စစ်ကိုင်းတိုင်း၊ မြင်းမူမြို့နယ်ရှိ ထီးဆောင်းကျေးရွာတွင် တပ်စွဲထားသည့် စစ်ကောင်စီတပ်ကို အချိန် ၂နာရီခန့်ကြာ ဒရုန်းဖြင့် ဗုံးချတိုက်ခိုက်ခဲ့ကြောင်း ဒေသတွင်း တော်လှန်ရေးအင်အားစုများက ပြောသည်။
ယမန်နေ့ (ဇွန်လ ၄ ရက်) နံနက် ၇နာရီခန့်က မြင်းမူမြို့နယ်၊ မုံရွာ-မန္တလေးလမ်းပေါ်ရှိ ထီးဆောင်းကျေးရွာတွင် အင်အား ၅ဝခန့်ဖြင့် တပ်စွဲထားသည့် စစ်ကောင်စီတပ်ကို ဒရုန်း ခုနစ်စီးဖြင့် ဗုံးသီး ၂၀ကျော်ချ တိုက်ခိုက်ခဲ့ကြောင်း တော်လှန်ရေးအင်အားစုများက ပြောသည်။
ထိုသို့ တိုက်ခိုက်မှုကြောင့် စစ်သား ၅ဦးသေဆုံးပြီး ၁၀ဦး ထိခိုက်ဒဏ်ရာရရှိသွားသည်ဟု တော်လှန်ရေးအင်အားစုများက ဆိုသည်။ သို့သော် သေဆုံးထိခိုက်မှုများနှင့်ပတ်သက်ပြီး လူထုနွေဦးက သီးခြားအတည်မပြုနိုင်ပေ။
“အချိန်က နှစ်နာရီလောက်ကြာတယ်။ ဒရုန်း နှစ်စင်းသုံးစင်းပြန်လွှတ်တာ။ ဒီကောင်တွေ အထိနာလို့စခန်းကိုပါစွန့်ပြီး ထွက်ပြေးရတယ်။ အခုတော့ပြန်ရောက်လာပြီ။ ဒရုန်းမြင်ကွင်းကနေ မြင်ရတာက ဒီကောင်တွေဘန်ကာထဲကနေ အသင့်ယူပြီးစောင့်နေတဲ့အချိန်မှာ ဗုံးသီးကျသွားလို့ ပြန်ထွက်မလာနိုင်ဘဲ ပြန်မထနိုင်တာတွေ တရွတ်တိုက်ဆွဲသွားတာတွေ သေသေချာချာကိုမြင်ရတယ်။”ဟု Moe Nyo Revolution Force အဖွဲ့ တာဝန်ခံတစ်ဦးက ပြောသည်။
အဆိုပါ တိုက်ခိုက်မှုကို ကျောက်ဆည်ခရိုင်တပ်ရင်း – ၁(နဂါးနီတပ်ရင်း)၊ ကျောက်ဆည်ခရိုင်ဒရုန်းတပ်ဖွဲ့၊ မြင်းခြံခရိုင် တပ်ရင်း-၇(Zero ပြောက်ကျားတပ်ဖွဲ့)၊ ရွှေဘိုခရိုင်တပ်ရင်း၁၅၊ မိုးညို (Local PDF) နှင့် MRTF Drone Force တို့က ပူးပေါင်းတိုက်ခိုက်ခဲ့ကြောင်း အသိပေးထားသည်။
တိုက်ခိုက်ခံရပြီးနောက် စစ်ကောင်စီတပ်က ယမန်နေ့တစ်ရက်လုံး လမ်းပိတ်ဆို့စစ်ဆေးခဲ့ပြီး ညနေပိုင်းမှသာ လမ်းပြန်ဖွင့်ပေးခဲ့ကြောင်း နယ်ခံများက ပြောသည်။
ထီးဆောင်းကျေးရွာတွင် တပ်စွဲထားသော စစ်ကောင်စီတပ်သည် မုံရွာ-မန္တလေးလမ်းသွား ခရီးသွားများအား ဖမ်းဆီးစစ်ဆေး မတရားငွေတောင်းမှုများ မကြာခဏ ပြုလုပ်လေ့ရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)