▪︎အဆိုပါစစ်ကြောင်းကို တော်လှန်ရေးအဖွဲ့များကလက်နက်ကြီးများဖြင့်တစ်နာရီခွဲခန့်ကြာအောင်ပစ်ခတ်တိုက်ခိုက်
လက်ပံတောင်းတောင်ကြေးနီစီမံကိန်းရှိ ယန်စီကုမ္ပဏီဝင်းမှထွက်လာသော စစ်ကောင်စီစစ်ကြောင်းက ကလေးတစ်ဦးအပါအဝင် ပြည်သူ ၃ ဦးကို ပစ်ခတ်သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ဇူလိုင်လ ၆ ရက်နေ့မွန်းလွဲပိုင်းက စစ်ကိုင်းတိုင်း၊ယင်းမာပင်မြို့နယ် ရှိယန်စီကုမ္မဏီမှထွက်ခွာလာသော အင်အား ၉ဝခန့်ပါ စစ်ကောင်စီစစ်ကြောင်းသည် အင်ကြင်းတောင်အနီး၌ ပြည်သူ ၂ ဦးကို သေနတ်ဖြင့်သတ်ဖြတ်ခဲ့ကြောင်း ယင်းမာပင်မြို့နယ်သတင်းမှန်ပြန်ကြားရေးအဖွဲ့က ပြောသည်။
ထို့အပြင် ၎င်းတို့စစ်ကြောင်းဆက်ထွက်လာပြီး ပစ်ခတ်မှုကြောင့် ရွာသာ(ကြီး)ကျေးရွာမှ အသက် ၅ နှစ်အရွယ် ကလေးတစ်ဦး သေဆုံးခဲ့ရကြောင်း အထက်ပါအဖွဲ့က ပြောသည်။
ထိုစစ်ကြောင်းသည် ယင်းမာပင်မြို့ပေါ်သို့ ရောက်ရှိပြီးနောက် မြို့အရှေ့ပိုင်းရှိ စာသင်ကျောင်းအတွင်း တပ်စွဲခဲ့သည်။
ထိုစစ်ကောင်စီတပ်ကို ယမန်နေ့( ဇူလိုင်လ ၇ ရက်)နေ့ ည ၉ နာရီခွဲခန့်က ယင်းမာပင်မြို့အရှေ့ပိုင်းရှိ စာသင်ကျောင်းအတွင်း တပ်စွဲထားရာ ဒေသတွင်းတော်လှန်ရေးအင်အားစုများကလက်လုပ် ၆၀မမ (၄၅)လုံးခန့်ဖြင့် သွားရောက်ပစ်ခတ်တိုက်ခိုက်ခဲ့ကြောင်း ၎င်းတို့ကပြောသည်။
ပစ်ခတ်မှုကြောင့် စစ်ကောင်စီ တပ်ဖွဲ့ဝင်များ ထိခိုက်သေဆုံးမှုရှိနိုင်ပြီး ယင်းမာပင်မြို့နယ် အရှေ့မြောက်ခြမ်းရှိ ရဲတပ်ရင်း(၂၈) မှ ၂၅မိုင်အကွာအဝေးအထိရောက်သော ၁၂၀မမ လက်နက်ကြီးဖြင့် ပစ်ကူပေးခဲ့သည်ဟု ရဲဘော်များက ဆိုသည်။
စစ်အုပ်စုက လက်နက်ငယ်များဖြင့် ပြန်ပစ်သော်လည်း ကာကွယ်ရေးတပ်ဖွဲ့ဝင်များအထိအခိုက်မရှိဘဲ ည ၁၁ နာရီခန့်တွင် ပြန်လည်ဆုတ်ခွာခဲ့ကြောင်း တော်လှန်ရေးအင်အားစုများက အသိပေးသည်။
“စကစဘက် အထိအခိုက်ရှိတာတော့ သေချာတယ်ဗျ။ ဘာလို့လဲဆိုတော့ပုံမှန်ဆိုသွားတိုက်တဲ့နေရာမှာရှိတဲ့ စကစတွေကပဲ ပြန်ပစ်တာ။ အခုဟာက ရဲတပ်ရင်း(၂၈)ကပါလက်နက်ကြီးပစ်ကူပစ်ပေးရတော့ အထိအခိုက်ရှိတာတော့သေချာတယ်။”ဟု အာဏာရှင်တော်လှန်ရေးပြည်သူ့တပ်မတော် DRPA၏ ပြန်ကြားရေးတာဝန်ခံက ပြောသည်။
ထိုကျောင်းသည်ကျောင်းဖွင့်လှစ်စာသင်ကြားခြင်းမရှိဘဲ စစ်ကောင်စီတပ်က အင်အား ၁၅၀ ကျော်ဖြင့် တပ်စွဲထားသော စစ်စခန်းနေရာဖြစ်သည်။ ယင်းမာပင်နယ်သည် ပြည်သူ့ခုခံစစ် အားကောင်းရာဒေသဖြစ်၍ ဒေသခံကလေးငယ်များသည် ပြည်သူ့အခြေပြုကျောင်းများတွင်သာ ပညာသင်ကြားနေကြောင်း တော်လှန်ရေးအင်အားစုများက ရှင်းပြသည်။
စာမသင်သည့်ကျောင်းအဆောက်အအုံတွင် တပ်စွဲထားသော စစ်ကောင်စီတပ်ကိုသာ တိုက်ခိုက်ခြင်းဖြစ်ကြောင်း ၎င်းတို့က ရှင်းပြသည်။
ထိုစစ်ဆင်ရေးကို ယင်းမာပင်ခရိုင် တပ်ရင်းအမှတ်(၃၀)DRPA၊ တပ်ခွဲ(၄) Black Shadow PDF၊ ယင်းမာပင်ခရိုင် တပ်ရင်းအမှတ်(၁) ၊တောသားကြီးပြည်သူကာကွယ်ရေးတပ်ဖွဲ့၊ဘာမထီပွဲတိုင်းကျော်၊တဇောက်ကန်းဘဂျမ်း၊Power 54၊YinmarbinFighter Brotherhood Guerrilla Army တို့က အင်အား ၅၀ ကျော်ဖြင့် ပူးပေါင်းတိုက်ခိုက်ခဲ့ကြောင်း အသိပေးထားသည်။
