ပဲခူးတိုင်း၊ ဒိုက်ဦးမြို့နယ်၊ ကျိုက်ဇကော ထောင်မှာ ဖမ်းဆီးခံထားရတဲ့ ဗကသ ကျောင်းသား ကိုခန့်လင်းနိုင်ကို စစ်ကောင်စီက သတ်ဖြတ်လိုက်တယ်လို့ ဗကသများအဖွဲ့ချုပ်က ဒီနေ့မနက်ပိုင်းမှာအသိပေးပါတယ်။
ပြီးခဲ့တဲ့ မေလ ၂၈ ရက်က ကိုခန့်လင်းနိုင်အပါအဝင် နိုင်ငံရေးအကျဉ်းသား ၄ဦးကို ထောင်ထဲကနေ စစ်ကောင်စီတပ်က ခေါ်ထုတ်သွားပြီးနောက်အဆက်အသွယ်ပြတ်တောက်သွားတာပါ။
အဆက်အသွယ်ပြန်ရချိန် မှာတော့ ကိုခန့်လင်းနိုင် စစ်တပ်လက်ချက်နဲ့သေဆုံးသွားပြီဆိုတာကို မနေ့ ဇူလိုင်လ ၇ ရက်မှာ သိရတာလို့ ဗကသများအဖွဲ့ချုပ်ကဆိုပါတယ်။
” မနေ့ညကမှ ကိုခန့်လင်းနိုင် ကျသွားပြီ ဆိုတဲ့ သတင်းကို ကြားရတာပါ။ ကျွန်တော်လည်း မယုံနိုင်လို့ မဟုတ်ပါစေနဲ့ ဆုတောင်းနေတာ ဆုတောင်းမပြည့်ခဲ့ဘူး။ ဒီမနက် ဗကသအဖွဲ့ချုပ်မှာလည်း ကိုခန့်လင်းနိုင် ကျသွားတဲ့ သတင်း တင်ထားတာ တွေ့ပါတယ်။ ဖြစ်စဥ်အသေးစိတ်ကိုတော့ သေချာမသိရသေးဘူး။ စုံစမ်းနေကြတုန်းပါပဲ ” လို့ တော်လှန်ရေးအင်အားစုမှ ကျောင်းသားတစ်ဦးက ပြောပါတယ်။
ပဲခူးခရိုင် ဗကသ ဒုဥက္ကဋ္ဌ ကိုခန့်လင်းနိုင်ကို စစ်ကောင်စီတပ်က ၂၀၂၁ ခုနှစ် ဒီဇင်ဘာလ အတွင်းဖမ်းဆီးခဲ့တာပါ။
အဲဒီနောက်အကြမ်းဖက်ပုဒ်မနဲ့ ထောင်ဒဏ် ၁၅ နှစ်ချထားတာဖြစ်ပါတယ်။
မုံရွာထောင်မှာလည်း ဗကသ ကျောင်းသား ကိုနိုင်ထွန်းဦးကို စစ်ကောင်စီတပ်က ပြီးခဲ့တဲ့ ဖေဖော်ဝါရီလအတွင်း ထောင်ကနေ ခေါ်ထုတ်သွားပြီး ဒီနေ့ထိ အဆက်အသွယ်ပြတ်တောက်နေတယ်လို့သိရပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)