ဒီး​မော့ဆိုတွင် စစ်ရဟတ်ယာဥ် ပစ်ခတ်တိုက်ခိုက်ခံရ၍မဆင်းနိုင်ဘဲပြန်သွား

ကရင်နီ(ကယား)ပြည်နယ်၊ ဒီးမော့ဆို မြို့နယ်တွင် စစ်ကောင်စီရဟတ်ယာဥ်တစ်စီး ပစ်ခတ်ခံတိုက်ခိုက်ရ​သော​ကြောင့်မဆင်းနိုင်ဘဲ ပြန်ထွက်သွားကြောင်း ဒေသတွင်း သတင်းရင်းမြစ်များက ပြောသည်။

ယနေ့(မတ်လ ၁၆ ရက်) နေ့လည် ၁ နာရီ ခန့်က စစ် ကောင်စီရဟတ်ယာဥ်သည် ငွေ တောင်အခြေစိုက် ခမရ ၁၀၂ တပ်သို့ ဆင်းသက်ရန် ပြင်ဆင်နေစဥ် ပစ်ခတ်ခံရခြင်းဟု ကရင်နီ​တော်လှန်​ရေးအင်အားစုအချို့က​ပြောသည်။

“ ရိက္ခာလာပို့တဲ့ ရဟတ်ယာဥ်လို့ ပြောတယ်။ထိခိုက်မှု အတိအကျတော့မသိရဘူး။ဒါပေမယ့် မိနစ် ၂၀ လောက်ထိ ၁၀၂ တပ်ပတ်ပတ်လည်မှာ ပဲ ပျံဝဲ ပြီး မဆင်းနိုင်ဘဲ ပြန်ထွက်သွားတယ်” ဟု ဒီးမော့ဆိုမြို့နယ် ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်။

ရဟတ်ယာဥ်ပစ်ခတ်ခံရခြင်းကြောင့် ခမရ ၁၀၂ တပ်တွင်းမှ လက်နက်ကြီးဖြင့် တုံ့ပြန်ပစ်ခတ်ခြင်းနှင့် ကင်းထောက်ရဟတ်ယာဥ်တစ်စီးပါ စစ်ကောင်စီက အသုံးပြုလာသည်ဟုလည်း ၎င်းကဆက်​ပြောသည်။

စစ်တပ်ရဟတ်ယာဥ်ကိုပစ်ခတ်တိုက်ခိုက်​သောအဖွဲ့နှင့် အပစ်ခံရ​သော ရဟတ်ယာဥ်အမျိုးအစား၊ထိခိုက်မှုရှိ၊မရှိတို့ကိုPeople’s Spring ကသီးခြားအတည်မပြုနိုင်​သေးပါ။

လက်ရှိ ကရင်နီဒေသတွင်း စစ်ကောင်စီ၏ ထိုးစစ် တွင် Mi35 Jet Fighter ဖြင့် ပစ်ခတ်မှု ၄၅ကြိမ်၊ ဟယ်လီ​ကော်ပတာဖြင့်ပျံသန်းပတ်ခတ်မှု ၁၂ကြိမ် နှင့် လက် နက်ကြီးဖြင့်ပစ်ခတ်မှု အကြိမ် ၅၀၀ နှင့်အထက်ရှိသည်ဟုကရင်နီ​တော်လှန်​ရေးအင်အားစုများက ထုတ်ပြန်ထားသည်။

မတ်လ ၁၀ ရက်နေ့ကစ၍ စစ်တပ်က ကရင်နီ(ကယား)ပြည်နယ်၊ဒီးမောဆိုအရှေ့ခြမ်းသို့ စစ်ကောင်စီတပ်က စစ်ကြောင်းသုံးခု ဖြင့် စတင်ထိုးစစ်ဆင်​နေသည်။

ထိုနေ့တွင်ပင် ဒေါသဲရွာအတွင်း တိုက်ပွဲ ဖြစ်ပွားခဲ့ပြီး စစ်ကောင်စီတပ်သား ၁၆ ဦးသေဆုံးကြောင်း ကရင်နီစစ်ဖက်ဆိုင်ရာ ဗဟိုကော်မတီKMIC ကထုတ်ပြန်ထားသည်။

မတ်လ ၃ ရက်ကလည်းချင်းပြည်နယ်ထန်တလန်မြို့တွင် စစ်တပ်က ရိက္ခာပို့​သော Mi-17 ရဟတ်ယာဥ်ကို ချင်းကာကွယ်​ရေးတပ်များက ​လေယာဥ်ဆင်းသက်စဥ်တိုက်ခိုက်ရာ​လေယာဥ်အစိတ်အပိုင်းအချို့မီး​လောင်ပြီး ချက်ချင်း​ထွက်ခွာသွားခဲ့သည်။