ကချင်ပြည်နယ်ပြည်သူ့ပါတီ(KSPP)သည် စစ်ကောင်စီဖွဲ့စည်းထားသည့် ရွေးကောက်ပွဲကော်မရှင်ထံသို့ ယမန်နေ့ (မတ်လ ၇ရက်)က ပါတီ ဆက်လက်တည်ထောင်ခွင့် မှတ်ပုံတင် လျှောက်ထားခဲ့ကြောင်း စစ်ကောင်စီဝါဒဖြန့် သတင်းစာ၌ ဖော်ပြထားသည်။
ကချင်လွတ်လပ်ရေးအဖွဲ့(KIO)ဒုဥက္ကဋ္ဌဟောင်းဖြစ်သည့် ဒေါက်တာတူးဂျာ ဦးဆောင်ပြီး ကချင်ပြည်နယ်ရှိ နိုင်ငံရေးပါတီများ ပူးပေါင်းဖွဲ့စည်းထားသည့် KSPPအနေဖြင့် ၂၀၀၈ ဖွဲ့စည်းပုံအခြေခံဥပဒေ လက်ခံပါက ရန်သူအဖြစ် သတ်မှတ်မည်ဖြစ်ကြောင်း KIO/KIAက အသိပေးထားသည့် ကြားမှ ယခုကဲ့သို့ မှတ်ပုံတင်လာခြင်းဖြစ်သည်။
ယင်းသို့ KSPP က စစ်ကောင်စီထံ မှတ်ပုံတင်ခြင်းနှင့်ပတ်သက်ပြီး KIO/KIA သတင်းနှင့် ပြန်ကြားရေးတာဝန်ခံ ဗိုလ်မှူးကြီး နော်ဘူထံသို့ သဘောထားမေးမြန်းရာ မှတ်ချက်မပေးနိုင်သေးကြောင်း ဖြေကြားသည်။
KSPPတာဝန်ရှိသူအချို့ထံသို့ ဆက်သွယ်ရာတွင် လည်း အဆက်အသွယ်မရသေးပေ။
KSPP၏ ယခုနှစ် ဖေဖော်ဝါရီ ၄ရက် ကြေညာချက်တွင် ဒုတိယအကြိမ် ပါတီညီလာခံက KSPP ၏ တည်တံ့ခိုင်မြဲရေးကို ပါတီအနေဖြင့် ရိုးသားဖြောင့်မတ်စွာ ဆောင်ရွက်ရန် သဘောတူညီဆုံးဖြတ်ခဲ့ကြောင်း အသိပေးထားသည်။
KIA အနေဖြင့်၂၀၀၈ ဖွဲ့စည်းပုံ အခြေခံဥပဒေကို လက်ခံကာ နိုင်ငံရေးပါတီ တည်ထောင်သူများကို ရန်သူအဖြစ် သတ်မှတ်သွားမည်ဖြစ်ကြောင်း ၂၀၂၂မေလက အသိပေးထားသည်။
“ KIO အနေနဲ့ ၂၀၀၈ ဖွဲ့စည်းပုံ အခြေခံဥပဒေကို လက်မခံဘူး။လက်ခံပြီး ပါတီတွေ ထောင်ရင်တော့ ရန်သူအဖြစ် သတ်မှတ်ထားမှာ ဖြစ်တယ်” ဟု KIO/KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောကြားထားသည်။
ထို့ပြင် စစ်ကောင်စီလက်အောက်ခံ ပြည်သူ့စစ်၊BGF လက်နက်ကိုင်အဖွဲ့များကိုလည်း စစ်ရေးရန်သူအဖြစ် သတ်မှတ်ကြောင်း အသိပေးထားသည်။
အာဏာသိမ်းစစ်ကောင်စီက ၎င်းတို့အာဏာတည်မြဲရေးအတွက် အယောင်ပြပြုလုပ်ရန်စီစဉ်နေသည့် ရွေးကောက်ပွဲအား တော်လှန်ရေးရဲဘော် များနှင့် တော်လှန်ရေးအင်အားစုများက အပြင်းအထန်ကန့်ကွက်ထားသည်။
