စစ်ကိုင်းတိုင်း ဗန်းမောက်မြို့နယ်တွင် ယခုရက်ပိုင်းအတွင်း တိုက်ပွဲများ ဖြစ်ပွားခဲ့ပြီး စစ်ကောင်စီတပ်က လေကြောင်း ပစ်ကူပေးတိုက်ခိုက်ခဲ့ကြောင်း၊ စစ်ရေးအခြေအနေမှာ တင်းမာနေဆဲဖြစ်ကြောင်း ဗန်းမောက်နယ်ခံ သတင်းရင်းမြစ်က ပြောသည်။
ဗန်းမောက်မြို့နယ် ကြောင်လည်ရွာ၊ မံထွန်ရွာအနီးတွင် မေလ ၂၀ရက်က ဒေသခံ ပြည်သူ့ကာကွယ်ရေးတပ်နှင့် စစ်ကောင်စီတို့ တိုက်ပွဲဖြစ်ခဲ့ပြီး စစ်ကောင်စီက လေယာဉ်ဖြင့် နှစ်ကြိမ် ဗုံးကြဲတိုက်ခိုက်ခဲ့ကြောင်း၊ ဗန်းမောက်ရဲစခန်းမှလည်း လက်နက်ကြီးများဖြင့် ရမ်းသန်းပစ်ခတ်နေကြောင်း Banmauk Revolution က ယမန်နေ့တွင် အသိပေးထားသည်။
“မနေ့တုန်းက တိုက်ပွဲဖြစ်တယ်။ လေယာဉ်နဲ့ ဗုံး ၂နေရာ ကြဲသွားတယ်။ အဲဒီဟာပဲရှိပါသေးတယ်။ အထိအခိုက်ကတော့ ဆက်သွယ်ရေးအခက်အခဲကြောင့် မသိရသေးပါဘူး။ အဲဒီဘက်အနေအထားက ဆက်သွယ်ရေးခက်ခဲတဲ့အနေအထားရှိတယ်” ဟုဗန်းမောက် ဒေသခံတစ်ဦးကပြောသည်။
ဗန်းမောက်နယ်အတွင်း လက်ရှိ အခြေအနေမှာ စစ်ရေးတင်းမာနေဆဲဖြစ်ကြောင်း၎င်းကဆိုသည်။
“တင်းမာနေတဲ့အတွက် ဒေသခံပြည်သူတွေစစ်ရှောင်နေရပါတယ်။ စစ်ရှောင်နေရတဲ့အတွက် ကျနော်တို့ဒေသမှာ စစ်ရှောင်တွေအတွက် စားဝတ်နေရေး ရိက္ခာတွေ ကျန်းမာရေး ပြုစုစောင့်ရှောက်မှု လိုအပ်ချက်တွေရှိနေပါတယ်”ဟုဒေသခံတစ်ဦးက ပြောသည်။
စစ်ကောင်စီတပ်သည် ဗန်းမောက်နယ်တွင် SNA တပ်နှင့် ပူးပေါင်းစစ်ရေးလှုပ်ရှားခြင်း၊ ရွာများကို မီးရှို့ခြင်း၊ ကျေးရွာများတွင် တပ်စွဲထားခြင်း ပြုလုပ်ထားသည်ဟုဒေသခံအချို့ကပြောသည်။
“SNAကို စကစကနေလက်နက်တွေတပ်ဆင်ပေးသွာတယ်။ တပ်ဆင်ပေးပြီးတဲ့နောက်မှာSNAကထိုးစစ်ဆင်တာရှိတယ်။ရွာတွေမီးရှို့တာရှိတယ်။ ဗန်းမောက်မြို့ရဲ့ အနောက်ခြမ်းရွာတွေက SNAနဲ့ စကစ ပူးပေါင်းပြီးထိုင်ထားတာ။ ရွာတွေတော်တော်များများကိုလေ ။ အခုဆိုရင် ကျေးရွာတွေကို လူတွေ ခွဲတမ်းချပြီး တပ်အင်အား စုဆောင်းနေတာရှိတယ်” ဟု ဗန်းမောက်နယ်ခံ သတင်းရင်းမြစ်က ပြောသည်။
စစ်ကောင်စီတပ်၏ စစ်ရေးလှုပ်ရှားမှု၊ ကျေးရွာများ မီးရှို့မှုကြောင့် စစ်ရှောင်ပြည်သူများ အခက်အခဲများစွာ ကြုံနေရပြီး အကူအညီများလိုအပ်နေသည်ဟု အသိပေးသည်။
