▪︎ ရွာပေါင်း၂၀ခန့်မှ စစ်ရှောင်ပြည်သူ ၅၀၀၀ကျော် ထွက်ပြေးနေရ
စစ်ကိုင်းတိုင်း၊ ရေဦးမြို့နယ်တွင် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လက်နက်ကြီးဖြင့် ပစ်ခတ်မှုကြောင့် ကလေးတစ်ဦးသေဆုံးကာ ၄ ဦး ဒဏ်ရာရရှိခဲ့ကြောင်း ဒေသတွင်းသတင်းရင်းမြစ်များက ပြောသည်။
ယနေ့(ဇူလိုင်လ ၁၉ ရက်နေ့) နံနက်ပိုင်းက ရေဦးမြို့တွင် အထိုင်ချတပ်စွဲထားသော ခမရ ၇၀၂ ၇၀၈ ပူးပေါင်းစစ်ကြောင်းမှ အင်အား ၁၀၀ကျော်သည် ရေဦးနယ်တောင်ခြမ်းရှိ ဆည်ကြီး၊ ပေါက်သာ၊ ဇိန့်ဇွန်းကျေးရွာများအား စစ်ကြောင်းထိုးခဲ့သည်။
ထိုစစ်ကြောင်းအတွက် ရေဦးတိုင်းရင်းဆေးရုံအတွင်းရှိ စစ်ကောင်စီတပ်က ၁၂၀မမ လက်နက်ကြီး၂ချက်ပစ်ကူပေးခဲ့ရာ ခင်ဦးနယ်၊ သက်ပေးရွာနှင့် ဒီပဲယင်းနယ် ညောင်လှရွာဘက် ကျရောက်ပြီး လူကြီး ၂ ဦး၊ ရဲဘော်၂ဦးနှင့် ၅ နှစ်အရွယ် ကလေးတစ်ဦး ဒဏ်ရာအပြင်းအထန်ရရှိခဲ့ကြောင်း ရေဦးအခြေပြုPeople’s Defense Comrade ပြန်ကြားရေးတာဝန်ခံ ကိုထူးခန့်ဇော်(အမေ့သား)က ပြောကြားသည်။
သို့သော် ကလေးငယ်မှာ ရရှိထားသောဒဏ်ရာများကြောင့် သေဆုံးခဲ့ကြောင်း သိရသည်။
“တစ်လုံးက ခင်ဦးအနောက်ခြမ်း သက်ပေးရွာမှာကျတယ်။ လူကြီး ၂ဦး၅နှစ်အရွယ်ကလေးငယ်တစ်ဦးဒဏ်ရာအပြင်းအထန်ရခဲ့လို့ ဆေးကုသွားရင်း လမ်းမှာ ၅နှစ်အရွယ်ကလေးတစ်ဦး သေဆုံးခဲ့ရတယ်။ လူကြီး၂ဦးကတော့ ဆေးကုသမှုခံယူနေတယ်။ နောက်တစ်လုံးက ဒီပဲယင်းအရှေ့ခြမ်း ညောင်လှရွာမှာ ကျတယ်။ရဲဘော်၂ယောက် ထိခိုက်ဒဏ်ရာရခဲ့တယ်။မစိုးရိမ်ရဘူး။”ဟုကိုထူးခန့်ဇော်က ပြောသည်။
စစ်ကောင်စီစစ်ကြောင်းထိုးလာ၍ ရေဦးနယ်တောင်ဘက်ခြမ်းနှင့် ဒီပဲယင်းအရှေ့ခြမ်းရှိ ရွာပေါင်း၂၀ခန့်မှ စစ်ရှောင်ပြည်သူ ၅၀၀၀ကျော် ထွက်ပြေးနေရကြောင်း ဒေသတွင်းသတင်းရင်းမြစ်များက ပြောသည်။
ထိုစစ်ကြောင်းသည် ရေဦးနယ်တောင်ဘက်ခြမ်းနှင့် ဒီပဲယင်းနယ်အရှေ့ခြမ်း မြို့နယ်ချုပ်စပ်ရှိ ပေါက်သာ၊ ဆည်ကြီး၊ ဇိန့်ဇွန်းရွာများတွင် တပ်စွဲထားကြောင်း သိရသည်။
