင်းအောင်လှိုင်ဦးဆောင်သည့် အကြမ်းဖက်စစ်တပ်က ပြည်သူ့အာဏာကို အဓမ္မလုယူလိုက်သည့်အတွက် လက်ရှိတွင် နိုင်ငံတဝှမ်း စစ်မီးတောက်လောင် ကာ ပြည်သူလူထုများစွာ ဒုက္ခအတိရောက်နေရကြောင်း၊ ဘေးဒုက္ခများသည် စစ်အာဏာရှင် များ တည်ရှိနေသရွေ့ ဆက်လက်ဖြစ်ပွားနေဦးမည်သာ ဖြစ်ကြောင်း ယာယီသမ္မတ၏ သဝဏ်လွှာ၌ ဖော်ပြထားသည်။

လူထု၏ခေတ်ကာလအဆက်ဆက် ခုခံတော်လှန်မှုဟာ အလွန်အရင်းအနှီးကြီးကြောင်း မမေ့မလျော့ သတိချပ်ရမည်ဟုလည်း ယာယီသမ္မတက ပြောသည်။

စစ်အာဏာရှင်စနစ်ကိုအပြီးတိုင်ဖျက်သိမ်းကာ တိုင်းရင်းသားအားလုံး လိုလားတောင့်တကြသည့် ဖက်ဒရယ်ဒီမိုကရေစီ ပြည်ထောင်စုကို ထူထောင်နိုင်မှသာ ကိုဖုန်းမော်နှင့် ကိုစိုးနိုင်တို့ အပါအဝင် ၎င်းတို့ကဲ့သို့ အသက်ပေးလှူသွားကြသော ပြည်သူ့အာဇာနည်အားလုံးအတွက် တရားမျှတမှုရရှိစေ ပြီး ငြိမ်းချမ်းစွာ နားခိုနိုင်ကြမည်ဖြစ် ကြောင်း ယာယီသမ္မတက ပြောကြားခဲ့ပြီးနွေဦးတော်လှန်ရေး အောင်မြင်ပေါက်မြောက်သည်အထိကြိုးပမ်းကြရန် တိုက်တွန်းခဲ့သည်။

ပြည်ထောင်စုဝန်ကြီးချုပ် မန်းဝင်းခိုင်သန်းကလည်း ခေတ်အဆက်ဆက် ဒီမိုကရေစီရေး၊ လူ့အခွင့်အရေးနှင့် တန်းတူညီမျှရေးအတွက် ပေးဆပ်ကြရာ၌ ထင်ပေါ်ကျော်ဇောသူဖြစ်စေ အညတရ သူရဲကောင်းဖြစ်စေ ၎င်းတို့မိသားစုဝင်များအားလုံး၏ နစ်နာဆုံးရှုံးမှုအားလုံးကိုလေးနက်စွာ ထပ်တူထပ်မျှ စာနာပူဆွေးနွေးကြောင်း ပြောကြားသည်။

၎င်းပေးဆပ်မှုတိုင်းသည် အလဟဿမဖြစ်ခဲ့ဘဲ အာဏာရှင်စနစ် အပြီးတိုင် ချုပ်ငြိမ်းရေး၊ တိုင်းရင်းသားအားလုံး တန်းတူညီမျှရေးနှင့် ဒီမိုကရေစီ နှင့် နိုင်ငံသားတိုင်း လူ့အခွင့်အရေးများအပြည့်အ၀ ရရှိရေးအတွက် ခရီးလမ်းတလျှောက် အုတ်မြစ်ကောင်းများအဖြစ် မှတ်ကျောက်တင် တည်ရှိနေသည်ဟု ဝန်ကြီးချုပ်က ပြောသည်။

ထို့အပြင် မဝေးတော့သည့်တော်လှန်ရေးအောင်ပွဲ ပန်းတိုင် ရောက်သည်အထိ ညီညွတ်စွာ အစွမ်းကုန် ကြိုးပမ်း လျှောက်လှမ်းမည်ဖြစ်ကြောင်းလည်း ဝန်ကြီးချုပ်က ပြောကြားခဲ့သည်။

You May Also Like

သတင်း

မတ်လ ၁၁ ရက်​နေ့က နယ်စပ်မှတ်တိုင် BP-8 နှင့် BP-9 အကြား ဖြစ်ပွားခဲ့သည့် တိုက်ပွဲသတင်းထုတ်ပြန်ရာ၌ KMICကထိုသို့ ဖော်ပြခဲ့ခြင်းဖြစ်သည်။

သတင်း

အကြမ်းဖက် စစ်ကောင်စီတပ်များ၏ အကြမ်းဖက်လှုပ်ရပ်များနှင့်စစ်ရာဇဝတ်မှုမှတ်တမ်းများကို KNDF မှစုဆောင်းလျက်ရှိပြီး လိုအပ်သလို ဆက်လက်ထုတ်ပြန်သွားမည်ဟု ဆိုသည်။

သတင်း

အာဏာသိမ်းစစ်ကောင်စီက ၎င်းတို့အာဏာတည်မြဲရေးအတွက် အယောင်ပြပြုလုပ်ရန်စီစဉ်နေသည့် ရွေးကောက်ပွဲအား တော်လှန်ရေးရဲဘော် များနှင့် တော်လှန်ရေးအင်အားစုများက အပြင်းအထန်ကန့်ကွက်ထားသည်။

သတင်း

စစ်ကောင်စီတပ်သည်ယခုတိုက်ပွဲဖြစ်ပွားရာနယ်စပ်ဒေသရှိ ၎င်းတို့၏ တပ်စခန်းများသို့ရိက္ခာဖြည့်တင်းရန်ပြုလုပ်​သောအခါ ကရင်နီပူးပေါင်းတပ်က ကြားဖြတ်တိုက်ခိုက်နေ၍စစ်ကောင်စီတပ်အထိနာလျက်ရှိသည်။