တနင်္သာရီတိုင်း ပုလောမြို့နယ်တွင် စစ်ကောင်စီတပ်က ထိတွေ့တိုက်ပွဲဖြစ်ပွားခြင်းမရှိဘဲ လက်နက်ကြီးဖြင့် ရမ်းသမ်းပစ်ခတ်သောကြောင့် ဒေသခံပြည်သူတစ်ဦး သေဆုံးကာ ရှစ်ဦးထိခိုက်ဒဏ်ရာရခဲ့ကြောင်း ဒေသခံများက People’s Spring သတင်းဌာနသို့ ပြောသည်။
ဇွန် ၇ ရက် ညနေ ၅ နာရီခန့်က ပုလောမြို့တွင်အထိုင်ချထားသော စစ်ကောင်စီတပ်က ကျေးရွာများဘက်သို့ လက်နက်ကြီးများဖြင့် ရမ်းသမ်းပစ်ခတ်ခဲ့ခြင်းဖြစ်ပြီး ယင်းပစ်ခတ်မှုကြောင့် မင်းထိန်ကျေးရွာအတွင်း လက်နက်ကြီးကျည်များ ကျရောက်ပေါက်ကွဲခဲ့ခြင်း ဖြစ်သည်။
ထို့ကြောင့် မင်းထိန်ကျေးရွာမှ အသက်(၅၀)ဝန်းကျင် ဦးဖိုးချောင်းဆိုသူ လက်နက်ကြီးထိမှန် သေဆုံးခဲ့ပြီး အခြားပြည်သူရှစ်ဦးလည်း ထိခိုက်ဒဏ်ရာများရရှိခဲ့သည်ဟု ဒေသခံများက ပြောသည်။
“ညနေ ၅ နာရီလောက်မှာ စစ်ကောင်စီတပ်က လက် နက်ကြီးနဲ့ထုတာ။ မင်းထိန်ရွာထဲကျပြီး တစ်ဦးသေတယ်၊ ရှစ်ဦးဒဏ်ရာရတယ်။ ဘာတိုက်ပွဲမှမရှိဘဲ ရမ်းသမ်းပစ်တာ”ဟု ပုလောမြို့နယ်မှ ဒေသခံတစ်ဦး က People’s Spring သို့ ပြောသည်။
ဇွန် ၁ ရက် နေ့လယ်ပိုင်းကလည်း စစ်တပ်က ပစ်ခတ်သည့် လက်နက်ကြီးကျည်လေးလုံး မင်းထိန်ရွာအတွင်း ကျရောက်ပေါက်ကွဲကာ အသက် (၅၀)ခန့်အရွယ် အမျိုးသမီးတစ်ဦး ထိခိုက်ဒဏ်ရာရခဲ့သေးသည်။
ထိုသို့ သမီးဖြစ်သူ လက်နက်ကြီးထိမှန်ဒဏ်ရာရသည်ကို မြင်တွေ့ခဲ့ရသည့် အသက်(၉၀)ခန့်အရွယ် မိခင်ဖြစ်သူမှာ ရုတ်တရက်နှလုံးရပ်ကာ သေဆုံးခဲ့သည်။
