မုန်တိုင်းဒဏ်သင့် ရခိုင်ပြည်သူများ ကူညီပေးနေသည့် စာရေးဆရာကိုဝေဟင်အောင်အပါအဝင် လူအချို့ကို စစ်ကောင်စီက ယနေ့(မေလ ၂၃ရက်) နေ့လည်ပိုင်းက ဖမ်းဆီးခဲ့ကြောင်း ရခိုင်ဒေသခံတစ်ဦးက ပြောသည်။
“စစ်ဆေးနေတုန်းလို့ ကြားပါတယ်”ဟု ရခိုင်ဒေသခံက ကိုဝေဟင်အောင် ဖမ်းဆီးခံရမှုအပေါ် ပြောသည်။
ကိုဝေဟင်အောင် အပါအဝင် သုံးဦးသည် ပုဏ္ဏားကျွန်းမြို့နယ် ကုလားချောင်းရွာသို့ ရေလှူရန် သွားရောက်စဉ် အမြင့်ကျွန်းကျေးရွာအနီး၌ စစ်ကောင်စီ၏ စစ်ဘက်ရေးရာလုံခြုံရေးတပ်ဖွဲ့(စရဖ)က ဖမ်းဆီးခဲ့သည်ဟု မျက်မြင်များကို ကိုးကားပြီး Border News Agencyက ဖော်ပြထားသည်။
ကိုဝေဟင်အောင်သည် ဒေါက်တာအေးမောင်နှင့်အတူ နိုင်ငံတော်ပုန်ကန်မှု၊ နိုင်ငံတော် အကြည်အညိုပျက်စေမှုတို့ဖြင့် ထောင်ဒဏ်ချမှတ်ခံခဲ့ရသူဖြစ်ပြီး စစ်တပ်အာဏာသိမ်းပြီးနောက်ပိုင်း စစ်ကောင်စီက ပြန်လွှတ်ပေးခဲ့သူလည်း ဖြစ်သည်။ မည်သည့်အတွက်ကြောင့် ထိုကဲ့သို့ ဖမ်းဆီးသည်ကို စုံစမ်းနေဆဲဖြစ်သည်။
