လူသားဘ၀လုံခြုံရေးစဉ်းစားချက်အပေါ် အာရုံစိုက်ပြီး အရေးပါသည့် အင်အားစုတိုင်းနှင့် ဆက်သွယ်ညှိနှိုင်းမည်ဟု ထိုင်းရွေးကောက်ပွဲအနိုင်ရ Move Forward ပါတီခေါင်းဆောင် ပီတက ပြောသည်။
ထိုင်းဝန်ကြီးချုပ်အသစ်အဖြစ် ရွေးကောက်ခံထားရသည့် ပီတ၏ နိုင်ငံခြားရေးမူဝါဒမှာ အထက်ပါအတိုင်းဖြစ်ပြီး အဆိုပါ လူသားဘ၀လုံခြုံရေး အခြေခံတဲ့မူဝါဒမှာ လူသားချင်း စာနာထောက်ထားမှုအပိုင်းရော၊ စီးပွားရေး ဘ၀လုံခြုံတိုးတက်ရေး အပိုင်းများတွင်ပါ ပါဝင်မည်ဖြစ်ကြောင်းက ၎င်းက ရှင်းပြသည်။
“ဒီမူဝါဒကို အကောင်အထည်ဖော်ရာမှာ ထိုင်း-မြန်မာနှစ်နိုင်ငံ၊ အာဆီယံအဖွဲ့ကြီးတခုလုံးအပြင် နိုင်ငံတကာ အသိုက်အမြုံအတွက်ပါ အပြန်အလှန်ငြိမ်းချမ်းရေးနဲ့ သာယာ၀ပြောရေးကို ဆောင်ကြဉ်းရရှိစေရေးဆိုတဲ့အမြင်နဲ့ အကောင်အထည်ဖော်ဆောင်ရွက်မှာ ဖြစ်ပါတယ်” ဟု ပီတာက ၎င်း၏ တွစ်တာစာမျက်နှာတွင် အင်္ဂလိပ်-မြန်မာနှစ်ဘာသာဖြင့် ရေးသားဖော်ပြသည်။
မိုခါမုန်တိုင်းဘေးဒဏ်ကြောင့် ထိခိုက်ခံစားရသည့် မြန်မာပြည်သူများကို လူသားချင်းစာနာသည့်အကူအညီများ ပေးအပ်မှုကို အဆောတလျင်အမြန်ဆုံးဆောင်ရွက်ရန် ထိုင်းနိုင်ငံ ကြားကာလအစိုးရနှင့် နိုင်ငံတကာ အသိုင်းအဝန်းကို ရွေးကောက်ပွဲအနိုင်ရပါတီခေါင်းဆောင်က တောင်းဆိုသည်။ သေရေး ရှင်ရေးတမျှ အကူအညီတွေလိုအပ်နေသည့် မုန်တိုင်းဘေးဒုက္ခသည်များကို ဦးစားပေးအဖြစ် ပထမဆုံး အထောက်အပံ့များ ပေးရမည်ဟု ၎င်းက ဆိုသည်။
“မြန်မာပြည်သူတွေ၊ အထူးသဖြင့် မိုခါဆိုင်ကလုန်းကြောင့် အသက်အိုးအိမ်စည်းစိမ်ပျက်စီးခဲ့ရတဲ့ ပြည်သူတွေနဲ့အတူ ကျနော် ဒီနေ့မှာ မျှဝေခံစားတဲ့စိတ်အာရုံနဲ့အတူ မေတ္တာပို့ဆုမွန်ကောင်းတောင်းပါ တယ်” ဟု ၎င်းက ရေးသားသည်။
Move Forward Party(MFP)ပါတီခေါင်းဆောင်ပီတသည် အခြားသော ရွေးကောက်ပွဲအနိုင်ရ အတိုက်အခံပါတီများနှင့်ပူးပေါင်းကာ ညွန့်ပေါင်းအစိုးရဖွဲ့စည်းနိုင်ခွင့် ရရှိရန် ကြိုးပမ်းနေပြီး ထိုင်းစစ်တပ်ခန့်အပ်ထားသော အထက်လွှတ်တော်အမတ်များ၏ ထောက်ခံမှု ရရှိပါက ပီတဦးဆောင်သော အစိုးရသစ်တစ်ရပ် ပေါ်ထွက်လာမည်ဖြစ်သည်။
