▪︎စေတီအချို့နှင့် စာသင်ဆောင်များပျက်စီး
စစ်ကိုင်းတိုင်း၊ ရေဦးမြို့နယ်၊ ရေမျက်ကျေးရွာရှိ ဘုန်းကြီးကျောင်းနှင့် စာသင်ကျောင်းအား စစ်ကောင်စီတပ်က ယနေ့ ဂျက်ဖိုက်တာ ၂ စီးဖြင့်လေကြောင်းမှ ပစ်ခတ်တိုက်ခိုက်ခဲ့ရာ စေတီအချို့နှင့် စာသင်ဆောင်ပျက်စီးသွားကြောင်း ဒေသခံများက ပြောသည်။
ယနေ့( ဇူလိုင်လ ၁၀ ရက်) နံနက် ၉ နာရီခွဲဝန်းကျင်က တံတားဦးမှတက်လာသော ဂျက်ဖိုက်တာ ၂စီးသည် ရေဦးနယ်အနောက်ခြမ်း ရေမျက်ကျေးရွာကို လေကြောင်းမှတိုက်ခိုက်သွားခြင်းဖြစ်ကြောင်း ဒေသတွင်းသတင်းရင်းမြစ်များက ပြောသည်။
ထိုဂျက်ဖိုက်တာသည် ရေမျက်ကျေးရွာသို့ ပေါင် ဗုံး ၃ လုံး ဖြင့်ကျဲချပြီး သေနတ်ဖြင့်ကပါပစ်ခတ်သဖြင့် စာသင်ဆောင်နှင့် ဘုန်းကြီးကျောင်းအနီးတစ်လုံး၊ ရွာအပြင်၌ တစ်လုံး ကျရောက်ပေါက်ကွဲခဲ့ကြောင်း၊ ကျန်တစ်လုံးမှာ ဓမ္မာရုံပေါ်ကျရောက်ခဲ့ပြီး မကွဲကြောင်း ရေဦးမြို့နယ် ပကဖခေါင်းဆောင် ဆရာဦးမြင့်ထွေးက ပြောသည်။
“စာသင်ဆောင်နဲ့ ဘုန်းကြီးကျောင်းစပ်ကြားကို တရစပ်ပစ်သွားတယ်။ သစ်ပင်သစ်ကိုင်းတွေ ပျက်စီးတယ်။ အဆောက်အဦးရဲ့ စာသင်ဆောင်တွေ မှန်တွေ ပျက်စီးသွားတယ်။ အနည်းဆုံး ပေါင် ၅၀၀ လောက်ယူဆရတဲ့လက်နက်ကြီးနဲ့ ပစ်သွားတာ။ မပေါက်ကွဲသေးတဲ့တစ်လုံးလည်း တွေ့တယ်။ စက်သေနတ်နဲ့ရော့ကတ်နဲ့ပစ်တဲ့သဘောရှိတယ်။ ထန်းပင်လိုဟာမျိုး ခါးကနေပြတ်ကျသွားတာရှိတယ်။”ဟု ၎င်းက ပြောသည်။
ဘုန်းကြီးကျောင်းရှိ စေတီတစ်ဆူ ထီးတော်ပြတ်ကျသွားပြီး ကျန်ငါးဆူခန့်လည်း ပျက်စီးမှုရှိကြောင်း သိရသည်။
လက်ရှိ ပြည်သူများမှာ ထွက်ပြေးတိမ်းရှောင်နေရပြီး လူထိခိုက်မှုအခြေအနေ မသိရသေးကြောင်း ဒေသခံများက ပြောသည်။
ရေဦးနယ်အနောက်ခြမ်းရှိ ပြည်သူများအနေဖြင့် လေကြောင်းအန္တရာယ် အထူးနားစွင့် ဂရုစိုက်ကြရန်နှင့် အကာကွယ်ကောင်းသည့်နေရာများတွင်သာ တိမ်းရှောင်ထားပေးကြရန် ရေဦးအခြေပြု People’s Defense Comradeအဖွဲ့က သတိပေးထားသည်။
