ကရင်ပြည်နယ် ၊ကော့ကရိတ်ခရိုင်၊ ကျုံဒိုးမြို့ထဲက ကော့ကာရွာထဲကို စစ်ကောင်စီတပ်က လက်နက်ကြီးနဲ့ ပစ်လို့ ကလေး ၁ ဦးအပါအဝင် အရပ်သား ၃ ဦး ထိခိုက်ဒဏ်ရာရတယ်လို့ KNU က ထုတ်ပြန်ပါတယ်။
KNU တပ်မဟာ ၆ နယ်မြေထဲမှာရှိတဲ့ ကော့ကာရွာထဲကို ပြီးခဲ့တဲ့ တနင်္ဂနွေနေ့ က ကျုံဒိုးမြို့အခြေစိုက် စစ်ကောင်စီရဲ့ အမှတ် ၅၄၆ ခြေမြန်တပ်ရင်းက လက်နက်ကြီးနဲ့ လှမ်းပစ်တာလို့ KNU က ဒီနေ့မှာ ထုတ်ပြန်တာပါ။
လက်နက်ကြီး ကျည် ၂ လုံး ရွာထဲကို ကျရောက်ပေါက်ကွဲခဲ့ပြီး အသက် ၁၅ နှစ်အရွယ်ကလေးနဲ့ အမျိုးသမီး ၂ ဦး ထိခိုက်ဒဏ်ရာရသွားပါတယ်။
ဒါအပြင် နေအိမ် ၆ လုံးလည်း ထိခိုက်ပျက်စီးတယ်လို့ KNU ဆိုပါတယ်။
KNU ရဲ့စာရင်းအရ အခုမေလမှာတင် ကော့ကာရွာဟာ လက်နက်ကြီးနဲ့ပစ်ခတ်ခံရလို့ ဒေသခံ ၆ ဦး ဒဏ်ရာရခဲ့သလို နေအိမ် ၁၀ လုံးပျက်စီးခဲ့ရတယ်လို့သိရပါတယ်။
