ဖယ်ခုံမြို့နယ်ဘက်သို့ စစ်ကြောင်းထိုးလာသည့် စစ်ကောင်စီတပ်စစ်ကြောင်းမှ ရုပ်အလောင်း ၂၀ ကျော်အပါအဝင် လက်နက်ခဲယမ်းများသိမ်းဆည်းရမိကြောင်း ကရင်နီအမျိုးသားများကာကွယ် ရေးတပ်(KNDF)မှ တာဝန်ရှိသူက လူထုနွေဦးသို့ ပြောသည်။
ယမန်နေ့(မတ်လ ၁၆ရက်)က ဖယ်ခုံမြို့နယ်ရှိ တိုက်ပွဲဖြစ်ပွားရာ နေရာများအား နယ်မြေရှင်းလင်းစဥ် စစ်ကောင်စီတပ်သားအလောင်းများနှင့် လက်နက်ခဲယမ်းများကို ရရှိခဲ့ခြင်းဟု ဆိုသည်။
“ ခေါင်းအိကျေးရွာ ဘက်မှာပေါ့။ တိုက်ပွဲက တစ်ပတ်လောက်ကြာတယ်။စစ်ကောင်စီအလောင်းတွေဆိုတာ မြင်မကောင်းဘူး။ဘယ်လိုမှ ကိုင် တွယ်မရတဲ့ ရုပ်အလောင်းတွေတော့ သဂြိုလ်ပေးလို့ အဆင်မပြေလို့ ဒီအတိုင်းထားခဲ့ရတယ်။အလောင်းနှစ်လောင်းကိုတော့ ကျွန်တော်တို့ ရဲဘော်တွေ မြှုပ်နှံပေးခဲ့တယ်” ဟု အထက်ပါတာဝန်ရှိသူက ရှင်းပြသည်။
![(ယမန်နေ့က ဖယ်ခုံမြို့နယ် ခေါင်းအိကျေးရွာအား နယ်မြေရှင်းလင်းစဥ် သိမ်းဆည်းရရှိခဲ့သော လက်နက်ခဲယမ်းများ။ ဓာတ်ပုံ - CJ)](https://i0.wp.com/www.ludunwayoo.com/wp-content/uploads/2023/03/336558995_1849476398771734_2388837585185235098_n.jpg?resize=768%2C1024&ssl=1)
သိမ်းဆည်းရမိခဲ့သည့် လက်နက်ခဲယမ်းများတွင် (၆၀)မမ ကဲ့သို့ လက်နက်ကြီးတစ်ခုပါဝင်ပြီး ၎င်းကျည်များ၊ နင်းမိုင်းများ အပါအဝင် အခြားလက်နက်ကျည်အချို့ ပါရှိသည်ဟု သိရသည်။
အဆိုပါ ခေါင်းအိကျေးရွာအုပ်စု တိုက်ပွဲတွင် ဖယ်ခုံ PDF၊KNDF၊ KA၊ DMO – Local PDF၊ PDF မိုးဗြဲ (1001)၊ 1004၊ 1008၊1005၊ SSNRUတို့ပါဝင်တိုက်ခိုက်ခဲ့သည်။
ယခုလ ၁၁ ရက်ကလည်း ဖယ်ခုံမြို့နယ် ကုရင် ကျေးရွာတိုက်ပွဲ၌ စစ်ကောင်စီတပ်တပ်သား ခြောက်ဦး အရှင်ဖမ်းဆီးရမိခဲ့ပြီး သေဆုံးနေသော အလောင်း ၁၉လောင်းနှင့် MA-3 (၂)လက် ၊ MA-2 (၁)လက် ၊ MA-1 (၁)လက် ၊ စနှိုက်ဖာ (၁)လက် ၊ (၆၀)မမ ပြောင်း (၂)ပြောင်း ၊ RPG (၂)လက်နှင့် ခဲယမ်းများ ၊ အသုံးဆောင်များကို ကရင်နီပူးပေါင်းတပ်က သိမ်းဆည်းရခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)