ပြည်တွင်းရွှေဈေးတစ်ကျပ်သားလျင်ကျပ် ၃၁သိန်းကျော်အထိယနေ့ မြင့်တက်လာကြောင်းပြည်တွင်းရွှေဈေးကွက်အတွင်းမှစုံစမ်းသိရသည်။
ဒေါ်လာဈေးမြင့်တက်လာခြင်းနှင့်မိုးတွင်းကာလရွှေထွက်လျော့နည်းလာခြင်းကြောင့် ယခုကဲ့သို့မြင့်တက်လာခြင်းဖြစ်သည်ဟု ရွှေလုပ်ငန်းရှင်များကပြောသည်။
ဇွန်၉ရက်တွင် အခေါက်ရွှေတစ်ကျပ်သားကိုကျပ် ၃၁သိန်းကျော်( ၃,၁၁၀,၀၀၀ )အထိမြင့်တက်လာပြီး ထိုဈေးနှုန်းသည် လေးရက်အတွင်း ကျပ် ခြောက်သောင်းကျော်မြင့်တက်လာခြင်းဖြစ်သည်ဟု လုပ်ငန်းရှင်များက ပြောသည်။ ဇွန် ၅ ရက်က အခေါက်ရွှေတစ်ကျပ်သားလျင် ကျပ် ၃,၀၅၀,၀၀၀ ပေါက်ဈေးရှိခဲ့သည်။
“တစ်ကျပ်သားကို ကျပ် ၃၅ သိန်းအထိ ပြန်တက်မယ်လို့ ခန့်မှန်းနေကြတယ်၊”ဟု ရွှေလုပ်ငန်းရှင်တစ်ဦးကပြောသည်။
ဒေါ်လာဈေးမှာ ဇွန် ၅ ရက် တစ်ဒေါ်လာကိုကျပ် ၂၉၂၅ကျပ်ရှိပြီး ယနေ့(ဇွန် ၉ ရက်)တွင် တစ်ဒေါ်လာလျင် ကျပ် ၂၉၇၀ အထိမြင့်တက်လာသည်။
ထိုသို့ ရွှေဈေးများ မြင့်တက်လာသော်လည်း ရွှေဆိုင်များက စစ်ကောင်စီရောင်းခိုင်းသည့်တစ်ကျပ်သားကို ၂၉ သိန်းဖြင့်သာ ပြန်လည်ဝယ်ယူနေသည်ဟု ရွှေအရောင်းအဝယ်သမားကပြောသည်။
“ရွှေဈေးတက်ပေ့မယ် သူတို့ (ရွှေဆိုင်)ရောင်းရင် ၃၁ သိန်း၊ သူတို့ဆီကိုရောင်းရင် ၂၉ သိန်းပဲပေးတယ်”ဟု ရွှေအရောင်းအဝယ်သမားတစ်ဦးကပြောသည်။
ပြင်ပဈေးကွက်တွင်ရွှေဈေးမြင့်တက်လာသော်လည်းရန်ကုန်တိုင်းရွှေလုပ်ငန်းရှင်များအသင်းကမူ ရွှေတစ်ကျပ်သားကို ကျပ် ၂၃ သိန်းသတ်မှတ်ထားသည်။
စစ်တပ်ကသိမ်းယူပြီးနောက်ကျပ်ငွေတန်ဖိုးစံချိန်တင်ကျဆင်းခဲ့ပြီး ဒေါ်လာဈေးနှင့် ရွှေဈေးမြင့်တက်လာသည်။ စစ်တပ်အာဏာမသိမ်းခင်က အမေရိကန်တစ်ဒေါ်လာလျင် ကျပ် ၁,၃၃၅ ကျပ်နှင့် အခေါက်ရွှေတစ်ကျပ်သားလျင် ၁၃သိန်းကျော်( ၁,၃၁၆,၀၀၀ )ကျပ်သာ ရှိခဲ့သည်။
