“ကလေးတွေကျောင်းပိတ်ရက်မို့လို့ရယ်၊ ဒေသခံတွေကတောင်ယာကိုသွားနေလို့ ဒီလောက်ပဲထိခိုက်တာ။မဟုတ်ရင် တော်တော်ကို အထိအခိုက်များမှာ”-ဒေသခံတစ်ဦး
မင်းတပ်မြို့နယ်၊ ဝုမ်းခုမ်ရွာကို စစ်ကောင်စီတပ်က ယနေ့လေကြောင်းမှ ဗုံးကျဲတိုက်ခိုက်ရာ အသက်ရှစ်နှစ်အရွယ်ကလေးငယ်အပါအဝင်အမျိုးသမီး သုံးဦး သေဆုံးခဲ့ပြီး တစ်ဦးဒဏ်ရာရရှိခဲ့သည်။
မရှိန်းလှော်ကျေးရွာအုပ်စု၊ဝုမ်းခုမ်ရွာကို ဇူလိုင် ၈ ရက် နံနက် ၁၁ နာရီခွဲခန့်တွင် စစ်ကောင်စီတပ်က ဂျက်ဖိုက်တာဖြင့် ဗုံးကြဲတိုက်ခိုက်ခြင်းဖြစ်ကြောင်းချင်းပြည်သူ့ကာကွယ်ရေးတပ်ဖွဲ့ ဟု CDF- Mindat တာဝန်ရှိသူတစ်ဦးကပြောသည်။
ဂျက်ဖိုက်တာလေယာဉ်ဖြင့် ဗုံးနှစ်လုံးကျဲချပြီး မင်းတပ်မြို့ပေါ်ရှိ ခလရ (၂၇၄)ကလဘ်းလက်နက်ကြီးများဖြင့်ပစ်ခတ်တိုက်ခဲ့ခြင်းကြောင့် ယခုလိုသေဆုံးရခြင်းဖြစ်သည်ဟု ဒေသခံအချို့ကလည်းပြောသည်။
ထိုတိုက်ခိုက်မှုကြောင့် အသက် ၈နှစ်အရွယ်ကလေးငယ်တစ်ဦး ၊ အသက် ၂၈ နှစ်အရွယ်ရှိ နို့တိုက်ကလေးမိခင်တစ်ဦး နှင့် အသက် ၆၀ ခန့်အရွယ်အမျိုးသမီး၊ စုစုပေါင်း သုံးဦးသေဆုံးခဲ့သည်ဟု ၎င်းကပြောသည်။
” စာသင်ကျောင်းကိုပါဗုံးကြဲသွားတာ။သတင်းမှားကြောင့် လာကြဲတာထင်တယ်။ သေဆုံးတဲ့ ကလေးက ခေါင်းတောင်မရှိတော့ဘူးဗျာ” ဟု CDF- Mindat တာဝန်ရှိသူက ပြောသည်။
ဒေသခံတစ်ဦးကလည်း “ကလေးတွေကျောင်းပိတ်ရက်မို့လို့ရယ်၊ ဒေသခံတွေကတောင်ယာကိုသွားနေလို့ ဒီလောက်ပဲထိခိုက်တာ။မဟုတ်ရင် တော်တော်ကို အထိအခိုက်များမှာ ” ဟု ပြောသည်။
သေဆုံးခဲ့သူသုံးသည် ထိုနေရာတွင်ပွဲချင်းပြီးသေဆုံးခဲ့ခြင်းဖြစ်ပြီး အသက်၅၀အရွယ် အမျိုးသားတစ်ဦးလည်း ထိခိုက်ဒဏ်ရာရရှိခဲ့သည်ဟု မင်းတပ်မြို့နယ်၊ ပြည်သူ့အုပ်ချုပ်ရေးအဖွဲ့က ထုတ်ပြန်ထားသည်။
“စစ်ကောင်စီတပ်က စာသင်ကျောင်းနဲ့ အနီးပတ်လည်ကို ဦးတည်ပြီး ပစ်သွားတာ စာသင်ကျောင်းကတော့ အကုန်လုံးပျက်စီးသွားတယ်။ နေအိမ်တော်တော်များများလည်း ပျက်စီးသွားတယ်”ဟု ဒေသခံတစ်ဦးကပြောသည်။
စစ်ကောင်စီ၏ လေကြောင်းတိုက်ခိုက်မှုကြောင့် ဝုမ်းခုမ်ရွာစာသင်ကျောင်းနှင့် နေအိမ် ဆယ်လုံးခန့် ပျက်စီးသွားခဲ့သည်ဟု CDF- Mindat ထံမှသတင်းရရှိသည်။ ဒဏ်ရာရသူမှာ အမျိုးသားတစ်ဦးဖြစ်ပြီး ဆေးကုသမှုခံယူနေရကြောင်းသိရသည်။
●အချက်အလက်နှင့်သတင်းဓါတ်ပုံများထပ်မံဖြည့်စွက်ထားပါသည်။
