ထိခိုက်သေဆုံးရှိနိုင်ဟု ပကဖပြော
မန္တလေးတိုင်း သပိတ်ကျင်းမြို့နယ်တွင် စစ်ကောင်စီတပ် လှည့်ကင်းများကို နှစ်ရက်ဆက် မိုင်းခွဲတိုက်ခိုက်ခဲ့ကြောင်း သပိတ်ကျင်းမြို့နယ်(ပကဖ)၊ ကြာညှပ်ပြည်သူ့ကာ ကွယ်ရေးအဖွဲ့မှ တာဝန်ရှိသူတစ်ဦးက ပြောသည်။
ယမန်နေ့(ဇူလိုင် ၁၉ရက်)နံနက် ၇ နာရီကျော်က သပိတ်ကျင်းမြို့နယ် ကိုးပင်ကျေးရွာအနီးသို့ နာရေးကားတစ်စီးဖြင့် ရောက်ရှိလာသော စစ်ကောင်စီတပ်သားများကို မိုင်းဆွဲတိုက်ခိုက်ခဲ့ရာ ထိခိုက်သေဆုံးမှုရှိနိုင်ပြီး အတိအကျအား မသိရသေးဟု ဆိုသည်။
အလားတူ ဇူလိုင် ၁၈ရက် ည ၁၀နာရီခန့်ကလည်း ကြာညှပ်တိုက်နယ် စစ်ကောင်စီစစ်ဆေးရေးဂိတ် မှ စစ်ကောင်စီတပ်သားအချို့ကို ဒိုင်နာကားဖြင့်တင်ဆောင်၍ ကိုးပင်ရွာအနီး ကင်းပုန်းလာချစဥ် သပိတ်ကျင်း (ပကဖ)၊ ကြာညှပ်ပြည်သူ့ကာကွယ်ရေးအဖွဲ့က မိုင်းဆွဲတိုက်ခိုက်ခဲ့သည်။
“တိုက်ခိုက်မှု နှစ်ကြိမ်စလုံးမှာ စကစတွေဘက်က ထိခိုက်သေဆုံးမှုရှိနိုင်ပါတယ်။ ဒီကောင်တွေဘက်က ပြန်ခုခံနိုင်တာ မရှိခဲ့ပါဘူး”ဟု ကြာညှပ်ပြည်သူ့ကာကွယ်ရေးအဖွဲ့မှ တာဝန်ရှိသူတစ်ဦးက People’s Spring သို့ ပြောသည်။
တိုက်ခိုက်ခံရမှုများကြောင့် စစ်ကောင်စီတပ်ဘက်မှ စစ်ရေးလှုပ်ရှားမှုများရှိလာနိုင်ပြီး သပိတ်ကျင်း-ဗန်းမော်လမ်းပိုင်းအား အသုံးပြုမည့်ပြည်သူများအနေဖြင့် ကားများကို မှန်ချမောင်နှင်ကြရန်နှင့် သတိပေးချက်များအား လိုက်နာပေးကြရန် သပိတ်ကျင်း ပကဖ၊ ကြာညှပ်ပြည်သူ့ကာကွယ်ရေးအဖွဲ့က မေတ္တာရပ်ခံထားသည်။
သပိတ်ကျင်းမြို့နယ်တွင် စစ်ရေးတိုက်ခိုက်မှုများ ဖြစ်ပေါ်လျှက်ရှိရာ ဇူလိုင် ၈ ရက် နေ့လယ်ပိုင်းက စစ်ကောင်စီတပ်နှင့် ကြာညှပ်ပြည်သူ့ကာကွယ်ရေးအဖွဲ့တို့ ထိတွေ့တိုက်ပွဲ ဖြစ်ပွားခဲ့သေးသည်။
