မန္တလေးတိုင်း၊ တောင်သာမြို့နယ်အတွင်း စစ်ကောင်စီလက်အောက်ခံ ပျူစောထီးများကြီးစိုးသည့်ကျေးရွာ ၁၁ သည် စစ်မြေပြင် ဖြစ်လာနိုင်ကြောင်း အမျိုးသားညီညွတ်ရေးအစိုးရ၊ တောင်သာမြို့နယ်- ပြည်သူ့အုပ်ချုပ်ရေးအဖွဲ့ ကမေ ၂၀ ရက်က ထုတ်ပြန်သတိပေးလိုက်သည်။
တောင်သာမြို့နယ်အတွင်း အကြမ်းဖက်စစ်ကောင်စီနှင့်လက်တွဲပြီး ကျေးရွာလုံခြုံရေးအမည်ခံကာ ပျူအဖွဲ့များကျေးရွာများတွင်ဖွဲ့စည်းနေပြီး ကျေးရွာများအတွင်း စစ်ကောင်စီလက်အောက်ခံ လက်နက်ကိုင်များရှိနေခြင်းသည် အန္တရာယ်ကြီးမားပြီး အချိန်မရွေး စစ်မြေပြင်ဖြစ်လာနိုင်သည်ဟု တောင်သာမြို့နယ်-ပြည်သူ့အုပ်ချုပ်ရေးအဖွဲ့ကသတိပေးထားသည်။
NUG ပြည်သူ့အုပ်ချုပ်ရေးအဖွဲ့က ကြေညာထားသည့် ကျေးရွာ ၁၁ ရွာမှာ ရွာသစ်(ဝဲလောင်) ၊ ထနောင်းကုန်း၊ ရသစ်၊ ဝါးကြီးအိုင်၊ တလိုင်းရွာသစ်၊ ကျွဲတလင်း၊ ဘုရားလှ၊ ကျောက်ကာ၊ တမိုက်သာ၊ ထန်းပင်ကန်နှင့်ထန်းကျင်းရွာတို့ဖြစ်သည်ဟုဖော်ပြထားသည်။
![(တောင်သာနယ်ရှိကျေးရွာအချို့တွင် စစ်ကောင်စီတပ်က ပျူသက်တန်းပေးနေစဥ်။ဓါတ်ပုံ-တောင်သာပအဖ)](https://i0.wp.com/www.ludunwayoo.com/wp-content/uploads/2023/05/348283932_6152808191499730_6687666285764637807_n.jpg?resize=720%2C960&ssl=1)
အဆိုပါရွာများရှိ ပြည်သူများအနေဖြင့် အေးဆေးစွာနေနိုင်ရေးအတွက် ပျူအဖွဲ့များကို ကျေးရွာအတွင်းထုတ်ပယ်ထားကြရန်လည်း ပြည်သူ့အုပ်ချုပ်ရေးအဖွဲ့ကသတိပေးသည်။
“မြို့နယ်အတွင်း မကြာမှီ စစ်မြေပြင်ဖြစ်လာနိုင်တဲ့ ပျူများကြီးစိုးတဲ့ကျေးရွာများကို ပြည်သူ့ကာကွယ်ရေးအဖွဲ့များက ထိရောက်စွာအရေးယူပါတော့မယ်၊”ဟုတောင်သာမြို့နယ် ပြည်သူ့ကာကွယ်ရေးအဖွဲ့တာဝန်ရှိသူက People’s Spring သတင်းဌာနသို့သည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ထိုကြောင့် ပြည်သူလူထုကို သတိပေးခြင်းနှင့် ပျူစောထီးရွာများကို စာရင်းထုတ်ပြန်ရခြင်းဖြစ်သည်ဟုပြည်သူ့ကာကွယ်ရေးအဖွဲ့က ဆိုသည်။
![(တောင်သာနယ်ရှိကျေးရွာအချို့တွင် စစ်ကောင်စီတပ်က ပျူသက်တန်းပေးနေစဥ်။ဓါတ်ပုံ-တောင်သာပအဖ)](https://i0.wp.com/www.ludunwayoo.com/wp-content/uploads/2023/05/348240480_6216379065121608_3937279090895651849_n.jpg?resize=600%2C450&ssl=1)
“တောင်သာမြိုနယ်ထဲက ပျူစောထီးတွေလက်နက်အားကိုးနဲ့ အရမ်းသောင်းကျန်းကြတော့ မဖြစ်မနေ စစ်ရေးအရ အရေးယူရတော့မယ်ထင်တယ်။ ပြည်တွင်းစစ်ပွဲကတော့ မြင်းခြံခရိုင်ဖက် တစ်ဖြေးဖြေးရွေ့လာနေပါပြီ”ဟု တောင်သာမြို့နယ်ပြည်သူတစ်ဦးကမှတ်ချက်ပေးသည်။
တောင်သာနယ်သည် ယခင်စစ်အစိုးရလက်ထက် စက်မှုဝန်ကြီးဟောင်း ဦးအောင်သောင်၏ ဇာတိနယ်ဖြစ်သည်။ထိုကြောင့် အစဥ်အဆက် ပြည်ခိုင်ဖြိုး အားကောင်းသောဒေသဖြစ်သော်လည်း ၂၀၂၀ ရွေးကောက်ပွဲတွင် တောင်သာနယ်တွင်ပင် ပြည်ခိုင်ဖြိုးရှုံးနိမ့်ပြီး ဒီချုပ်အနိုင်ရခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)