စစ်ကိုင်းတိုင်း၊ စစ်ကိုင်းနှင့် မြင်းမူမြို့ရှိ ရဲစခန်းနှင့် ကင်းပုန်းများကို တိုက်ခိုက်ရာ စစ်ကောင်စီတပ်ဖွဲ့ဝင်များ ထိခိုက်သေဆုံးမှုရှိကြောင်း ဒေသတွင်းတော်လှန်ရေးအင်အားစုများက ပြောသည်။
ယမန်နေ့(ဇွန်လ ၈ ရက်) ညနေ ၄နာရီခွဲခန့်က စစ်ကိုင်းမြို့နယ်၊ မုံရွာ – မန္တလေးလမ်းပေါ်ရှိ ညောင်ပင်ဝန်းရဲစခန်းကို ဒေသတွင်းတော်လှန်ရေးအင်အားစုများက ဒရုန်းခုနစ်စီးဖြင့် ဗုံးသီး ၁၄ လုံးချ တိုက်ခိုက်ခဲ့ခြင်းဖြစ်သည်။
ထိုသို့တိုက်ခိုက်မှုကြောင့် စခန်းမှူးအပါအဝင် စစ်အုပ်စုဝင် ခုနစ်ဦးသေဆုံးကြောင်း၊ ပြည်သူ့ရဲဘော်များမှာမူ အထိအခိုက်မရှိကြောင်း Zero ပြောက်ကျားတပ်ဖွဲ့၏ ရဲဘော်တစ်ဦးက ပြောသည်။
သို့သော် စစ်ကောင်စီတပ်၏ ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
အဆိုပါ စစ်ဆင်ရေးကို မြင်းခြံခရိုင်တပ်ရင်း(၇) Zeroပြောက်ကျားတပ်ဖွဲ့၊ ကျောက်ဆည်ခရိုင်တပ်ရင်း(၁)နဂါးနီတပ်ရင်း၊ရွှေဘိုတပ်ရင်း (၁၅) ၊ ဆားတောင်မိုးကြိုး LPDF နှင့် အောင်သပြေညီနောင်LPDFအဖွဲ့များ ပူးပေါင်းတိုက်ခိုက်ခဲ့ကြကြောင်း အသိပေးထားသည်။
ဇွန်လ ၇ ရက် နံနက် ၇နာရီခန့်ကလည်း မြင်းမူမြို့၊ မြို့မရဲစခန်းအနီးရှိ စစ်ကောင်စီတပ်၏ ကင်းပုန်းစခန်းကို လက်ပစ်မိုင်းဖြင့် ဖောက်ခွဲတိုက်ခိုက်ခဲ့ရာ မိနစ်အနည်းငယ် အပြန်အလှန် ပစ်ခတ်တိုက်ခိုက်မှုဖြစ်ခဲ့ကြောင်း Moe Nyo Revolution Force-MNRF တပ်ဖွဲ့၏ ခေါင်းဆောင် ကိုမိုးညိုက ပြောသည်။
တိုက်ခိုက်မှုတွင် ရဲများထိခိုက်မှုရှိပြီး ပြည်သူ့ကာကွယ်ရေးရဲဘော်တစ်ဦး ကျည်ထိမှန်ဒဏ်ရာရရှိခဲ့ကြောင်း ၎င်းက ပြောသည်။
“ကင်းပုန်းဝပ်နေတာ သတင်းရလို့ သွားခွဲတာပါ။ စခန်းနဲ့နီးနီးလေး။ ခုနစ်ကောင်လောက်ရှိတယ်။ ကျွန်တော်တို့မြို့ပေါ်လုပ်ငန်းလုပ်ဖို့ တက်လာတာကို သတင်းရသွားလို့နေမှာ ကင်းပုန်းဝပ်တာ။ နှစ်ဖက်အပြန်အလှန်ပစ်တယ်။ ၃ မိနစ်ကျော်တယ်။ ရဲဘော်တစ်ယောက်တော့ ထိသွားတယ်။”ဟု ကိုမိုးညိုက ဆိုသည်။
တိုက်ခိုက်ခံရပြီးနောက် စစ်ကောင်စီတပ်သည် ယမန်နေ့က မြို့ပေါ်၌ ရမ်းသမ်းပစ်ခတ်မှုများရှိပြီး ၎င်းတို့၏ ပစ်ခတ်မှုကြောင့် ပြည်သူတစ်ဦးကျည်ထိခဲ့ကြောင်း ဒေသခံများက ပြောသည်။
ပြီးခဲ့သည့် မေလ ၃ရက်ကလည်း ညောင်ပင်ဝန်းရဲစခန်းကို ဒရုန်း ၅စီးဖြင့် ဗုံးသီး၉လုံးချ တိုက်ခိုက်ခဲ့ကြောင်း ဒေသတွင်းတော်လှန်ရေးအင်အားစုများက ထုတ်ပြန်ထားသည်။
