လွိုင်ကော်-မိုးဗြဲ နှင့် လွိုင်ကော် – ဆီဆိုင် လမ်းမကြီး၌ အချိန်မရွေးတိုက်ပွဲ ဖြစ်နိုင်ကြောင်း ကရင်နီအမျိုးသားများကာကွယ်ရေးတပ် KNDF တပ်ရင်း ၂ ကယနေ့ထုတ်ပြန်သည်။
နေ့စဥ် တိုက်ပွဲများဖြစ်ပွားလျက်ရှိသည့်ကရင်နီ(ကယား)ပြည်နယ်၏ စစ်ရေးအခြေအနေအရ လွိုင်ကော်-မိုးဗြဲ နှင့် လွိုင်ကော်ဆီဆိုင်လမ်းပိုင်းတွင်လည်း စစ် ကောင်စီက နည်းလမ်းပေါင်းစုံဖြင့် စစ်ရေးလှုပ်ရှားမှုများပြုလုပ်နေသည်ဟု သိရသည်။
ထို့ကြောင့် စစ်ရေးအခြေနေများ တင်းမာနေသည့်အတွက် အချိန်မရွေးတိုက်ပွဲများ ဖြစ်ပွားနိုင်ကြောင်းဇူလိုင် ၁၈.ရက်တွင်အသိပေးသည်။
“ဒီနေ့ (ဇူလိုင် ၁၈ ) ညနေပိုင်းလောက်ကပဲ လွိုင်ကော်-မိုးဗြဲ လမ်း ကို စကစ ဘက်က လက်နက်ကြီးနဲ့ လေးကြိမ်လောက် ပစ်တယ်။မနေ့က ညပိုင်းဆိုလည်း လွိုင်ကော်ရဲ့ ဒေါ်ဆော်ဘီရွာ နားကို လေယာဥ်နဲ့ ဗုံးကျဲတယ်။ရှမ်းဘက်က ထောက်ပို့ ဆင်းချင်လို့ လမ်း ကြောင်းရှင်းတာလား ဒါမှမဟုတ် လွိုင်ကော်ကို ကာဖို့အတွက် နီးစပ်ရာ လျှောက်ပစ်နေတာလားဆိုတာ တော့သေချာမသိနိုင်သေးဘူး”ကရင်နီစစ်ရေးသတင်းရင်းမြစ်က လူထုနွေဦးသို့ ပြောသည်။
လက်ရှိစစ်ရေးအခြေအနေကြောင့် လွိုင်ကော်- မိုးဗြဲ နှင့် လွိုင်ကော်- ဆီဆိုင်လမ်းမကြီးကို ပြည်သူများ အနေဖြင့် ဇူလိုင် ၁၈ ရက် မှစတင်ကာ ဇူလိုင် ၂၈ ရက်နေ့အထိ ကားကြီး (ဆယ်ဘီးကား ၊ ကုန်ကား ၊ တွဲကား ၊ဒန်ဘာ ၊ မိုးကာအုတ်) များ လုံးဝ သွားလာခြင်းမပြုလုပ်ကြရန် နှင့် ကားငယ်များဖြင့် မဖြစ်မနေသွားလာရန် လိုအပ်ပါက ကားမှန်များ ချထားပြီး သွားပေးကြရန် KNDF က သတိပေးသည်။
နယ်မြေလုံခြုံရေးနှင့် စစ်ရေးအခြေအနေအရ မိဘပြည်သူများ အနေဖြင့် မဖြစ်မနေ လိုက်နာပေးကြပါရန်မေတ္တာရပ်ခံလိုပြီး သွားလာနိုင်မည့် အချိန်နှင့် နေ့ရက်အား ပြန်လည်အသိပေးသွားမည်ဖြစ်ဟု မေတ္တာရပ်ခံထားသည်။ ထုတ်ပြန်ချက် အတိုင်းလိုက်နာမှုမရှိပါကလည်း ဖြစ်ပေါ်လာမည့် မည်သည့်ပြသနာအကြောင်းအရာများ တာဝန်ယူပေးမည်မဟုတ်ကြောင်းလည်းဖော်ပြထားသည်။
