မွန်ပြည်နယ်၊ မော်လမြိုင်မြို့တွင်ဇူလိုင်လ ၁၆ ရက်မှ စ၍ မိုးသည်းထန်စွာရွာသွန်းပြီးနောက်ရပ်ကွက် ၇ ရပ်ကွက်တွင် ရေလွှမ်းမိုးမှုကြုံတွေ့နေပြီးကလေးငယ်သုံးဦးရေနစ်သေဆုံးသွားကြောင်းမြို့ခံများကပြောသည်။
မော်လမြိုင်မြို့တွင်ဇူလိုင်လ၁၆ရက်မှစ၍မိုးသည်းထန်စွာရွာသွန်းပြီးယနေ့(ဇူလိုင်လ၁၉ရက်)အထိမိုးဆက်လက်ရွာသွန်းနေသည်ဟု ဒေသခံများကပြောသည်။
ယနေ့ ညနေအထိ ရရှိသောသတင်းများအရ မော်လမြိုင်မြို့ဖက်ခင်းရပ်ကွက်၊ ဇေယျာမြိုင်ရပ်ကွက်၊ သီရိမြိုင်ရပ်ကွက်၊ ရွှေပြည်အေးရပ်ကွက်၊မုပွန်ရပ်ကွက်၊ ဒိုက်ဝန်းကွင်းနှင့်ဒေါင်းမင်းရပ်တွင် ရေကြီးနစ်မြုပ်နေသည်ဟု သိရသည်။
“သီရိမြိုင် ၈လမ်းနဲ့ ၁၇လမ်းမှာရေတွေမြုပ်ပြီး ကလေးသုံးယောက်ရေနစ်တယ်။ ရှာကြတာအလောင်းတွေပြန်တွေ့ပါတယ်။ရေလည်းထပ်တိုးနေပါတယ်”ဟုမြို့ခံတစ်ဦးကပြောသည်။
ရေကြီးနေသောရပ်ကွက်များအတွင်း မြေနိမ့်ပိုင်းနေရာများတွင် ရေ ခုနစ်ပေခန့်အထိ နစ်မြုပ်နေပြီး ဘုန်းကြီးကျောင်းအချို့တွင် ယာယီရေဘေးကယ်ဆယ်ရေးစခန်းများ ဖွင့်လှစ်ထားရသည်ဟု မြို့ခံလူမှုကူညီရေးအဖွဲ့အချို့ကပြောသည်။
လက်ရှိတွင်မွန်ပြည်နယ်အတွင်းမော်လမြိုင်မြို့အပြင်ပေါင်၊ ချောင်းဆုံ၊ ကျိုက်မရောနှင့်မုဒုံမြို့တို့တွင် မိုးသည်းထန်စွာရွာနေသည်ဟု သိရသည်။ မော်လမြိုင်မြို့တွင် ၂၄ နာရီအတွင်း မိုးရေချိန် ၂၂ လက်မကျော်အထိ ရွာသွန်းခဲ့သည်ဟုလူမှုကူညီရေးအဖွဲ့အချို့က သတိပေးထားသည်။
မွန်ပြည်နယ်နှင့်တနင်္သာရီတိုင်းတွင် ဇူလိုင်လ ၂၁ရက်နေ့အထိ မိုးကြီးနိုင်ပြီး ရေကြီးရေလျှံမှုဘေးနှင့် နောက်ဆက်တွဲဖြစ်သော မြေပြိုမှု ဘေးအန္တရာယ်ကိုသတိပြုကြရန် အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး၀န်ကြီးဌာနကဇူလိုင်လ၁၇ရက်တွင်သတိပေးထားသည်။
ယခုရေကြီးနစ်မြုပ်မှုအတွက် စစ်ကောင်စီဘက်ကမည်သည့်သတိပေးချက်မှ မရခဲ့ကြောင်းမြို့ခံများကပြောသည်။
