စစ်ကိုင်းမြို့နယ်ရှိ ပဒူကျေးရွာအား စစ်ကောင်စီတပ်က မီးရှို့ဖျက်ဆီးခဲ့ရာ နေအိမ် ၅၀၀ကျော် မီးလောင်ပျက်စီးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယမန်နေ့ (မေလ ၂၂ ရက်) နေ့လည်က ပဒူရွာတွင် စစ်ကောင်စီတပ်နှင့် ဒေသကာကွယ်ရေးအဖွဲ့များ တိုက်ပွဲဖြစ်ပွားခဲ့ပြီးနောက် စစ်ကောင်စီတပ်က ညနေပိုင်းတွင် မီးရှို့ဖျက်ဆီးခဲ့ခြင်းဖြစ်သည်။
ထိုသို့ မီးရှို့ဖျက်ဆီးမှုကြောင့် ပဒူရွာ ရပ်ကွက် လေးခုရှိ နေအိမ် ၅၀၀ကျော် မီးလောင်ဆုံးရှုံးခဲ့ကြောင်း ဒေသတွင်းလူမှုကူညီရေးလုပ်ကိုင်နေသူများက ပြောသည်။
ထို့အပြင် ပဒူရွာသို့ စစ်သားနှင့်ပျူစောထီးများက မီးလောင်မှုမရှိသည့် နေအိမ်များရှိ အဖိုးတန်ပစွည်းများယူဆောင်သွားကြောင်း၊ ညနေ ၄နာရီခန့်တွင် ပဒူရဲစခန်းမှ လက်နတ်ကြီးသုံးချက်ပစ်ခတ်ခဲ့ကြောင်း ဒေသခံများက ပြောသည်။
“တအုန်းအုန်းနဲ့ ပစ်နေတာ။ အတော်ဝေးဝေးကကို ကြားရတယ်။”ဟု ဒေသခံတစ်ဦးက ပြောသည်။
ယမန်နေ့လည်း ပဒူတိုက်နယ်ရဲစခန်းကို ဒေသကာကွယ်ရေးအဖွဲ့များက စခန်းသိမ်းတိုက်ပွဲဆင်နွှဲခဲ့ပြီး စစ်ကောင်စီက ရဟက်ယာဉ်ဖြင့် အကြိမ်ကြိမ်လာရောက်ပစ်ခတ်ခဲ့၍ PDFများ ပြန်လည်ဆုတ်ခွာခဲ့သည်။
တိုက်ပွဲများတွင် နှစ်ဖက်ထိခိုက်မှုများရှိပြီး ပဒူရွာကို လေကြောင်းတိုက်ခိုက်ပြီးနောက် မီးရှို့ဖျက်ဆီးခဲ့ခြင်း ဖြစ်သည်။
တိုက်ပွဲများကြောင့် ပဒူရွာအနီးရှိ ကျေးရွာ (၈)ရွာထက်မနည်း တိမ်းရှောင်နေရပြီး မတော်တဆမှုများကြောင့် ကလေးတစ်ဦးနှင့် အမျိုးသမီးတစ်ဦး သေဆုံးခဲ့သည်။
